Bevryding van VergelykingsVoorbeeld

Ons het die afgelope paar dae daaraan gewy om die oorsprong en gevolg van toksiese vergelykings in ons lewens te ontdek. Vandag en môre konsentreer ons daarop hoe om die mag van gesonde vergelykings te benut, sodat ons bevry kan word van die toksiese vergelykings in ons lewens.

Ons teksvers is 'n belangrike aanmoediging om ons tot die daad te laat oorgaan. Matteus 7:12 sê:

“Alles wat julle wil hê dat die mense aan julle moet doen, moet julle ook aan hulle doen. Dit is tog waarop dit neerkom in die wet en die profete.”

Wanneer ons onsekerhede begin inskop, voel ons uitgesluit, oorgesien, minderwaardig en mismoedig. Wat as ons daardie gevoelens omkeer en ons daaraan wy om seker te maak dat ander mense as gevolg van ons optrede teenoor hulle nie so voel nie? Hoe sal dit wees as ons 'n daadwerklike poging aanwend om ander in te sluit, te geniet, te bemoedig en te bevestig as ons uitgesluit, oorgesien, mismoedig en nie goed genoeg voel nie? Dis wat ons vers ons aanmoedig om te doen, want om van vergelykings bevry te word, vereis dat ons vir ander mense is wat ons wens hulle vir ons sal wees.

'n Voorbeeld. Ek het 'n e-pos ontvang met 'n uitnodiging na 'n samekoms van invloedryke mense — mense wat as leiers in hulle onderskeie velde gereken word (sake, media, musiek, bediening, ens.). Ek het geëerd gevoel om die uitnodiging te kry, maar toe ek na die lys van genooides kyk, was my naam nie daar nie. Ek het onmiddellik gevoel hoe my onsekerheid inskop. Dit het gevoel soos 'n emosionele dolk wat in my hart steek toe ek die name van mense lees wat ek bewonder en besef my naam is nie saam met hulle op die lys nie.

In plaas daarvan om myself te verag, het hierdie vers in my gees weergalm. Ek hoor toe die Here sê vir my: "Nona, jy is nou nie op die lys nie, maar jy was in die organiseerder se hart." Ek het weer na die lys gekyk en opgelet dat 'n paar ander invloedryke mense nie daarop was nie. Ek vra toe die organiseerder of ek die mense kan uitnooi en hulle antwoord: "Natuurlik!" Ek het toe na hierdie mense uitgereik en hulle genooi sodat hulle ook die byeenkoms kon geniet. Uiteindelik het ek toe nie die geleentheid bygewoon nie omdat dit met iets op my kalender gebots het!

God het daardie situasie gebruik om my hart te genees en my te help om die vryheid te ervaar wat kom as 'n mens nie meer deur toksiese vergelykings beïnvloed word nie. In plaas daarvan om ontsteld te wees omdat ek nie op 'n lys was nie, het die geleentheid om ander tot die lys toe te voeg my bemagtig. Ek het ander mense behandel soos ek behandel wil wees. En bevryding van vergelykings vereis dat ons mense behandel soos ons behandel wil word.

Ingesluit. Gewaardeerd. Waardig.