Neem Jou Lewe Terug: Dink Reg Sodat Jy Reg Kan LeweVoorbeeld

Koester die Stryd

Jy is bestem om invloed te hê. Jy is geliefd, jy is onuitspreeklik waardevol, en jy is deur God geskep vir sy vreugde en vir sy grootse doel. Jy mag dalk hiermee sukkel, maar terwyl jy na God luister en besluite neem, ontwikkel jy jou geloofspiere. Koester die stryd. 

Ons hanteer die onderwerp van God se wil asof dit iets uitsonderlik, eksoties of geheimsinnig is, maar in werklikheid is dit nie juis geheimsinnig nie. Om God se roeping te onderskei, gaan meer oor wie jy word as waarheen jy gaan. Miskien gaan dit minder oor wat jy doen en meer oor hoe goed jy dit doen. Dit is hier en gereed, as jy net jou oë wil oopmaak. 

Ons raak vasgevang in die besonderhede van God se verborge wil, maar — as jy aanvaar dat jy saam met Hom wandel en sy geopenbaarde wil gehoorsaam — kan jy doen wat jy wil of gaan waar jy wil en vertrou dat Hy die Een is wat deur jou gedagtes en begeertes vir jou lei en rigting gee. Gaan uit in geloof met die wete dat God jou vooruitgaan en die pad gereedmaak, jou lei in sy voorsiening en dinge voorberei vir jou om te ontdek. 

As jy moedeloos word deur die verskil tussen wie jy nou is en wie jy wil wees, tussen die nou en die nog nie, berus in die feit dat ons 'n lewende Verlosser en lewende hoop het. Jesus sal terugkeer en dit wat die vyand vernietig het, sal herstel word. Daar is meer lewe voor ons as agter ons. Daardie dag is nog nie hier nie, en al lyk dit soms of dit nooit sal kom nie, is dit gewaarborg (sien Romeine 8:19–25). Ons kan in verwagting, vol afwagting lewe. Dit is wat jou aan die gang sal hou wanneer jy wil tou opgooi. 

"Rig julle gedagtes op die dinge wat daar bo is, nie op die dinge wat op die aarde is nie" (Kolossense 3:2). Jy moet op die toekoms fokus, nie die verlede nie. Wanneer jou hart behoorlik gefokus is op die dinge wat gaan kom in plaas daarvan om lam te wees van die moeilike en die aaklige dinge wat jy moes hanteer, is jy ingestel om in die hede effektief te wees. Met die hulp van God kan jy opgewonde op al die vreugde en heerlikheid wag en die dodelike hipnotiserende aantrekkingskrag van hierdie wêreld beveg. 

Met die toekoms in gedagte, kan jy aanhou om vandag en elke dag vir die stryd op te daag. Jy sal mislukking in die gesig staar. Jy sal daaraan dink om handdoek in te gooi. Jy sal vertroue in jou drome verloor. Die waarheid is egter, dit is 'n geveg en dit is nie verby nie.Jy sal in die geveg platgeslaan word, maar staan weer op. Dit kan 'n moeilike, bloedige stryd wees. 

Terwyl jy die goeie stryd stry en aanhou leef, veg jy nie net vir jouself om jou lewe terug te neem nie. God wil lewens deur jou red. Wie weet wat jou nalatenskap sal wees as jy aanhou opstaan en opdaag. Wie weet vir wie God sal inspireer deur hoe jy jou stryd met geloof stry en deur jou hoop in Jesus.

Reageer

Wat het jy uit jou stryd geleer, in beide jou gedagtes en in jou omstandighede?

Hoe beïnvloed jou perspektief op mislukking jou vermoë om jou stryd die hoof te bied? 

Hoe laat dit God toe om jou te gebruik om deur elke dag gereed te wees? Hoekom is dit die moeite werd om op te daag?