Twyfel In GodVoorbeeld

Die Regte Werkspan

'n Opknapping is vuil en deurmekaar en daarom werf ons gewoonlik 'n span om ons te help. Dit is moeilik om 'n lekkasie self aan te durf — ons het dikwels kundiges nodig om ons te help met die herstelwerk.

Net só is twyfel 'n skrikwekkende ding om op jou eie te hanteer. Daarom wil Jesus hê dat ons dit na Hom en na betroubare vriende moet bring.

Wanneer ons ons twyfel op ons eie hanteer, kan dit daartoe lei dat ons kwaad en sinies word. Soms kom ons selfs in die versoeking om die hele huis in die proses op te knap.

Die huis is egter nie die probleem nie. Net so, in ons geloof, beteken die bevraagtekening van ons oortuigings nie dat ons ons geloof heeltemal oorboord gooi nie.

Ons kan mettertyd sekere oortuigings blootlê wat nie met die Skrif ooreenstem nie, en net soos Petrus het ons dalk vir Jesus nodig om ons dan na die regte pad terug te lei. Maar net omdat jy 'n paar dinge geglo het wat nie heeltemal korrek was nie, beteken dit nie dat die Skrif nie waar is nie.

Soos ons by Tomas geleer het, gee Jesus ons toestemming om ongeloof te hê én om bewyse te soek. Ons kan in die opstanding glo, beide as gevolg van ons geloof in wie Jesus is én as gevolg van die bewyse wat daaroor bestaan.

Om egter ons vrae op ons eie te probeer hanteer, is 'n resep tot 'n ramp. Kom ons gaan terug na Tomas se verhaal.

Toe Tomas sy twyfel uitgespreek het, was hy besig om sy gedagtes en gevoelens alleen te probeer hanteer. Hy was nie saam met die ander dissipels agter die geslote deure toe Jesus die eerste keer aan hulle verskyn het nie.

Iets verander egter in sy verhaal. Die dissipels wat die nuus aan hom oordra, laat hom nie weens sy twyfel minder soos 'n dissipel voel nie. Inteendeel, wanneer Jesus vir Tomas die bewyse van sy opstanding gee, is hy by sy vriende teenwoordig:

"Ag dae later was Jesus se dissipels weer bymekaar, en Tomas was by hulle ..." (Johannes 20:26).

Baie kan in 'n week verander. Tomas het gegaan van afgesonder in sy twyfel, na bevestiging van sy geloof in gemeenskap met ander.

Ons weet nie presies wat daardie week gebeur het nie. Ons weet nie of die dissipels vir Tomas aangemoedig het om nie moed te verloor nie.

Ons weet egter dat Jesus opgedaag het toe Tomas by sy vriende was.

Wanneer jy, soos Tomas, in die diepte van twyfel is, moet jy dit nie alleen trotseer nie. Kry 'n paar vriende wat jou in geloof kan dra.

In Markus 2 sien ons nog 'n voorbeeld hiervan. 'n Verlamde man kon homself nie by Jesus kry nie, dus het sy vriende hom gedra en letterlik 'n gat in die dak gemaak om hom tot by Jesus te laat afsak.

"Toe Jesus hulle geloof sien, sê Hy vir die verlamde: 'Vriend, jou sondes word vergewe!'" Markus 2:5.

As jy nie eens die geloof het om by Jesus uit te kom nie, kan getroue vriende jou daarheen dra. Hulle kan jou help om aan jou geloof vas te hou wanneer jy voel asof daar niks van jou geloof oor is nie. Dit is dus in die haak om te twyfel. Moet net nie alleen in jou twyfel bly nie.

Bid: Vader, ek weet dat U ons vir gemeenskap geskep het. Gee my die wysheid en vrymoedigheid om te weet na wie om myself te wend te midde van my twyfel en ongeloof. Dankie dat U vir ons vriende en verhoudings gee wat ons kan ondersteun en dra wanneer ons dit die nodigste het. In die Naam van Jesus. Amen.