Selfs Stilte Is LofprysingVoorbeeld

Probeer Sommer om te Bid ... en Jy sal dit Regkry!

“Ek roep U aan, want U sal my antwoord, my God! Luister tog na my en hoor wat ek sê” (Psalm 17:6).

Voorneme is alles. Om te probeer is meer as genoeg. Om te probeer bid is om te bid. Dit is dieselfde met meditasie, of met enigiets wat oorgawe en vertroue behels.

'n Deel van my wil graag lyste hê, 'n lys van spesifieke Bybelleesgedeeltes, 'n skedule met psalms om my deur elke dag te dra. Die psalms is inderdaad al jare deel van my gebedsroetine. Ek het vroeër 'n Gideon's sakbybel met die Nuwe Testament en Psalms gehad en het dit op die moltrein gelees. Daar was selfs 'n tydperk wat ek 'n psalm sou uitdruk en dit saam met my dra tydens my drafsessie soggens. (Jy kan jou voorstel wat 'n eienaardige gesig dit was. “Hoekom lees daardie man ’n papiertjie terwyl hy hardloop?” Liewe land!) Ek het ook na klankbybels en inspirerende potgooie geluister terwyl ek oefen.

Van belang is dat sulke pogings jou nederig maak. Ek het soveel vrae: Wat beteken daardie psalm? Wat sê daardie gedeelte? Wat het die psalmis gedink? Hoe is dit op my van toepassing? Hoekom is dit al die jare bewaar en gesing? Die grootste raaisel: Waarom voel ek beter as ek hierdie psalms opsê? Ek voel nie soos 'n kenner om dit te doen nie. Net die teenoorgestelde; ek word herhaaldelik bewus gemaak van hoe min ek weet. Ek maak my oë toe en sluit alles uit en konsentreer op God, of liefde, of geloof en vertrou dat ek die persoon word wat God wil hê ek moet word.

Wanneer jy alleen in meditasie en gebed van nadenke is, kan jy niks vermy nie. Jy kan nie iemand anders blameer nie. Uitdagende goed gaan opduik, tye wat jy nie aan jou eie verwagtinge gaan voldoen nie. Jy kan probeer om op al jou suksesse te fokus, maar jou mislukkings kan jy nie onderdruk nie. Hulle sal jou nederig hou. Om met hulle te stoei is elke minuut werd.

Nederigheid is miskien een van die deugde wat die meeste misverstaan ​​word. Dit is nie om voor te gee dat jy minder is nie, om jouself op plekke te plaas waar jy geminag en verkleineer word nie. Moet dit asseblief nie doen nie. Die lewe is taai genoeg soos dit is. Dit is nie nodig om verwaand te wees of om voor ander te buig nie. Ware nederigheid is eenvoudiger en suiwerder. Jakobus 4:10 vertel ons: “Onderwerp julle in nederigheid voor die Here, en Hy sal julle verhoog.” Nederigheid, soos ek dit verstaan, is aanvaarding. Daardie reinigende houding van, Goed, hemelse Vader, ek sukkel hiermee, dit is te veel vir my. Ons sal op een of ander manier saam hierdeur kom. Bly naby my. Ek het U nodig. Ek kan dit nie op my eie doen nie. Ek weet U verwag nie dat ek dit op my eie moet doen nie. Slegs met u hulp. Soos Jesus gesê het: “Maar om aan my regter- of my linkerhand te sit, daaroor besluit Ek nie; dit is vir dié vir wie God dit gereed gemaak het” (Markus 10:40).

Dit is buite ons beheer.

Dink daaraan wanneer jy mediteer en jy ontsteld is dat 'n miljoen dinge deur jou gedagtes gaan. Jy raak behep met alles wat lyk asof dit verkeerd loop in hierdie wêreld. Jy sê jou heilige woord. Jy roep 'n enkele lettergreep, soos God, te midde van jou eie gedagtes uit. Jy word weer stil. Dan het jou lawwe gedagtes begin weghardloop met jou. Jy is ontsteld oor 'n opmerking wat iemand op sosiale media gemaak het. Jy is geïrriteerd deur 'n berig wat jy in die nuus lees. Jy kan nie langer die politieke klimaat hanteer nie. Dit maak jou seer en fisiek siek.

Miskien is dit jou rug wat jou pla of jou boude wat lam geword het – jy het dit net skielik agtergekom. Jou neus begin jeuk. (Krap dit.) Jou foon klingel in jou sak. (Nee, jy hoef nie na daardie boodskap te kyk nie. Dit kan wag.) Jy begin dink dat jy die slegste in die wêreld is wanneer dit by meditasie kom, hierdie sit, hierdie poging tot 'n gebed van nadenke. Hoekom nie opgee nie?

Welkom in hierdie klub. As ek 'n kampioen daarin was, as dit moeiteloos na my toe gekom het, dink ek nie ek sou daaroor skryf nie. Ek sou niks hê om te sê nie. Ek sou nie weet hoe moeilik dit kan wees of vir watter uitdagings ons heilige sondaars in die gesig staar nie. Hierdie stryd is die proses, is die plesier, is die praktyk. Ek kan aanvaar dat God deur my werk. My werk is eenvoudig om myself doelbewus hier in hierdie heilige ruimte te plaas, in hierdie heilige tyd.

Bedoeling is alles, veral in ons gebede.

Reageer

Vir wie of wat bid jy tans doelbewus?

Maak 'n lys van maniere waarop jy hulle kan aanmoedig en help.

Bid

Here en Verlosser, help my om vandag doelbewus u teenwoordigheid op te soek. Ek het U lief!