Vreugde: 'n Aftelling tot by KersfeesVoorbeeld

Die Verhaal Begin 

Presies wat is vreugde? 

Om dit te verklaar, moet ons teruggaan na die tyd toe God die aarde geskape het. Verbeel jou jy het so pas lewe ontvang deur die asem van God en terwyl Hy jou van die grond af ophelp, glimlag Hy vir jou. Van toe af, wanneer Hy ook al na jou kyk, glimlag Hy. Die lewe is perfek, tot die dag wat jy die enigste ding doen wat God jou verbied het om te doen. As gevolg van hierdie daad van rebellie, vervreem jy jouself van die Een wat jy ten volle geken en liefgehad het. Oombliklik word dít wat bedoel was om ewige nabyheid aan God te wees, ewige verwydering van Hom. 

Dis wat in Genesis 1 tot 3 gebeur het … maar gelukkig is dit nie die einde van die verhaal nie. Alhoewel die mensdom 'n fout gemaak het, het God 'n belofte gemaak dat Hy Iemand sal stuur om ons gebrokenheid heel te maak en ons verhouding met Hom te herstel. 

Kersfees dui die voltrekking van God se belofte aan, toe die Skeppergod die vorm van 'n baba aangeneem en "God by ons" geword het. As gevolg van Kersfees kan enigiemand nou kies om in Christus te glo en permanente vreugde te ervaar, wat net gebeur as jy God persoonlik ken. 

Deur die loop van die volgende week sal ons kyk na verskeie Bybelse voorbeelde van mense wat hierdie lewensveranderende vreugde uitbeeld. Berei vandag voor vir Kersfees, deur na te dink oor wat die koms van die Verlosser vir mense beteken het wat in ewige verwydering van God was, en dank Jesus dat Hy "God by ons" geword het.

Bid hierdie gebed:

Liewe Heer, dis as gevolg van U wat as 'n baba aarde toe gekom het, dat ek oneindige vreugde kan ervaar. Help my hierdie week om die geboorte van my Verlosser op 'n nuwe manier te waardeer. Laat die vreugde van die Kersverhaal my verander. Berei my hart vandag voor om u heerlikheid te ontvang.