Dís my Jesus.Voorbeeld

MY GEHOORSAAMHEID BRING GENESING

"Jesus sê toe vir hom: 'Staan op, tel jou goed op en loop.' Oombliklik het die man gesond geword, sy goed opgetel en geloop" Johannes 5:8,9 AFR83.

Die hartseer van hierdie hele verhaal is dat die lam man geglo het dis die water in die bad wat hom gesond gaan maak. En dis hoe ons almal mos maar is. Ons het óns idees van hoe dinge moet wees, of ander mense maak reëls wat ons glo en daardeur beperk ons God se werking in ons lewens!

Vir agt-en-dertig jaar lank probeer hierdie man om gesond te word. Hoe lank sukkel jy om gesond te word? Dalk sukkel jy om van jou verslawing genees te raak. Dalk is depressie of angs of ‘n ongelukkige huwelik jou bron van siekte, of dalk is jou probleem die sonde wat jy doen.

Vertel vir Jesus daarvan. Hy het vandag spesiaal afgedraai na jou toe om by jou te kom stilstaan. Hy steur Hom nie aan mensgemaakte reëls nie. Sien raak hoe lief Hy jou het. Weet dat Hy self ook hartseer is omdat jy so swaar kry. Weet dat Hy jou nie net fisiek gesond wil sien nie, maar Hy wil ook hê jy moet geestelik gesond wees. Hoor hom as Hy vir jou sê: “Staan op, tel jou goed op en loop!”

In die Nuwe Testament lees ons hoe Jesus Christus mense op verskillende maniere gesond gemaak het. Soms het die ouderlinge iemand met olie gesalf, of iemand het die gawe van genesing by God ontvang en kon vir ander bid om gesond te word, of hul het dadelik self gesond geword. Ander kere het die gelowiges iemand die hande opgelê in gebed. Ander tye was net geloof genoeg. God het ook mense gesond gemaak bloot deur die gebed en geloof van ander en soms het God mense gesond gemaak deur medisyne te gebruik.

Mag jy ook nou in gehoorsaamheid aan Hom, besluit om uit jou hartseer en ellende op te staan. Maak jou huis skoon, neem ‘n lekker warm bad, was jou hare, maak jou bed op en neem Jesus op sy Woord. Want in jou gehoorsaamheid aan Hom, bring Hy genesing vir jou alleen-wees, siekte en vir al jou vrese.

Gebed:

Ja Here, ek wil gehoorsaam wees! Amen.