Raakgesien: Genesing van Wanhoop en Angs deur Verbintenis Voorbeeld

Luister Net

Om na iemand te luister wat seer het is 'n liefdesdaad. Om te luister sê: "Ek sien jou, omdat ek jou hoor." Dit kommunikeer 'n gevoel van veiligheid. Hou in gedagte dat om mooi te luister nie net beteken om iemand te hoor nie, dit gee iemand wat seer het 'n kans om emosioneel te ontspan.

Het jy al ooit nodig gehad om net stoom af te blaas? Indien wel, dan het jy emosioneel uitgeasem. Om emosioneel te ontspan, beteken om gevoelens te erken en dit van die regterkant van ons brein na die linkerkant te skuif, waar dit verwerk kan word.

Die regterkant van die brein kan baie angs en vrees opbou. Wanneer ons iemand help om emosioneel uit te asem, help ons hulle om die gevoel te erken en dit na die linkerkant van die brein te skuif, vir logiese verwerking. Om emosies logies te verwerk beteken om die emosie met waarheid, geloof en beginsels te ondersoek. Dit moet egter eers erken of "uitgeasem" word.

Ek hou van hoe Jesus op mense gereageer het. Hy sou dikwels meer vrae vra, eerder as om net uitsprake te gee. In Johannes 4 sien ons hierdie voorbeeld van Jesus wat luister. ’n Vrou by 'n put wat seer gehad het. Dit was omtrent twaalfuur, 'n tyd toe die meeste mense reeds hul water vir die dag kom haal het. Een vrou het egter na die put gegaan. Daar word vermoed dat sy in die middel van die dag na die put gegaan het om die geklets van veroordelende mense van die dorp te vermy. Haar lewenstyl, en die keuses wat sy gemaak het, het haar skaamte en die oordeel van ander laat voel.

Nie Jesus egter nie.

Hy het by die put 'n gesprek met haar begin voer. Kultureel was dit nie vir 'n Joodse man aanvaarbaar om met 'n Samaritaanse vrou te praat of selfs erkenning aan haar te gee nie. Jesus was egter nie 'n gewone Joodse man nie. Hy het opgedaag, Hy het haar gesien, en Hy het geluister. Hulle gesprek het aangedui wat Jesus reeds van haar geweet het, maar Hy het sy tyd geneem om te luister en te gesels. Dink daaroor, Jesus wat alle dinge weet, kon net vir die vrou van die begin af vertel het van alles wat Hy van haar geweet het. Hy het egter nie, Hy het na haar geluister en deur gesprek met haar 'n verbintenis gemaak.

Wanneer jy ander help om emosioneel te ontspan, vra vir hulle: "Hoe voel jy?" Gee hulle tyd om te deel en vrae te vra wat die gesprek aan die gang hou. Gebruik stellings soos: "Ek kan sien jy voel ..." of "Vertel my meer." Hierdie stellings wys aan die ander persoon dat jy belangstel om te luister en gee aan hulle die ruimte vir 'n emosionele uitaseming.