God het ‘n diep begeerte na vriendskap met elkeen van ons. Om dit moontlik te maak, het God vir Jesus na ons toe gestuur as ‘n manier van toegang na sy vriendskap. Soos ons begin om te bly, te vertoef, te leef in hierdie Jesus wat nóú bestaan as die opgestane Christus, verhewe bo die kruisiging, só lei Hy ons na die intieme hart van God. Die evangelieskrywers wys ons hierdie gewaagde aanbod; en die werklike lewenservaringe van Christus-volgelinge deur die eeue bevestig die feit dat ons, deur in Jesus te bly, intimiteit met God kan beleef. Maar wat behels dit om “in Jesus te bly”?

Dit behels om elke dag na Jesus toe te draai, na sy stem te luister, ons harte met Hom te deel, onsself te voed uit sy Woord, sy opdragte uit te voer, Hom ín te nooi in elke ding wat ons doen, en sáám met hom aan ander lewe te gee. Dit behels waarskynlik óók die snoei van daardie dele van ons lewe wat besoedel is deur selfsug en gierigheid. Soos wat ons saam met Jesus loop, kom Hy en sy Vader na ons toe, en maak hulle woning by ons (Sien Joh. 14:23). So begin ons sáám leef in die intimiteit van die Goddelike Vriendskap.

Ter Nadenke

Maak vandag kontak met iemand wat deur ‘n moeilike tyd gaan. Probeer om God se omgee-vriendskap te reflekteer in hoe jy na hulle luister.

Gebed

Here, laat my hart ontwaak tot U uitnodiging na vriendskap.

Die Boodskap vir jou Lewensreis

Daaglikse oordenking wat voortbou op die dag se tema