Jɛ́nɛ́sì 45
45
Jòsé zaìn ɔ mìɔùn jè kɔ̃in
1Ti ɓɛ́ Júɖà ɖǎ ma wùɖùɛ̀ hwɔɛɛ, púɛɛ, Jòsé se ma ɔ mìɔùn dyí kpɔ̃ɔ ɓɛ́ìn ɖe ɓó ɔ gbo-nì-nyɔ̀ séín ɓěɔ̀ dyúa. Ɔ jèɛɛ, ɔ páná ma mú, ké ɔ ɖá, “Nyɔ séín mɛ sɔ̀ dà ḿ dyúa.” Púɛɛ, nyɔ ɖò se ma ɓó Jòsé dyúa sè, ɔ sèìn ɔ ɖíí-gàà ɓěɔ̀ ɖòùn, ti ɓɛ́ ɔ zaìn ma ɔ mìɔùn jè wa gbo kɔ̃in nyɛ. 2Ké ɔ po ma kpé ɖé wuɖu zoo mú jèɛɛ, Íjè-nyɔ̀ ɓěɔ̀ wɔ̃́ɔ ma ní. Ké nyɔ ɓě nì ma ɖé Féwòɖò ɓíɖí-taún wɛ̃ɛ wɔ̃́ɔ ma jè. 3Hwɛ̀ ké Jòsé cɛ̃ɛ ma ɔ ɖíí-gàà ɓěɔ̀ gbo, ké ɔ ɖá, “Ḿ mɔ̀ Jòsé! Ḿ ɓǎ nì cĩ́ɛń keè?” Kɛɛ ɔ ɖíí-gàà ɓěɔ̀ se ma ɔ gɔ̃̌ jǔɛ ɓɛ́ìn, sepóɛɖé wa giniìn ma dyi, ké díɖí kpɔ̃ ma wa kɔ̃ mìɔ ɓó ɔ dyúa. 4Ké ɔ cɛ̃ɛ ma ɔ ɖíí-gàà ɓěɔ̀ gbo ɖe, ké ɔ ɖá, “Ní ɓaà ɓě ní, ɓě xwɛ̃́ìn ḿ bũ̌in.” Ké wa xwɛ̃́ìn ma ɔ bũ̌in, ké ɔ ɖá, “Mɔ̄ mɔ̀ ɓě ɖíí-gàà Jòsé! Mɔ̄ mɔ̀ nyɔ ɓě peɖe ma kà, ké wa dyà ma kà ḿ nɔ̄ Íjè-ɓòɖòɛ̀ kɔ̃ɛ̀. 5Ɓó kàǔn wɛ̃ɛ, ɓě ɓɔ́ hwìɖǐi poɛ̀n, ké ɓě ɓɔ́ ɓě mìɔùn dyoɖoún kpáìn ɓó ḿ peɖe jè. Sepóɛɖé Gèɖèpɔ́ɔ̀ tò nɔ̄ ḿ dyúa, ɓɛ́ fɛ̀ɛ̀ ké pó jè. 6Mɔ́ɔ̀ ɖǎ ɓóɖóɛ̀ kɔ̃ zɔ̃ sɔ̃́ nyu, ké zɔ̃ hm̀m̌ sè ɓó ke. Ɓó tia ɓaɖaa, ɓáá-ɖɛ̀ ɖò se mɛ́ɛ mu, ké ɓáá-ɖɛ̀ ɖò se tòɖòɛ̌ mu. 7Ɔ jèɛɛ, Gèɖèpɔ́ɔ̀ tò nɔ̄ ḿ dyúa, ɓɛ́ ɔ kéɛ nyu ɓɛ́ ɓěà fɛ̀ɛ̀ ké pó dyììn ɖé gbǎà-gbǎà vɛ̀nɛ̀ nìà kɛ mú, ɓɛ́ ɓěà xwéɖé ní kɔ̃̀ ɖà níɔ wáɖá. 8Ɔ jèɛɛ, ɓě mɛ dyuòɛ̀ dyí kà ɓě mɔ̀ nyɔ se ma nɔ̄ ḿ tòɛ, kɛɛ Gèɖèpɔ́ɔ̀ mɔ̀ nyɔ nyuɛ ma náa. Ɔ ɖǎ ḿ gɔ̌mànà-nyɔ̀ vɛ̀nɛ̀ mú nyu ɓó Féwòɖò dyúa, ké ḿ mɔ̀ǎ Féwòɖòɛ̀ gbǒ-xwíníín-nyɔ̀ ɓěɔ̀ kè Íjè-ɓòɖò gànáɔ̀ wuɖuí-kɔ̃̀-nyɔ̀.
9“Ɓó kàǔn wɛ̃ɛ, ɓě fṹà, ɓɛ́ ɓě ké ɖé ḿ ɓǎ gbo ɖe mu, ɓɛ́ ɓě ké níiń, ‘Nì dyú-gàà Jòsé ɖá Gèɖèpɔ́ɔ̀ ɖǎ ɔ Íjè-ɓòɖò gànáɔ̀ wuɖuí-kɔ̃̀-nyɔ̀ mú nyu. Ɔ jèɛɛ, m̀ mɛ fṹà, ɓɛ́ m̀ ké ɖé ɔ gbo mu. 10Nì mu ɖé Íjè-ɓòɖòɔ̀ wáká mɔ̀à Gósɛ̃̀ìn kɛɛ mú cĩ́ìn, ɓɛ́ m̀ kè nì dyú ɓě kè nì nyúà-dyú ɓě kè nì nyúà-ɖɛ̀ ɓěɔ̀ ɔ kè nì kɔ̃̀ɔ̀-ɖɛ̀ séín ɓěɔ̀ ké ɔ bũ̌in xwɛ̃́ìn. 11Ké ɔ mu ɖé m̀ jè gbo gmɔ̀ùn, sepóɛɖé mɔ́-zɔ̃̀ hm̀m̌ sè ɓó ke. Ɔ se ná nìǐn, nìí, nì gbǒ-xwíníín gànáɔ̀ kè nì kɔ̃̀ɔ̀-ɖɛ̀ séín ɓěɔ̀ mu mú gbɔɔ̀ùn.’
12“Ɓě mìɔùn kè ní ɖíí-gàà Bɛ̃́címà mɛ dyéɛ kà ɔ mɔ̀ mɔ̄ Jòsé nìà ɓě gbo wùɖùɛ̌n nyɛ̀. 13Ɔ jèɛɛ, ɓě cɛ̃ kpé vɛ̀nɛ̀ séín ɓɛ́ ḿ ɓéɖé nɔ̄ Íjè-ɓòɖòɛ̀ kɔ̃ɛ kè ɖɛ séín ɓɛ́ ɓě dyéɛɛ jè ḿ ɓǎ gbo. Ké ɓě mɛ fṹà, ɓɛ́ ɓě ké nɔ̄ ɔ dyà wàɖà.”
14Púɛɛ, ɔ kpá ma ɔ ɖíí-gàà Bɛ̃́címà ɖɔ, ké ɔ po ma kpé. Ké Bɛ̃́címà mɔ̀ùn gbèɖèìn ma ɔ, ké ɔ po ma kpé ɖekè. 15Hwɛ̀ ké Jòsé gbèɖèìn ma ɔ ɖíí-gàà tɔ̀ɔ̀ ɓěɔ̀ ɖò-ɖò séín, ké ɔ nyá ma wa wɔ̃, ké ɔ po ma kpé. Sɔ̀ìn ɓóɛ gboɛɛ, hwɛ̀ ké ɔ kè ɔ ɖíí-gàà ɓěɔ̀ dè ma dɔ́ɔ́.
16Ti ɓɛ́ bɔ̃̌ɔ̀ nyini ma ɖé Féwòɖò ɓíɖí-taún kà Jòséɛ̀ ɖíí-gàà ɓě ɖǎ dyiɛɛ, púɛɛ, Féwòɖò kè ɔ gɔ̌mànà-nyɔ̀ vɛ̀nɛ̀ séín ɓěɔ̀ hwòɖǒ dè ma dyi. 17Ké Féwòɖò cɛ̃ɛ ma Jòsé gbo, ké ɔ ɖá, “Cɛ̃ɛ nì ɖíí-gàà ɓěɔ̀ gbo, ɓɛ́ m̀ ké níiń, ‘Ɓě dyíìn ɓěɛ̀ jǎkasì ɓěɔ̀ ɖii-ɖɛ̀ kɔ̃ún, ɓɛ́ ɓě kéɛ ɓě ɓíɖí Kénà-ɓòɖòɔ̀ kɔ̃ kpa, 18ɓɛ́ ɓě ké à ɓǎ kè ɓěɛ̀ gbǒ-xwíníín-nyɔ̀ ɓěɔ̀ nɔ̄ ḿ gbo ɖe dyà. Ní mu ɓě Íjè-ɓòɖòɛ̀ dɛ̀ kpa ɖɛ kɛɛ nyíìn, ɓɛ́ ɓě ké ɓóɖóɔ̀ cáná ná.’ 19M̀ mɛ cɛ̃ɛ wa gbo ɖekè, ɓɛ́ m̀ ké níiń, ‘Ɓě mɛ kpa Íjè-ɓòɖòɛ̀ hwíì-sǒ vɛ̀nɛ̀ ɖíɛ́ ɓě ɓó ɓěɛ̀ dyú mɛ́nɛ́ɛ́ ɓěɔ̀ kè ɓěɛ̀ gmàà ɓěɔ̀ bìì, ɓɛ́ ɓě ké à ɓǎ ɓóɛń mu, ɓɛ́ ɓě ké dyi. 20Ké ɓě mɛ ɓɔ́ hwìɖǐi poɛ̀n ɓó ɓěɛ̀ kɔ̃̀ɔ̀-ɖɛ̀ ɓěɔ̀ jè, sepóɛɖé Íjè-ɓòɖòɔ̀ dɛ̀ kpa ɖɛ kɛɛ, ɖéɛ̀ ní mu ɓě nyíìn.’ ”
21Ɔ jèɛɛ, Éézùɖùɛ̀ɛ̀ dyú-gàà ɓěɔ̀ nyuɛ ma náa. Jòsé nyí ma wa hwíì-sǒ vɛ̀nɛ̀ ɓě kɔ̃̀ jè ɓɛ́ Féwòɖò cɛ̃ ma kà ɔ gboɛ. Ké ɔ nyí ma wa hwìè-kɔ̃-ɖìì-ɖɛ̀ ɖekè. 22Ké ɔ nyí ma wa ɖò-ɖò séín mú-po-ɖɔ̀ ɖìè, kɛɛ ɔ nyí ma Bɛ̃́címà séɓàɖà-cɛ̀kò hɔ̃dɛ̀ɖɛ̀ tã kè sútù hm̀m̌. 23Ké ɖɛ ɓě ɓɛ́ ɔ kɔ́ìn ma ɔ ɓǎɛɛ, wa kɛà kɛ̀: jǎkasì ɓíɔ́ ɓaɖa-bùè ɓɛ́ Íjè-ɓòɖòɔ̀ ɖɛ kpa ɖɛ ɓěɔ̀ gbɛ̌ ɓě nì kɔ̃ún wɛ̃ kè jǎkasì nyɔ́nɔ́ ɓaɖa-bùè. Gbɛ̌ ɓě nì ma jǎkasì nyɔ́nɔ́ ɓěɔ̀ kɔ̃ún wɛ̃ɛ mɔ̀ ma bɛɖɛɛ̀ kè ɖii-ɖɛ̀ kà kò ɖò ɓě kè ɖɛ ɖíɛ́ ɓě. Ɔ tò ma ɖɛ ɓě nìà kɛ, ɓɛ́ ɔ ɓǎ kéɛ ma ɔ mìɔùn gbo ɓéɖé ɓó Íjè-ɓòɖòɔ̀ kɔ̃ mu hwìè-kpàɔ̀ jè. 24Kǎà ɔ nyu ma ɔ ɖíí-gàà ɓěɔ̀ cuòɛ̀. Ti ɓɛ́ wa nìǎ ma hwìè xwíníín kpáuń wɛ̃ɛ, ɔ ɖá, “Ɓě ní jɛ ɓó hwìèɔ̀ kɔ̃o.”
25Hwɛ̀ ké wa sɔ̀ ma ɖé Íjè-ɓòɖòɔ̀ kɔ̃, ké wa mu ma wa ɓǎ Jékɔ̀ gbo ɖé Kénà-ɓòɖòɔ̀ kɔ̃. 26Ké wa cɛ̃ɛ ma wa ɓǎ gbo, ké wa ɖá, “Jòsé nì cĩ́ɛń ke wà! Ké ɓó kɔ̃in ɖeɛɛ, ɔ mɔ̀ Íjè-ɓòɖò gànáɔ̀ wuɖuí-kɔ̃̀-nyɔ̀o.” Ti ɓɛ́ Jékɔ̀ wɔ̃́ɔ ma kɛɛ, dĩin-dɔ̃ kpɔ̃ ma ɔ kɔ̃, sepóɛɖé ɖɛ nìà kɛ se ma ɔ xwíníín kpá. 27Kɛɛ ti ɓɛ́ wa cɛ̃ ma ɖɛ séín ɓɛ́ Jòsé cɛ̃ ma wa gboɛɛ ɔ gbo, ké ɔ dyé ma hwíì-sǒ vɛ̀nɛ̀ ɓě ɓɛ́ Jòsé ɖoɓo ma, ɓɛ́ wa ké ma ɔ kpaa, púɛɛ, ɔ hwòɖǒɔ̀ kpá ma kpéí. 28Hwɛ̀ ké ɔ cɛ̃ɛ ma, ké ɔ ɖá, “Ní hwòɖǒ ɖǎ dyi dè. Ní dyú Jòsé nì cĩ́ɛń ke jǎà. Ní mu muùn, ɓɛ́ ḿ ké ɔ dyéɖéí dè, hwɛ̀ ɓɛ́ ḿ ké mɛ́.”
Tans Gekies:
Jɛ́nɛ́sì 45: ƁB02
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Bassa Bible © Bible Society Liberia, 2002.
