Wysheid om Reg te LeefVoorbeeld

Bo Alles

Vyf en twintig jaar gelede het die bestuursghoeroe, Stephen Covey, 'n uiterste invloedryke boek gepubliseer: First Things First. Een afdeling van die boek het hy "Die Hoof Ding is om die Hoof Ding die Hoof Ding te hou" genoem. Dit is kragtige raad in 'n wêreld wat ons konstant in alle rigtings roep.

Salomo vertel ons wat die hoof ding is. Tussen sy instruksies aan sy seun, vind ons die volgende: "Bewaak jou hart meer as alles wat bewaar moet word, want daaruit is die oorspronge van die lewe." Ons kan Salomo se woorde as volg parafraseer: Die hoof ding is om jou hart te bewaak. Daar is niks belangriker as dit nie. Dit is waardig om die plek "bo alles" in te neem. Jy sal in baie rigtings geroep word, sê hy, maar bewaar jou hart.

Salomo se hoofvak is wysheid, maar die wysheid wat hy aanbeveel, is 'n spesifieke soort. Dit is wysheid vir 'n regverdige lewe. Soos hy in Spreuke 1:3 skryf: "So sal hulle 'n behoorlike opvoeding ontvang en 'n sin vir regverdigheid, reg en billikheid." So ook in Spreuke 2:9: "As jy aanneem wat ek jou sê, sal jy insig kry in wat regverdig en reg en billik is en sal jy op die goeie pad bly." Dit is waarom ons ons harte moet bewaar, om op die regte pad te bly.

Waarvan is jou hart vol? Wat is jou drome? Waaraan heg jy waarde? Daardie is die dinge wat die gedagtes van jou hart vul, en Jesus sê: "Waar die hart van vol is, loop die mond van oor" (Matteus 12:34). As jy goeie dinge oordink, is dit wat uit jou mond sal kom, woorde van lof, bemoediging, blydskap en vrede. Aan die ander kant, as jy slegte dinge bedink, is dit wat sal uitkom. Jy sal woorde van kritiek, twyfel, vrees en onsekerheid spreek. 

Salomo self het nie daarin geslaag om sy hart te bewaak nie en het as 'n mislukking geëindig (1 Konings 11:1-13). Hou jy die hoof ding die hoof ding? Bewaar jy jou hart? 

Gebed: Here, wanneer ek gejaagd deur die lewe gaan, laat my die hoof ding, die hoof ding hou. Gee my asseblief die toewyding wat ek nodig het. Wanneer ek versoeking in die gesig staar, laat my voorbereid wees. Laat my in die stilte van die oggend of die aand my verdediging opstel deur u Woord te oordink en dit in my hart te bêre. Wanneer ek die prediker of die leraar hoor, laat my daardie woord in my hart bêre. Gee my 'n Goddelike perspektief Here, om te sien wat "bo alles" is.