God Is _______Voorbeeld

God Is Betroubaar

Jesus Christus is gister en vandag dieselfde en tot in ewigheid.

Het iemand al ooit vir jou 'n leuen vertel, jou verraai of jou vertroue geskend? Dit het waarskynlik al een of ander tyd in jou lewe gebeur en dit sal heel waarskynlik weer in die toekoms gebeur. Hoekom? Omdat mense nie perfek is nie.

Ons probeer ons bes om ons woord te hou, ons beloftes na te kom en betroubaar te wees, maar een of ander tyd sal ons almal onvermydelik foute maak. Of dit nou is om 'n sperdatum by die werk mis te loop of om 'n belofte aan 'n vriend te verbreek, ons almal sal onvermydelik vertroue in ons verhoudings skend.

Om te ervaar dat ons vertroue verbreek word, is ongelooflik pynlik, nie net op die korttermyn nie, maar ook skadelik op die langtermyn. Trouens, daar is uitgebreide neurowetenskaplike navorsing oor die invloed wat verbreekte vertroue op ons breine, ons liggame en ons verhoudings het.

Ons breine wil ander instinktief vertrou, en wanneer ons vertrou, word die hormoon oksitosien vrygestel, wat wetenskaplikes "die liefdes-chemikalie" of selfs "die geneesmiddel van vertroue" noem. Die vrystelling van hierdie chemikalie in ons brein veroorsaak dat ons vertroue verhoog, dus hoe meer ervarings ons met positiewe vertroue het, hoe gewilliger is ons om ander te vertrou.

Die teenoorgestelde is egter ook waar. Wanneer iemand ons vertroue verbreek, stimuleer dit die deel van die brein wat vrees produseer, wat dit nog moeiliker maak om in die toekoms te vertrou.

Wanneer dit dus daarby kom om God te vertrou, kom ons dikwels in die versoeking om vorige ervarings met onvolmaakte mense op ons huidige ervarings met 'n volmaakte God toe te pas.

Miskien is dit vir jou moeilik om God te vertrou omdat 'n ouer of gesagsfiguur jou seergemaak het. Of miskien is dit vir jou moeilik om God te vertrou omdat iets aakligs in jou lewe gebeur het, en dit voel of God nie jou gebede verhoor het deur die aaklige dinge te verhoed nie.

Alhoewel die pyn van hierdie ervarings werklik is, verander dit nie die waarheid oor wie God is nie. Hy is die enigste Een wat heeltemal betroubaar is. Kom ons kyk na wat die Skrif vir ons sê hoekom ons ons vertroue in God kan stel:

• "Ek die Here, het nie verander nie ..." Anders as mense, wat enige tyd van plan kan verander, sal God nooit van plan verander oor sy liefde vir jou of sy goeie planne vir jou nie. "Jesus Christus is gister en vandag dieselfde en tot in ewigheid." (Sien Maleagi 3:6 en Hebreërs 13:8.)
• "... Ek sal jou nooit verlaat nie, jou nooit in die steek laat nie." "... geen hoogtes of diepte of enigiets anders in die skepping kan ons van die liefde van God skei nie ..." (Sien Hebreërs 13:5 en Romeine 8:39.)
• "Ons weet dat God alles ten goede laat meewerk vir dié wat Hom liefhet ..." Selfs wanneer ons pyn in hierdie lewe ervaar, kan God skoonheid uit as skep. Hy spesialiseer in herstel en verlossing, en Hy kan doel aan ons pyn gee. (Sien Romeine 8:28, Jesaja 61:1-3 AFR53.)

Dit maak nie saak hoeveel keer ander mense jou in die steek gelaat het nie, God sal nooit nie. Hy sal jou nooit verlaat nie, en Hy is jou vertroue waardig.

Bid: Vader, dit kan soms vir my moeilik wees om U te vertrou omdat _________. Sal U my help om daardie hindernis te oorkom sodat ek U volkome kan vertrou? Dankie dat U heeltemal betroubaar is. Gaan voort om my geloof en vertroue te bou in wie U is, en dankie dat U deur alles werk om u goedheid na vore te bring. In die Naam van Jesus. Amen.

Uitdaging: Staan tyd af om te bid en die area in jou lewe te identifiseer waar jy God nie ten volle vertrou nie. Gee dan daardie dinge aan Hom oor. Jy kan dit selfs neerskryf en in 'n houer plaas as simbool dat jy dit aan God oorgee.