Daaglikse Oordenkings met Greg LaurieVoorbeeld

Geheime Christene

Het jy al ooit probeer om ʼn geheime Christen te wees? Dit is wat met Petrus gebeur het. Hy het probeer om by die omstanders in te pas. Hy het Jesus op ʼn afstand gevolg en koud geword, dus het hy nader gestaan aan die hitte van die vyand se vuur.

Op hierdie tydstip was Petrus afgetakel, verslaan, swak en kwesbaar. Hoekom was hy hoegenaamd in die hoëpriester se binnehof? Volgens Matteus 26:58: “...en hy het ingegaan en by die wagte gaan sit om te kyk hoe dit afloop." Petrus het alles vergeet wat Jesus gesê het oor sy opstanding uit die dood. Nou het hy net gewag vir die einde — die einde van Jesus se lewe — die einde van sy droom — die einde van alles wat hy as kosbaar beskou het. Maar dit was nie die einde nie. Dit sou ʼn nuwe begin wees.

Petrus se probleem was: hy was op die verkeerde plek by die verkeerde mense, op die punt om die verkeerde ding te doen. Wanneer daardie passie in ons hart begin doodgaan, sal die vuur wat ons vir Christus gehad het, koud word en sal ons elders hitte gaan soek.

Die Bybel sê:

"Dit gaan goed met die mens wat nie die raad van goddeloses volg nie, nie met sondaars omgaan en met ligsinniges saamspan nie, maar wat in die woord van die Here sy vreugde vind, dit dag en nag oordink. Hy is soos 'n boom wat by waterstrome geplant is, wat op die regte tyd vrugte dra en waarvan die blare nie verdroog nie. Hy is voorspoedig in alles wat hy aanpak" (Psalm 1: 1-3).

Wanneer jy saam met die verkeerde mense kuier, by die verkeerde plek, op die verkeerde tyd, dan is dit net ʼn kwessie van tyd voordat jy die verkeerde ding doen.

Ter opsomming: Om Christus op ʼn afstand te volg, kan veroorsaak dat jy deur die vyand se kampvuur aangetrek word.


Kopiereg © 2012 deur Harvest Ministries. Alle regte voorbehou.