Te Veel Van ’n Goeie Ding …Voorbeeld

Gefokus

Hierdie Messiaanse profesie vertel van die onwrikbare manier waarop Jesus sy belofte deurgevoer het toe Hy vir ons aan die kruis gesterf het. Dit bevestig sy ysere wilskrag en vasbeslotenheid om te doen wat sy Vader van Hom vra – ongeag wat dit kos.

Ongelukkig is dié tipe vasberadenheid, volharding en selfbeheersing deesdae skaars. Ons aandag word vinnig afgelei deur apps op ons fone, vermaak en verskonings. Navorsing wys dat mense wat voortdurend tussen verskillende vermaaklikheidsmedia rondspring ook oor minder van dié tipe grysstof beskik wat met wilskrag en besluitneming te make het – en ’n groter risiko loop om met obsessief-kompulsiewe gedrag, depressie en angstigheid te sukkel.

Hoe kan jou wêreld verander as jy oefen om elke dag vir ’n volle vyf minute lank nét te fokus op één Bybelvers? Sou dit dalk die loop van jou dag verander? Of dalk sommer jou hele lewe?

EK STUUR NET GOU DIE BOODSKAP …

Selfoonskeidingsangs is ’n wesenlike probleem. Wanneer ’n mens se foon pieng, skei jou brein dadelik ’n dosis goedvoel-dopamien af – die begin van ’n verslawingsreaksie wat soortgelyk is aan hoe ’n dwelm jou laat voel. Elke keer wanneer jy jou aandag van ’n boodskap na e-pos tot webwerf skuif, is daar ’n verskuiwingskoste. Jou brein struikel en het tyd nodig (15-25 minute) om weer terug te kom waar dit was vóór die afleiding. Om 15 keer per dag na jou foon te kyk, met ’n “verskuiwingskoste” van 15 minute beteken jy mors meer as drie ure per dag! Skakel jou foon se klank af (of nog beter – sit dit in vliegtuigmodus) om ononderbroke te dink.