HOSEA 7:8-16
HOSEA 7:8-16 Die Bybel 2020-vertaling (AFR20)
“Efraim is onder die nasies, hy word self geknie. Efraim het geword soos 'n roosterkoek wat nie omgedraai is nie. Vreemdes het sy kragte verteer, maar hy besef dit nie. Hy het ook grys geword, maar hy besef dit nie. Israel se hoogmoed getuig teen hom, maar hulle keer nie terug na die HERE hulle God nie; te midde van dit alles soek hulle Hom nie op nie. Efraim het geword soos 'n duif – dom en sonder verstand. Hulle het vir Egipte gekoer, maar na Assirië gevlieg. Wanneer hulle vlieg, sprei Ek my vangnet oor hulle uit. Soos voëls van die hemel sal Ek hulle neertrek. Ek sal hulle vang soos iemand wat vir die swerm luister. Wee hulle, want hulle vlug weg van My af. Verwoesting wag op hulle, want hulle het teen My oortree. Ek wou hulle verlos, maar hulle het leuens oor My vertel. Hulle roep nie uit die hart na My om hulp nie; want hulle kerm op hulle lêplekke; oor koring en •nuwe wyn sny hulle hulleself stukkend – so draai hulle teen My. Ek is die Een wat hulle geleer het. Ek het hulle arms sterk gemaak, maar teen My beplan hulle kwaad. Hulle keer terug na wat nutteloos is; hulle het soos 'n slap boog geword. Hulle leiers sal deur die swaard val oor die vervloeking wat hulle uitgespreek het. Dit sal hulle bespotting wees in Egipteland.
HOSEA 7:8-16 Die Boodskap (DB)
“Efraim het met volke deurmekaargeraak wat nie in die Here glo nie. Hy het soos ’n ding geword wat net halfpad gaargemaak is en wat niemand kan eet nie. Mense wat hy nie eens ken nie, het sy geld gevat. Hy het dit nie eens agtergekom nie. Hy was nie eens bewus daarvan dat hy oud geword het nie. Niemand hou van Israel wat so verwaand is nie. Hy is te hoogmoedig om terug te kom na die Here sy God. Na alles wat met hom gebeur het, is hy steeds te trots om die Here te kom vra om hom te help. “Efraim is soos ’n duif wat sonder koers rondfladder. Hulle soek hulp by Egipte. Hulle hardloop agter Assirië aan. As hulle probeer oorvlieg na hierdie lande toe, lê Ek hulle voor. Ek gooi my vangnet oor hulle uit. Ek bring hulle af grond toe soos wanneer ’n mens ’n swerm voëls hoor kom en hulle met ’n net vang en almal aftrek uit die lug. Daar wag moeilikheid vir hulle, want hulle het van My af probeer wegvlieg. Hulle gaan vernietig word, want hulle het teen my gerebelleer. “Ek wou hulle graag vrygemaak het, maar hulle het My om die bos probeer lei. Wanneer hulle tot My bid, bedoel hulle dit nie regtig nie. Eintlik beledig hulle My wanneer hulle so vir My bid. Hulle lê en kerm op die bed net soos wanneer die heidene vir hulle gode bid. Hulle kerf hulle stukkend met messe asof hulle vir ’n afgod bid om vir hulle koring en wyn te gee. “Ek het hulle laat oefen om oorlog te maak. Hulle het hulle arms sterk gemaak. Hulle het ongelukkig agter my rug ander planne gaan maak. Hulle het na mense gesoek wat hulle kan help. Hulle kon nie sulke mense in die hande kry nie. Hulle het geword soos ’n slap boog wat nie meer kan skiet nie. Hulle leiers gaan in die oorlog dood van die vervloekings wat hulle oor hulleself uitgespreek het. In Egipte spot die mense met hulle.”
HOSEA 7:8-16 Bybel vir almal (ABA)
“Die mense van Efraim lewe tussen ander volke, en die volke doen met die mense van Efraim wat hulle wil. Efraim beteken nou niks. Mense van ander lande regeer oor hulle en maak hulle swak, maar hulle weet dit nie. Hulle is soos brood wat oud en muf geword het, maar hulle weet dit nie. Die mense van Israel het gedink hulle is belangrik, maar hulle is nie meer belangrik nie. Hulle het nie teruggekom na hulle God die Here nie. Dit het sleg gegaan met hulle, maar hulle het nie vir die Here gevra wat hulle moet doen nie. Die mense van Efraim is soos 'n duif wat dom is. Hulle vra vir Egipte om hulle te help, maar dan vlieg hulle na Assirië toe. Ek sal hulle vang soos 'n mens voëls vang. Ek sal 'n vangnet oor hulle gooi en hulle vang wanneer hulle opvlieg. Dit sal sleg gaan met hulle, want hulle het weggevlug van My. Hulle sal baie swaar kry, want hulle wou nie luister na My nie. Ek wou hulle red, maar hulle het gelieg vir My. “Hulle het gebid en gevra dat Ek hulle moet help, maar hulle was vals. Hulle lê op die bed en huil en hulle sny hulleself met messe, want hulle dink Baäl sal vir hulle koring en wyn gee. Hulle dien My nie meer nie. Dit is Ék wat hulle grootgemaak het en wat vir hulle geleer het. Ek het hulle sterk laat word, maar hulle maak slegte planne teen My. Hulle gaan na gode toe wat nie kan help nie. Hulle is soos 'n boog wat breek wanneer jy 'n pyl wil skiet. Hulle amptenare sal sterf in oorlog, want hulle het hulleself vervloek. Die Egiptenaars sal vir hulle lag.”
HOSEA 7:8-16 Afrikaans 1933/1953 (AFR53)
Efraim — hy vermeng hom met die volke; Efraim is 'n roosterkoek wat nie omgekeer is nie. Vreemdes verteer sy krag, en hy bemerk dit nie; ook is grysheid oor hom uitgesprei, en hy weet dit nie. Ja, die trotsheid van Israel getuig openlik teen hom; en tog bekeer hulle hul nie tot die HERE hulle God nie, en ondanks dit alles soek hulle Hom nie. So het Efraim dan geword soos 'n onnosele duif sonder verstand; hulle roep na Egipte, hulle gaan na Assur. Wanneer hulle gaan, sal Ek my net oor hulle uitsprei; soos die voëls van die hemel trek Ek hulle neer; Ek tugtig hulle soos in hulle samekoms aangekondig is. Wee hulle, omdat hulle van My weggevlieg het! Verwoesting oor hulle, omdat hulle teen My oortree het! Ék tog wou hulle verlos, maar húlle het leuens teen My gespreek. Ook roep hulle nie van harte na My nie, maar jammer op hulle bedde; ter wille van koring en mos kerwe hulle hulself stukkend; hulle is opstandig teen My. Alhoewel Ek hulle arms geoefen, versterk het, het hulle kwaad teen My beraam. Hulle keer terug, maar nie na bo nie; hulle is soos 'n bedrieglike boog; hulle vorste sal val deur die swaard weens die skeldwoorde van hulle tong. Dit is hulle bespotting in Egipteland.
HOSEA 7:8-16 Afrikaans 1983 (AFR83)
Efraim is tussen die nasies, maar hy word self geknie. Efraim het soos 'n askoek geword wat verbrand het. Vreemdes het sy krag verteer, maar hy besef dit nie! Hy het muf geraak soos ou brood, maar hy besef dit nie. Israel se hoogmoed getuig teen hom. Hulle het nie teruggekeer na My, die Here hulle God, nie en het te midde van dit alles nie na my wil gevra nie. Efraim het geword soos 'n duif: dom en sonder verstand. Hulle het vir Egipte gekoer, maar Assirië toe gevlieg. Maar elke keer as hulle daarheen gaan, sal Ek my vangnet oor hulle gooi; Ek sal hulle soos voëls neertrek, Ek sal hulle vastrek sodra Ek die gedruis van die swerm hoor. Ellende wag vir hulle omdat hulle van My af wegvlug! Daar wag teëspoed vir hulle omdat hulle teen My in opstand is! Ek was bereid om hulle te red, maar hulle lieg vir My. Toe hulle na My om hulp geroep het, het dit nie uit die hart gekom nie, want hulle lê op hulle beddens en kerm en sny hulleself stukkend ter wille van koring en wyn. Hulle verset hulle teen My alhoewel Ek hulle gewaarsku het. Toe Ek hulle gehelp het, het hulle opstand beplan teen My en hulp gesoek by wat nie kon help nie. Hulle het so nutteloos geword soos 'n slap boog. Hulle leiers sal met die swaard afgemaai word, hulle sal die slagoffers word van die vervloeking wat hulle oor hulleself uitgespreek het as hulle aan my verbond ongehoorsaam sou wees. En Egipte sal daaroor lag.
HOSEA 7:8-16 Contemporary Afrikaans Bible 2023 (CAB23)
Efraim, hy het hom onder die volk vermeng; Efraim is 'n koek wat nie gedraai is nie. Vreemdelinge het sy krag opgeëet, en hy weet dit nie; ja, hier en daar is grys hare op hom, maar hy weet nie. En die trotsheid van Israel getuig in sy aangesig, en hulle bekeer hulle nie tot die HERE hulle God nie en soek Hom nie oor dit alles nie. En Efraim is soos 'n onnosele duif sonder hart; hulle roep na Egipte, hulle gaan na Assirië. Wanneer hulle gaan, sal Ek my net oor hulle uitsprei; Ek sal hulle afbring soos die voëls van die hemel; Ek sal hulle tugtig soos hulle vergadering gehoor het. Wee hulle! want hulle het van My weggevlug, vernietiging oor hulle! omdat hulle teen My oortree het; al het Ek hulle verlos, tog het hulle leuens teen My gespreek. En hulle het My nie met hul hart aangeroep as hulle op hul beddens gehuil het nie; Al het ek hulle arms gebind en versterk, tog dink hulle onheil teen my. Hulle keer terug, maar nie na die Allerhoogste nie; hulle is soos 'n bedrieglike boog; hulle vorste sal deur die swaard val vanweë die woede van hulle tong; dit sal hulle bespotting wees in Egipteland.
HOSEA 7:8-16 Nuwe Lewende Vertaling (NLV)
“Israel vermeng met die nasies en word net soos hulle. Efraim is soos ’n roosterkoek wat nie omgedraai is nie en halfgebak en waardeloos geword het! Vreemdes het sy kragte getap, maar hy kom dit nie eens agter nie. Hy het oud en swak geword, maar hy besef dit nie. Israel se verwaandheid getuig teen hom; tog draai hy nie om, terug na die HERE sy God toe nie. Hy probeer nie eens om Hom te soek nie. “Die mense van Israel het geword soos ’n dwase, onnosele duif. Hulle roep nou vir Egipte, netnou vlieg hulle na Assirië toe. Wanneer hulle daarheen vlieg, sal Ek my vangnet oor hulle gooi en hulle neertrek soos voëls in die lug. Ek sal hulle straf wanneer hulle in swerms bymekaarkom. “Hoe tragies is dit vir hulle wat van My af wegvlug! Hulle sal omkom, want hulle het teen My in opstand gekom. Ek wou hulle bevry, maar hulle het vir My leuens vertel. Hulle roep nie na My met ’n opregte hart nie. In plaas daarvan lê hulle op hulle beddens en kerm. Hulle sny hulleself stukkend voor hulle afgode as hulle bid vir gesaaides en wingerde. Hulle het teen My gerebelleer. “Ek het hulle opgelei en hulle arms sterk gemaak. Tog beplan hulle bose dinge teen My. Hulle soek hulp, maar nie by die Allerhoogste nie. Hulle is soos ’n slap boog. Hulle leiers sal deur die swaard doodgemaak word weens hulle astrante woorde teenoor My. Dan sal Egipte vir hulle lag.”