Hoe is God? 'n 21-dag LeesplanVoorbeeld

God Is Ons Geneesheer

God word meer as 60 keer in die Bybel as Jehova-Rophe (of Jehova-Rapha) beskryf. Jehova beteken "God" en Rophe of Rapha beteken "om te herstel", "om gesond te maak", of "genesing".

In Eksodus 15:26 het God aan Moses en die Israeliete gesê: "Julle moet goed luister na wat Ek, die Here julle God, sê! Julle moet doen wat reg is in my oë, gehoor gee aan my gebooie en alles doen wat Ek vir julle voorskryf. Dan sal Ek geeneen van die siektes waarmee Ek Egipte getref het, oor julle bring nie, want dit is Ek, die Here, wat julle gesond hou."

Genesing is 'n onlosmaaklike deel van God se karakter. God is oor elke area van jou gesondheid besorg — jou fisieke en geestesgesondheid, emosionele welstand, asook jou geestelike ywer (Psalm 103:2-3). Wanneer ons begryp God is Jehova-Rophe, die Groot Geneesheer, erken ons dat geen genesing sonder Hom kan plaasvind nie. Slegs Hy kan ons gebrokenheid volkome genees.

Ons wil dikwels die genesing hê, sonder om die probleem aan te spreek. God moet egter die oorsprong van ons pyn aanspreek — die verwerping, die seerkry of dalk die verraad — om ons te genees. 

Ons Geneesheer het nie, en sal nooit, verander nie (Maleagi 3:6). Jesus doen nog steeds wonderwerke. God bewerkstellig genesing deur middel van moderne medisyne, net soos hy die antieke Israelitiese wette ingestel het om hulle van siektes te beskerm.

Die Evangelie is die fisieke, sedelike en geestelike geneesmiddel vir alle mense. Vanweë die verlossing van Christus, het ons die ewige lewe, die leiding van die Heilige Gees en die verbintenis met God (Jesaja 53:5).

Oordink die volgende:

• Wanneer jy aan jou algehele gesondheid dink, wat kan jy vandag aan God vir genesing oorgee?
• Waarvoor is jy vandag dankbaar teenoor God wat jou gesondheid betref?