IdentiteitVoorbeeld

Dag 4: Ek moet Christus behaag en nie mense se goedkeuring soek nie.

Gebed: Hemelse Vader, herinner my gedurende die dag dat my waarde van U kom. Amen.

Lees: 

As volgelinge van Jesus, word ons geroep om te dien. Indien ons 'n behoefte sien en ons bekwaam is om te kan help, moet ons inspring en doen wat ons kan. As ons weet dat ons in staat is om' n verskil in iemand se lewe te maak, kan dit ons help om te voel ons het 'n doel.

Soos met enigiets, as die motiewe agter selfs die edelste optrede van koers af raak, dan sal ons onsself in 'n ongesonde plek bevind. As jy al ooit enige waardering ontvang het vir wat jy gedoen het, weet jy dat dit aanloklik kan wees om op lof te konsentreer en gou te vergeet waarom jy begin dien het.

Wat die rede ook al mag wees, wanneer ons besef dat ons na goedkeuring verlang, word ons kwesbaar vir 'n baie algemene valse opvatting — ek moet ander tevrede stel om waarde te hê. Wanneer ons begin om hierdie leuen te glo, stel ons onsself bloot aan sekere probleme —

• Ons versuim om vir onsself te sorg, aangesien ons hoof-motivering afkomstig is van die goedkeuring wat ons van ander mense kry. 
• Ons steek ons onvolmaaktheid weg. 
• Ons vertel nie die volle waarheid wanneer ons 'n slegte werk gedoen het nie.

Ons moet onthou dat ons alreeds onmeetlik waardevol is! Elkeen is geskep as God se beeld, jy is die enigste een wat bestaan, wat soos jy is. God aanvaar jou ten volle en het waardering vir jou.

Dit is nutteloos om al ons energie daaraan te bestee om ander te behaag. In hierdie lewe sal party mense ons bewonder — en party sal nie. Alhoewel ons die lof van tyd tot tyd geniet, kan ons gevoelens ook seergemaak word as gevolg van iemand se mening oor ons, maar ander se goedkeuring moet nie die uiteindelike motivering vir ons optrede wees nie.

Ek moet God behaag en nie mense se goedkeuring soek nie. Selfs die apostel Paulus het daaroor nagedink en geworstel oor hoe ander mense hom gesien het.

"Klink dit nou asof ek die guns van mense soek, of soek ek die guns van God? Probeer ek by mense in die guns kom? As ek nog steeds die guns van mense soek, sou ek geen dienaar van Christus wees nie" (Galasiërs 1:10).

Al mag ons dade daartoe lei dat mense gedien of tevrede gestel word, moet ons motiewe wees om te dien soos die Een wat ons eerste gedien het deur sy Seun vir ons te gee.

Nadenke:

Hoe sou dit vir my wees as ek ander dien, maar nie van hulle waardering of goedkeuring afhanklik is om my waarde te bepaal nie?