Lewe Veranderd: Vertrou Op GodVoorbeeld

Vertrou Op God Wanneer Jy Angstig Is

Wanneer ons bekommerd is, help dit nie as iemand vir ons sê dat ons onnodig bekommerd is of dat ons dit net moet oorkom nie. In plaas daarvan om ons vrese te kalmeer, laat hierdie soort raad ons net voel dat ons nie gehoor word nie, nie vir ons omgegee word nie en ons vrese ongeldig is. Om eenvoudig te hoor jy moenie angstig wees nie, sal nie ons angstigheid laat ophou nie. In sulke oomblikke moet ons God aktief soek om vrede te vind.

Elisa was 'n profeet in die Ou Testament wat van God sou hoor en die koning van Israel sou waarsku wanneer 'n ander nasie beplan het om aan te val. Nadat die koning van Aram se planne verskeie kere misluk het, het hy besluit om sy leër te stuur om Elisa te vang. Een oggend het die vyand die kamp omsingel, en Elisa se dienaar het paniekerig begin raak. Elisa het vir hom gesê om nie bang te wees nie, want die Here se leër is groter as die leër van hulle vyand. Toe het hy gebid dat sy kneg se oë geopen moet word, en die jong man het gesien dat die berghange vol perde en strydwaens van vuur was.

Wanneer ons deur vrees oorweldig word, moet ons daaraan herinner word dat ons God met ons is en dat Hy groter is as enigiets wat dreig om ons skade aan te doen. Ons moet nie toelaat dat ons gedagtes buite beheer raak nie, maar onsself in die Skrif anker. Ons moet ons negatiewe denkpatrone herken en die leuen met die waarheid van die Woord van God vervang.

Die Bybel sê ons hoef nie in vrees te lewe nie omdat God ons 'n gesonde verstand gegee het. Hy is ons beskermer, ons voorsiener, ons krag, ons toevlug en ons alles. God is gister, vandag en vir altyd dieselfde. Net soos Hy Elisa gered het, kan ons vertrou dat Hy getrou sal wees om ons te red.

Wanneer ons angstige gedagtes in ons koppe weerklink, kan ons in die versoeking kom om ons vrees deur sinnelose bedrywighede te bedwelm. Hoewel dwelms, ongesonde verhoudings of die gebruik van sosiale media dalk 'n tydelike ontvlugting vir ons angstigheid is, sal nie een van hierdie dinge ons angstigheid laat verdwyn nie. Deur te kies om dit te verdoof, kies ons om passief te wees. As ons egter ons verstand wil vernuwe en deur geloof wil lewe, moet ons 'n aktiewe rol speel om ons angstige gedagtes uit te skakel.

As jy agterkom dat jy dikwels oor negatiewe moontlikhede dink, moet jy rigtingaanwysers skep wat jou sal help om jou fokus te verskuif. Hou jou fokus op 'n Skrifgedeelte deur dit op jou spieël te skryf, jou gunsteling vers in 'n raam op jou lessenaar te plaas of om te registreer om kennisgewings op jou selfoon te ontvang. Omring jou met godvrugtige mense in wie se teenwoordigheid jy openlik en kwesbaar kan wees. Onthou wie God is, wat Hy gedoen het, en wat Hy belowe om te doen. Spreek oor en oor sy waarheid oor jou lewe, totdat jy dit glo.

As jy vertrou dat wat die Bybel sê waar is, kan jy kies om te midde van jou angstigheid op God te vertrou. Waaroor jy ook al bekommerd is, God is goed genoeg, kragtig genoeg en liefdevol genoeg om enige uitkoms te neem — die een wat jy wil en die een wat jy nie wil hê nie — en dit vir jou beswil te gebruik.

Dit is nie maklik om te leer om God ten volle te vertrou nie. Dit is nie so eenvoudig soos om een Bybelleesplan te voltooi nie. Dit vereis dat jy die Woord van God herhaaldelik lees en dit in jou hart bêre sodat jy daaruit kan put wanneer die moeilike dae kom. Dit vereis dat jy kies om na sy goedheid en getrouheid te soek, nie net in die Bybel nie, maar in jou eie lewe. God was nog altyd by jou en Hy sal altyd wees. Hy het jou nog nooit in die steek gelaat, en Hy sal ook nooit nie. Jy kan Hom vertrou met jou hele hart en jou elke môre.

Verken ander Lewe Veranderd Leesplanne
Leer meer oor Changed Women's Ministries