Die Weg van die KoninkrykVoorbeeld

Neem Jy Aanstoot?

Johannes die Doper het sy volwasse lewe daaraan gewy deur die koms van die Messias aan te kondig. Johannes was Jesus se neef, wat beteken dat beide geweet het van die wonderwerke tydens hul geboortes. Noudat hulle ten volle in hul bedieninge getree het, kondig beide Johannes en Jesus met vertroue aan dat die koninkryk naby gekom het. Dit lyk asof hulle hiermee in ooreenstemming is.

Onverwags stuur Johannes egter sy dissipels na Jesus om te vra of Hy werklik die Messias is, en of hulle dalk iemand anders moet verwag. Het Johannes nie geweet nie? Dit het voorgekom dat hy geweet het, maar nou lyk dit of hy in vertwyfeling is. 

Johannes het 'n revolusionêr verwag wat die politieke, godsdienstige en kulturele stelsels van sy dag omver sou werp. Hy het geglo dat die Messias 'n regverdige rebellie sou lei wat deur God gesteun word. Waar het Johannes hom op daardie stadium bevind? Hy was geboei en in die tronk waar hy onder die geweld van die onregverdige en afgod-aanbiddende Herodes gely het. Wat het Jesus daaromtrent gedoen? Niks nie.

As Jesus die Een is wat sou kom, sou Hy nie besig wees om sy koninkryk op te rig, Hom gereedmaak om die sosiopolitieke onderdrukkers omver te werp, 'n hervorming onder die godsdienstige elite uit te roep en Homself as die regverdige, Goddelik-aangestelde Koning te vestig nie? Sou Hy nie in Johannes se omstandighede in die tronk ingryp, aangesien Hy sy vurige oordeel oor alle ongeregtigheid tot stand sou bring nie? Volgens Johannes se verwagtinge sou die antwoord "ja" gewees het. 

Jesus het Johannes egter gemaan om nie aanstoot te neem nie. Johannes moes die versoeking weerstaan en doelbewus kies om selfs ten aanskoue van belediging, onreg en besering te bly glo. Vir Johannes sou daar geen verlossing wees nie. Die misverstand van sy verwagtinge het hom verward, skepties en in die versoeking tot ongeloof gelaat. In daardie ervaring en omstandighede het Jesus hom tot geloof geroep.

Hoe dikwels wanneer ons voor onvervulde verwagtinge te staan kom of wanneer die skerp kant van teenstand en onreg ons druk, voel ons deur God te na gekom? Ons begin twyfel aan sy liefde, goedheid, getrouheid, teenwoordigheid en selfs sy werklikheid. Hoeveel het nie al omgedraai en opgehou om Jesus te volg, presies hieroor nie? Dit is hoe die vyand die beweging van die Gees doodmaak. 

Ons staan op die punt van nog 'n groot beweging deur God. As ons op die koninkryk se weg wil wandel om by God aan te sluit in 'n beweging van die Gees onder ons geslag, moet ons nie aanstoot neem nie.