Na God se Eie HartVoorbeeld

NA GOD SE EIE HART

Toe jy 'n kind was, het jy waarskynlik saam jou ouers na die kruidenierswinkel gegaan en gekyk hoe hulle vrugte van die hoogste gehalte uitkies. Ek onthou my pa het 'n waatlemoen altyd getoets deur dit 'n paar kloppe te gee. Wanneer hy die volmaakte hol geluid hoor, het hy gesê: "Dis 'n goeie een!" Sedert ek ouer geword het en my eie kruideniersware begin koop, het ek voortgegaan met hierdie praktyk om waatlemoene te klop. Ek het egter agtergekom dat hierdie eksterne waarnemings nie die interne kwaliteit van die waatlemoen volledig aan die lig kon bring nie. Net so kan eksterne waarnemings oor 'n ander persoon, jou min wys van die persoon se karakter. Dit is vanuit ons harte wat die diepe waarheid van ons innerlike eienskappe geopenbaar word.

God ken en verstaan wat in die dieptes van ons harte is en dit is duidelik in die lewe van Dawid: "Die Here sal vir Hom 'n man na sy hart soek" 1 Samuel 13:14b. In ons hedendaagse kultuur word ons dikwels beoordeel op grond van waar ons woon, ons voorkoms en wat ons in staat is om te voorsien. Soms is dit makliker om 'n oordeel oor 'n persoon te vel, eerder as om deur die proses te gaan om die persoon te leer ken. Terwyl ons 1 Samuel 16 lees, sien ons hoe Dawid se vader Isai al sy sterk, volwasse seuns voor Samuel bring om as die toekomstige koning van Israel gesalf te word. Selfs Samuel, die priester van die Here, wou aanvanklik ook op grond van voorkoms kies, met die gedagte dat God 'n sterk, mooi man wou salf. Die Here wys Samuel egter tereg en herinner hom dat Hy op grond van die hart en nie voorkoms kies nie. Hy kies toe vir Dawid as die toekomstige heerser.

Dit herinner ons dat die Here sy seuns en dogters nie kies op grond van hulle voorkoms, hoe sterk hulle is, hoe gewild hulle is, of selfs hoeveel geld hulle verdien nie. Die Here kies ons omdat Hy ons liefhet en daarna verlang dat ons sy hart moet verstaan. Te danke aan sy liefde verlos Hy ons, iets wat ons nie kan verdien nie. Hy gee dit verniet aan ons omdat verlossing reeds deur die bloed van Christus betaal is. Dikwels probeer ons om óf die Here se liefde óf die wêreld se liefde deur ons lewenstyl te verdien. Ons harte, tyd en energie wys egter wat ons werklik liefhet en nastreef.

Terwyl ons dus Dawid se verhaal lees en leer hoe Christus ons liefhet, begin ons verstaan dat ons ons lewens so moet leef dat ons die liefde van Christus aan ander wys. Nie op grond van hulle voorkoms nie, maar omdat hulle na die beeld van die Here self gemaak is.

VRA JOUSELF AF: Gee jy erkenning daaraan dat God jou liefhet, ongeag enigiets anders? Watter stappe sal jy neem om jou hart meer na God se hart te vorm?