Raakgesien: Genesing van Wanhoop en Angs deur Verbintenis Voorbeeld

Sien Hulle

Wanneer Jesus na Lasarus se afsterwe opdaag, word Hy ontmoet deur harte in rou. Lasarus se susters en vriende is gebroke. Kan jy jou indink hoe Marta gevoel het? Die rouproses kom met 'n verskeidenheid emosies: skuld, woede, hartseer en spyt. Ons weet nie wat Marta op daardie oomblik gevoel het nie. Sy kon gesê het: "As U maar net hier kon wees ... " met 'n toon van woede terwyl sy op haar tande kners. Sy kon gesukkel het om die woorde uit te kry deur te snik en na asem te snak, "As ... (hyg), U ... (hyg), net ... (hyg) ... , " — ek glo jy verstaan wat ek bedoel.

Sy kon dit selfs emosieloos, met 'n eentonige stem, in gevoelloosheid gesê het.

Ons weet nie presies hoe sy haar emosies uitgedruk het nie. Wat ons egter duidelik sien, is dat Jesus stadig met liefde en empatie gereageer het. Jesus het nie haar gevoelens verwerp nie. Hy het haar nie laat skaamkry omdat sy nie meer geloof gehad het of meer positief was nie. Hy het eenvoudig opgedaag en die emosie gesien. Soveel so, voordat Hy iets gedoen het, het Jesus voor die graf waar Lasarus gelê het, stilgestaan en eenvoudig gehuil. Dit is een van die mees menslike dinge wat ons Jesus in sy gedrag sien vertoon. Hy ween saam met dié wat ween. Hy treur saam met dié wat treur. Hy daag op en sien hulle.

Ek het gehoor dat sommige Jesus se geween interpreteer as 'n aanduiding dat Hy hartseer was oor hulle gebrek aan geloof. Ek glo egter nie dat dit waar is nie. Jesus het die krag van empatie geken. Hy het geweet dit gaan nie net daaroor om Lasarus uit die dood op te wek nie, maar ook om op te daag en ander te sien. Jesus het vir ons gewys dat dit in orde is om te huil. Dit is in orde om hartseer te wees en om ander toe te laat om ook so te voel. Ons emosies is nie 'n vyand nie. Dit is deel van wie ons is. Dit is deel van die menslike ervaring wat God ons gegee het. Emosies is immers net emosies. Gevoelens is net gevoelens.

Om ander te help om raakgesien te voel, moet ons hulle sien. Om te sien wat hulle voel en dit te erken. Om gevoelens te erken beteken nie dat ons daarop hoef te reageer nie. Elke gevoel moet erken word, maar mens hoef nie op elke gevoel te reageer nie.