'n Plek Aan Die TafelVoorbeeld

Wat behels die Tafel? 

Hulle het hulle heelhartig toegelê op die leer van die apostels en die onderlinge verbondenheid, die gemeenskaplike maaltyd (asook die nagmaal) en die gebede. — Handelinge 2:42 

Stel jou 'n lang, mooi voorbereide tafel voor, waar elkeen 'n sitplek het. Jy vind jou naamkaartjie en gaan sit tussen twee persone wat jy nog nooit ontmoet het nie. Jou eetgerei blink in die lig van flikkerende kerse en 'n sagte gemurmel van gesprekke begin. Na 'n paar ongemaklike bekendstellings, word die brood gebreek en aangegee. Binne oomblikke is daar gelag en vloei gemaklike gesprekke. 

Terwyl jy eet, vertel die Franse vrou langs jou 'n storie oor haar jongste dogter se eerste skooldag en hoe sy gehuil het toe sy totsiens waai. 

Tydens nagereg gesels die man aan jou anderkant oor sy grootwordjare in Ghana, Wes-Afrika. Hy vertel hoe hy die reuk van die huis onthou — kakao en vreugdevuur rook — en hoeveel hy dit mis. 

Jy vertel ook jou storie, en vind dit makliker as wat jy gedink het om jou gedagtes, gevoelens, hoop en drome met twee vreemdelinge te deel.

Dis vreemd: Alhoewel julle nou pas ontmoet het, voel niemand soos 'n vreemdeling nie.

Dit is die tafel. Dit is die koninkryk van God in werking.

Die Skrif is God se pragtige uitnodiging aan die hele mensdom om na sy tafel te kom. Deur Jesus het ons 'n sitplek aan hierdie tafel, maar nie omdat ons dit verdien het nie. 

Efesiërs 2:8-9 herinner ons daaraan: "Julle is inderdaad uit genade gered, deur geloof. Hierdie redding kom nie uit julleself nie; dit is 'n gawe van God. Dit kom nie deur julle eie verdienste nie, en daarom het niemand enige rede om op homself trots te wees nie."

Al het God die uitnodiging aan almal gestuur, weet sommige mense nie dat hulle na sy tafel uitgenooi is nie. Dis waar ons in die prentjie kom.

Ons nooi jou uit om te ontdek wat dit beteken om deel van die koninkryk van God te wees. Ons sal elke dag op een van die items op die tafel fokus vir hierdie spesiale samekoms. Elke item is 'n simbool van die maniere waarop God ons sien deelneem in sy koninkryk hier op aarde. 

Trek jou stoel nader, laat ons begin!

Stof tot nadenke: 

• Met watter persoon sou jy graag wil saameet?
• Hoe voel dit om te weet jy is uitgenooi na die tafel van God se koninkryk?
• Dink aan een persoon in jou lewe wat nog nie weet dat God hom of haar liefhet en dat hy of sy na die tafel uitgenooi is nie. Hoe kan jy die week vir hulle bid?

Jy is uitgenooi na God se tafel! Kom neem jou sitplek in by wycliffe.org/table.