God Is _______Voorbeeld

God Is Barmhartig

"Kom ons gaan dan met vrymoedigheid na die genadetroon, sodat ons barmhartigheid en genade ontvang en so op die regte tyd gered kan word" Hebreërs 4:16.

Soos ons gister gesê het, is God se strewe altyd na ons, selfs wanneer ons dit die minste verdien. Daardie eienskap is 'n kenmerk van sy groot genade.

Ons almal het gesondig en skiet tekort aan God se standaard, wat 'n versperring tussen ons en ons volmaakte, heilige God skep. Uit genade het God egter vir Jesus gestuur om die straf wat ons verdien – die dood – op Hom te neem en vir ons die weg gebaan om die ewige lewe saam met Hom te hê.

God se genade beteken dat ons nie kry wat ons verdien nie. Dit hou egter nie daar op nie. God se genade gaan nie net daaroor om vir ons 'n uitweg te voorsien nie, maar ook om vir God 'n weg na ons innerlike te skep. Hy het nie net ons sonde verwyder nie, Hy het sy Seun gestuur. Hy het 'n weg gemaak deur ons te ontmoet waar ons is, soos ons is.

Jesus het gekom as Immanuel: God by ons. Hy het elke menslike emosie ervaar, en sy aardse lewe is 'n bewys van God se begeerte om nader aan ons te kom. In daardie nabyheid vind ons God se genade.

Regdeur die evangelies sien ons verskeie voorbeelde van mense wat vir Jesus om "genade" vra. Een kragtige voorbeeld word in Lukas 17 beskryf wanneer melaatse mense Jesus nader.

Ter wille van konteks: destyds het melaatsheid mense onaantasbare uitgeworpenes gemaak. Volgens die Levitiese wet is hulle seremonieel as onrein beskou, en dit beteken enigeen wat hulle aanraak sou ook onrein word.

Maar as God in die vlees, is Jesus rein. Hy is rein, heilig en volmaak. Terwyl die melaatses Hom nader, roep hulle om genade. Jesus beveel hulle om na die priester te gaan — die protokol volgens die wet. Onderweg daarheen, word hulle genees.

Jesus vervul in wese die wet omgekeerd. In plaas daarvan om onrein te word deur hulle aan te raak, dra Hy sy eie heiligheid aan hulle oor om hulle onreinheid te bedek.

Dit is 'n perfekte voorbeeld van wat Jesus vir elkeen van ons deur sy dood en opstanding gedoen het. God het nie net ons sonde, pyn en gebrokenheid verwyder nie — Hy het ons ook deur Jesus ontmoet. Wanneer ons verlossing in Christus aanvaar, ervaar ons God se genade.

Eintlik is dit selfs nog meer. Ons ervaar God se genade nie net deur ons verlossing nie, maar ook in oomblikke van pyn, hartseer en desperaatheid — net soos die melaatses ervaar het. As jy nou in 'n moeilike tydperk is, roep om God se genade. Hy is by jou. Hy is naby. Hy is in staat om te genees, te herstel en te verlos.

Bid: Vader, dankie dat U ons so geweldig genadig is. Dankie vir Jesus. Dankie dat U 'n God is wat naby ons wil wees, al verdien ons dit nie. Gee my oë om u genade te midde van my pyn te sien, en help my om daardie barmhartige liefde ook uit te brei na diegene om my. In die Naam van Jesus. Amen.

Uitdaging: Soek geleenthede om God se genade in jou lewe te sien en om ander vandag genadig te wees.