Hoe is God? 'n 21-dag LeesplanVoorbeeld

God Is Die Here (Jahwe)

Het jy al ooit 'n opdrag ontvang wat jy gevoel het vir jou té moeilik was om uit te voer? Jou eerste gedagte was moontlik: "Wie is ek om dit te kan doen?" Hetsy dit in jou beroep, huwelik, rol as vrywilliger, ouerskap of skool is, ons kom almal voor oomblikke te staan waar ons wonder: "Hoekom ek?"
 

Moses het 'n soortgelyke reaksie in die boek Eksodus gehad. God het vir Moses gestuur om sy plan uit te voer om die Israeliete van die farao te verlos. Moses se eerste vraag was: "... Wie is ék dat ek dit by die farao sou waag en dat ék die Israeliete uit Egipte sou bevry?" (Eksodus 3:11). Sy tweede vraag oor wie hy sou sê hom gestuur het, was nog belangriker. Hy vra vir God: "... Sê nou ek kom by die Israeliete ... en hulle vra vir my: 'Wat is sy Naam?' wat moet ek dan vir hulle sê?" (Eksodus 3:13). God reageer daarop: "... Ek is wat Ek is. Jy moet vir die Israeliete sê: 'Ek is' het my na julle toe gestuur" (Eksodus 3:14).

Ons beskryf onsself gewoonlik volgens die beroep wat ons beoefen of ons verbintenisse met ander, byvoorbeeld: "Ek is 'n sakevrou" of "Ek is 'n ma." God hoef Homself egter nie deur beskrywings in verhouding tot iets anders te definieer nie, want alle dinge word in verhouding tot God gedefinieer. Toe Hy na Homself as "Ek is" verwys het, het Hy eintlik vir Moses daaraan herinner dat alle gesag aan Hom behoort en dat Hy nog altyd bestaan het. God is almagtig, onveranderlik en altyd dieselfde.
 

Geleerdes sê dat Jehova of Jahwe, wat as "die Here" vertaal word, van die Hebreeuse woord "Ek is" afgelei is. Die woord word meer as enige ander van God se name in die Bybel gebruik, naamlik 6 519 keer. God se mense word herhaaldelik aan die krag van EK IS herinner.

Om God te ken, rus ons toe sodat ons weet wie ons is en wat ons roeping is.

Wanneer ons voel ons lewenstake oorweldig ons, is dit menslik om Moses se eerste vraag te vra: "Hoekom ek?" Nogtans is dit noodsaaklik om die tweede vraag, wat alles verander, te vra: "Wie stuur my?"

Oordink die volgende:

• In watter area van jou lewe voel jy oorweldig en nie in staat om die taak op hande uit te voer nie? Is dit iets wat God jou geroep het om te doen?
• Hoe verander die kennis oor God se eienskappe en krag jou siening oor hierdie taak?