'n Sewe-dag Gids oor GebedVoorbeeld

Bid soos Jesus

Om te bid, is die belangrikste gesprek van jou dag. Neem dit na God voordat jy dit na iemand anders neem. — Anoniem

Is dit regtig so belangrik dat ons daagliks tyd in gebed met God deurbring? Nouja, op dag een het ons geleer dat gebed bloot 'n tweerigting-gesprek is wat ons met God voer om te kan groei. Dit kom daarop neer om, onder andere, tyd te wy aan gesels, luister, vrae vra en om Hom te dank. Om te bid of 'n deurlopende gesprek met God te hê, is noodsaaklik om as volgelinge van Christus te groei. 

Het jy geweet dat Jesus baie tyd daaraan gewy het om tot God te bid? Die Bybel sê dat Hy dikwels weggegaan het om alleen te bid. In die evangelies van Matteus, Markus, Lukas en Johannes, lees ons meer as vier en twintig keer dat Hy gebid het! Hy het gebid ... 

• ... toe Hy alleen was en toe Hy saam met ander was. 
• ... voordat hy iemand genees het en nadat hy iemand genees het. 
• ... voor etes en voor belangrike besluite. 
• ... soggens en saans.
• ... nadat Hy aan die kruis vasgespyker was en terwyl Hy aan die kruis gesterf het.

Wat Jesus se gebede vir ons sê, is dat Hy vir alles op sy Vader staatgemaak het, en Hý was die Verlosser van die wêreld! As Hý tyd saam met God in gebed nodig gehad het, het ons vir seker ook. Hoekom? Omdat ons in 'n wêreld lewe wat ons voortdurend voor nuwe dinge te staan laat kom en smeek om ons aandag daarvan af te lei om met God te wandel. Gebed stel ons in staat om aansluiting by God te vind en deur Hom gelei te word. Gedurende hierdie gebedstye, het Jesus nader aan sy hemelse Vader gekom. Sy gebedstye wys hoe desperaat Hy sy hemelse Vader nodig gehad het. 

Wat kan ons by Jesus leer oor gebed? Bid ín elke situasie en bid óór elke situasie. 

Gaan eenvoudig met alles na God toe. 

Meningsverskille in verhoudings? Praat met God. 

Finansiële rampe? Praat met God. 

Geestesprobleme? Praat met God.

Fisieke verleenthede? Praat met God.

Loopbaanuitdagings? Praat met God.

Emosionele krisisse? Praat met God. 

Wat ook al die situasie of probleem is, praat met Hom. Dit is wat Jesus gedoen het. Dit kanselleer nie die daaropvolgende stappe wat jy in hierdie oop gebedsverhouding met God gaan neem nie, want jy het ook 'n rol om te speel. Dit beteken net dat ons éérs na Hom toe gaan.

Ons moenie deur gebed geïntimideer word nie. Ons hoef nie te wonder of ons dit “op die regte manier” doen en of ons “die regte ding” sê nie. God wil net hê dat ons in 'n intieme verhouding met Hom sal wees, en Hy weet dat daaglikse, deurlopende gesprek met Hom die beste plan is. 

Soos ons deur die res van hierdie leesplan werk, kom ons verdiep ons in hoe gebed in ons lewens as volgelinge van Christus lyk. 

Nadenke

• Wanneer is dit vir jou maklik om te bid? Wanneer is dit moeilik?
• Skryf enige openbaring neer wat God vandag vir jou deur middel van vandag se Skrifgedeeltes of oordenking bekendmaak.