JosuaVoorbeeld

Lees: Josua 2:15-18;  Eksodus 23:31

SOAP: Josua 2:24

Vir verdere nalees: Josua 2:19-23  

Die verkenners wat Josua na Jerigo gestuur het, het verslag gegee nadat hulle van die muur rondom die stad afgeklim het. Hulle bevinding? “Kom ons gaan!” Dit is ‘n totaal teenoorgestelde bevinding as dié van die ander tien verkenners wat deur Moses gestuur is in Numeri 13. Hierdie mans het, nadat hulle in die stad was en met Ragab gepraat het, vir Josua vertel dat die mense in Jerigo bang was vir hulle. 

Onthou jy nog gister se verse toe Ragab vir die verkenners vertel het dat sy van hulle God gehoor het? Sy was nie die enigste een wat gehoor het van die wonderwerke wat God vir sy mense gedoen het nie. Hulle het gehoor van sy voorsiening, sy sorg en sy beskerming. En nou was God se mense aan die anderkant van die Jordaan, gereed om die rivier oor te steek en hulle stad aan te val.

Vandag se verse herinner my aan die verse wat handel oor die duiwels wat ook glo en sidder van angs (Jakobus 2:19). Soms sien die ongelowiges die wonders van God beter raak as ons. Miskien het ons so gewoond geraak aan die klein, elke dag se wonderwerke wat God in ons lewens doen dat ons nie meer aandag gee daaraan nie. Kom ons onthou vandag dat ons ‘n God van wonders het. ‘n God van wonderwerke. En kom ons gee aandag aan daardie “klein” wonderwerke in ons lewens.

Liewe Vader, vergewe my asseblief dat ek so gewoond geraak het aan die magtige dade wat U in my lewe doen. Ek wil U in elke detail sien. Ek wil nooit ophou om u wonderwerke in my lewe te sien nie.

In Jesus se naam.

Amen.