Jɛ́nɛ́sì 44
44
Bɛ̃́címà zaa-dyé-dyé
1Sɔ̀ìn ɓóɛ gboɛɛ, Jòsé cɛ̃ɛ ma ɔ gbo-nì-nyɔ̀ vɛ̀nɛ̀ɔ̀ gbo, ké ɔ ɖá, “Po ɖii-ɖɛ̀ jĩ̀ kà ɓɛ́ gàa ɓěɔ̀ ɓɛ́ìn ɓéɖéɛ kɛɛ ɖé waà ɓɔ̀ɔ̌ ɓěɔ̀ mú, ɓɛ́ m̀ ké waà wíɖí ɓěɔ̀ ɖé waà ɓɔ̀ɔ̌ ɓěɔ̀ mú po ɖe ɖò-ɖò séín. 2Ɔ ɖà ná nìǐn, m̀ mɛ po ní séɓàɖà-kòpòɔ̀ ɖé nyɔ dyùwèɔ̀ nììn ɓɔ̀ɔ̌ɔ̀ mú, ɔ kè ɔ nììn wíɖíɔ̀ ɖekè.” Ké gbo-nì-nyɔ̀ vɛ̀nɛ̀ɔ̀ nyu ma ɖɛ Jòsé cɛ̃ ma kà ɔ gboɛ. 3Ti ɓɛ́ zɔ̃ zɔ̃ ma nyɛ̀nɛ̀ɛ̀ kɛɛ, wa cuò ma gàa ɓěɔ̀, ké wa kè waà jǎkasì ɓěɔ̀ kpá ma hwìè xwíníín. 4Ti ɓɛ́ wa séè ma dà vɛ̃in mu keɛɛ, Jòsé cɛ̃ɛ ma ɔ gbo-nì-nyɔ̀ vɛ̀nɛ̀ɔ̀ gbo, ké ɔ ɖá, “Kpá gàa ɓěɔ̀ kíɖíí wàɖà. Ɔ jǔ ké m̀ ɖǎ wa dyɛ̀ìn ní, diè wa dyi, ɓɛ́ m̀ ké níiń, ‘Ɖɛ́ kɔ̃̀ jè ɓě pɛ́ɛ̀àìn ɖɛín-ɖɛ̀ɔ̀ ɖɛ gbà ɖe kɛ́? Ɖɛ́ kɔ̃̀ jè ɓě dyíɖíà ní gbo-nì-ɓǎà séɓàɖà-kòpòɔ̀ kɛ́? 5Má, kópòɔ̀ mɔ̀ ɖɛ ní gbo-nì-ɓǎɔ̀ náìn mú, ké ɔ mɔ̀ ɖɛ ɔ pòìn sɛ̀ɛ̀ múe? Ɖɛ ɓě nyuà kɛɛ mɔ̀ hwòɖǒ-kɔ̃in-nyìnììn-ɖɛ̀.’ ”
6Ti ɓɛ́ gbo-nì-nyɔ̀ vɛ̀nɛ̀ɔ̀ dyɛ̀ìn ma wa kɛɛ, ɔ zaìn ma ɖɛ ɓěɔ̀ wa gbo kɔ̃in. 7Kɛɛ wa ɖá, “Ɓɔ̌ɔ̀, ɖɛ́ kɔ̃̀ jè m̀ cɛ̃à ɖɛ nì kàà kɛ́? Hée, ɔ se ná nì fɔɔ, ɓɛ́ à mɔ̀à nì gbo-nì-nyɔ̀ ɓěɛ̀ kɛɛ ké ɖɛ nì kàà nyuɛ. 8Má, wíɖí ɓě ɓɛ́ wa sè ma ɖé à ɓɔ̀ɔ̌ ɓěɔ̀ mú, ɓɛ́ à dyiɛ ma ɖéɛ Kénà-ɓòɖòɔ̀ kɔ̃ kpa kɛɛ, à dyàà ma ɖee? Kà ɔ nìà náa, nìí, ɖɛ́ kɔ̃̀ jè à kéà séɓàɖà mɔɔ góò ɖò ɖé nì gbo-nì-ɓǎɔ̀ gbǒɔ̀ mú dyíɖí kɛ́? 9Ɔ jǔ ké m̀ dyiɛ à mɔ̀à nì gbo-nì-nyɔ̀ ɓěɛ̀ kɛɛ ɖò xwa dyé ní, nìí, nyɔɔ̀ mɛ mɛ́, nìí, ɓɛ́ à nyɔ ɓě sè ɓóɛɛ ké nì gǐì jǔ.”
10Ké gbo-nì-nyɔ̀ vɛ̀nɛ̀ɔ̀ ɖá, “Ḿ wɔ̃́ ní, kɛɛ nyɔ ɓɛ́ ní muɛ xwa dyéìn nyɛɛ mɔ̀ nyɔ mu ní gǐìɔ̀ jǔùn, ké ɓě nyɔ ɓě sè ɓóɛɛ, zaaɔ̀ se ɓě kpɔ̃ɔ́ mu.” 11Hwɛ̀ ké wa séín dè ma gbɛ̌ dyi wàɖà, ké wa kaà ma wa dyí. 12Ké gbo-nì-nyɔ̀ vɛ̀nɛ̀ɔ̀ dè ma waà ɓɔ̀ɔ̌ ɓěɔ̀ múin gmɔìn gbɔ. Ɔ dèìn ma ɖé nyɔ vɛ̀nɛ̀ɔ̀ gbo gbɔ, ké ɔ jàɖàìn ma ɖéɛ nyɔ dyùwèɔ̀ gbo dúí. Púɛɛ, ɔ dyé ma kópòɔ̀ ɖé Bɛ̃́címà nììn ɓɔ̀ɔ̌ɔ̀ mú. 13Ti ɓɛ́ ɖɛ nìà kɛ nì ma náa, púɛɛ, wa séín fáìn ma wa mìɔùn ɖɔún dyi. Ké wa po ma waà gbɛ̌ ɓěɔ̀ jǎkasì ɓěɔ̀ kɔ̃ún, ké wa mu ma ɖé hwɔɖɔɔ̀ mú ɖe.
Júɖà ɓaà Bɛ̃́címà jè
14Ti ɓɛ́ Júɖà kè ɔ ɖíí-gàà ɓěɔ̀ nyini ma ɖé Jòsé ɓíɖí-taún ɖeɛɛ, púɛɛ, ɔ nì ma ɖé ke. Wa dyi, ké wa kpá ma ɓó ɔ ɓo zɔ̃̌ dyi. 15Hwɛ̀ ké Jòsé diè ma wa dyi, ké ɔ ɖá, “Ɖɛ́ mɔ̀ ɖɛ ɓě nyuà kɛɛ xwíníín nyɛ́? Ɓě seɛ dyuò kà mɔ̄ mɔ̀à nyɔ-wuɖuí-kɔ̃̀-nyɔ̀ɔ̀ kɛɛ, ḿ ɓɛ́ìn ɖɛ dyí dyuòɛ̀ dyììn ɖé sɛ̀ɛ̀-po-po múɛɛ̀?”
16Hwɛ̀ ké Júɖà zà ma ɖé wuɖu, ké ɔ ɖá, “Xwɛ̌ à mɛ ɖáá, ɓɔ̌ɔ̀? Xwɛ̌ à mɛ ɖáá? Ɖɛ́ ɓɛ́ìn nyɔǔn dyí tɛ̀mɛ̀ìn ɖe kà zaaɔ̀ se à kpɔ̃ kɛ́? Gèɖèpɔ́ɔ̀ ɖǎ à mɔ̀à nì gbo-nì-nyɔ̀ ɓěɛ̀ kɛɛ zaa-dúún-wáɖá-wáɖáɔ̀ feɖe kɔ̃in zà. À kè nyɔ ɓɛ́ wa kpɔ̃̀àìn kópòɔ̀ xwaún wɛ̃ɛ mɔ̀ǎ nì gǐì ɓěo, ɓɔ̌ɔ̀.”
17Kɛɛ Jòsé ɖá, “Hée, ḿ se ɖɛ nì náa nyuɛ ɓɛ́ìn. Nyɔ ɓɛ́ wa kpɔ̃̀àìn kópòɔ̀ xwaún wɛ̃ɛ ɖòùn mu ní gǐìɔ̀ jǔùn. Kɛɛ ɓě nyɔ ɓě sèà ɓó ɖeɛɛ mɛ mu ɓě ɓǎ gbo ɖe ɖé gìɖìǐ mú.”
18Hwɛ̀ ké Júɖà xwɛ̃́ìn ma ɔ bũ̌in, ké ɔ ɖá, “Ɓɔ̌ɔ̀, m̀ kè Féwòɖò kpé ɓɛ́ìn ní dyɛo, kɛɛ ní ɓaà m̀ ní, ní mɔ́ ḿ ké m̀ ɖɛ ɖò gbo cɛ̃ kɛbì ḿ mɛ se ɖɛ kpa kɛ. Ɓɔ́ mɔ̄ mɔ̀à nì gbo-nì-nyɔ̀ɔ̀ kɛɛ dyoɖoún kpáìn. 19Ɓɔ̌ɔ̀, m̀ diè ma à dyi kɛbì à ɓéɖé ɓǎ mɔɔ ɖíí-gàà ɖò ní. 20Ké à jǔ ma m̀ gɔ̃̌, ké à ɖá, ‘À ɓéɖé ɓǎ sùà kè ɖíí-gàà dyùwè ɖò ɓɛ́ ɔ wóɖóìn ma, ti ɓɛ́ ɔ ɖǎ ma nyɛ kɛ. Gàa-dyù gmɔ̀ɔ̀ ɖíí-gàà ɓɛ́ ɔ kèɔ̀ wóɖó ɖɛ̌ǐn nyɛɛ ɖǎ mɛ́, ké ɔ ɖòùn mɔ̀ nyɔ sèǎ sɔ̀ìn ɖé ɔ ɖe xwíníín, ké à ɓǎ ɖɛ̀ɓɛ̀ ɔ mú mìɔ cá.’ 21Hwɛ̀ ké m̀ cɛ̃ɛ ma à mɔ̀à nì gbo-nì-nyɔ̀ ɓěɛ̀ kɛɛ gbo, ké m̀ ɖá, ‘Ɓě dyà ɔ ḿ gbo, ɓɛ́ ḿ mìɔùn ké ɔ dyé.’ 22Kɛɛ à cɛ̃ɛ ma m̀ gbo, ké à ɖá, ‘Ɓɔ̌ɔ̀, dyúɔ̀ se à ɓǎ bũ̌ sɔ̀ɔ̀ ɓɛ́ìn. Ɔ dyi ná nìǐn, nìí, à ɓǎɔ̀ mu mɛ́ìn.’ 23Kɛɛ m̀ cɛ̃ɛ ma à mɔ̀à nì gbo-nì-nyɔ̀ ɓěɛ̀ kɛɛ gbo, ké m̀ ɖá, ‘Ɔ jǔ ké ɓě kè ɓěɛ̀ ɖíí-gàà dyùwèɔ̀ se dyi ní, nìí, ɓě se ní dyúa dyéɛ mu ɖe fɔɔ cá.’
24“Ti ɓɛ́ à mu ma ɖé nì gbo-nì-nyɔ̀ mɔ̀à à ɓǎ kɛɛ gbo ɖeɛɛ, à cɛ̃ ma ɖɛ m̀ cɛ̃ ma kà à gboɛɛ ɔ gbo. 25Hwɛ̀ ké à ɓǎ ɖá, ‘Ɓě mu ɖé ɖe, ɓɛ́ ɓě ké à bìì ɖii-ɖɛ̀ wè dɔ̃.’ 26Kɛɛ à ɖá, ‘À se ɖé ɖe muɛ ɓɛ́ìn, ɔ sèìn à kè à ɖíí-gàà dyùwèɔ̀ mu dyɛ hwɛ̀, sepóɛɖé à se gàaɔ̀ dyúa dyéɛ ɓɛ́ìn, ɔ sèìn à ɖíí-gàà dyùwèɔ̀ nì dyɛ à hwìɛ̀ hwɛ̀.’ 27Kɛɛ nì gbo-nì-nyɔ̀ mɔ̀à à ɓǎɔ̀ kɛɛ cɛ̃ɛ ma à gbo, ké ɔ ɖá, ‘Ɓě dyuò kà ḿ kè ní gmààɔ̀ wóɖóìn ma gàa-dyù sɔ̃́ kɛ. 28Dyúáɖò sɔ̀ ma ɓó ḿ bũ̌, ké ḿ ɖá, “Dyoɖo-nìmìì ɖò ɖǎ ɔ dyi fáìn jǎà jɛ́ɛ́.” Sɔ̀ìn ɓóɛ gboɛɛ, ḿ se ɔ dyé ɖe. 29Ɔ jǔ ké ɓě dyi ḿ nyɔ nìà kɛ mɔ̀ùn bũ̌ zà ɖe, ké ɖɛ gbà ɖò dyi ɔ nyu ní, nìí, ɓě muɛ nyuùn ɓɛ́ wìì ké mɔ̄ dyùì ɖǎà dúún kpá kĩ́ín nyɛɛ ɖáɓá.’
30-31“Ɓó kàǔn wɛ̃ɛ, ɔ jǔ ké à dyi nì gbo-nì-nyɔ̀ mɔ̀à à ɓǎɔ̀ kɛɛ gbo ɖe mu, ké ɔ dyiɛ dyé kà ɔ dyúɔ̀ se à hwìɛ̀ nìɛɛ ní, nìí, ɔ mu mɛ́ìn, sepóɛɖé ɔ fɛ̀ɛ̀ɔ̀ ɓá ɔ dyúɔ̀ nììn fɛ̀ɛ̀ dyí. Ɔ dyi ná nìǐn, nìí, à muɛ nyuùn ɓɛ́ wìì ké à ɓǎ dyùì ɖǎà dúún kpá kĩ́ín nyɛɛ ɖáɓá. 32Mɔ̄ mɔ̀à nì gbo-nì-nyɔ̀ɔ̀ kɛɛ cɛ̃ɛ ma ḿ ɓǎ gbo kà ní mu gàa-dyùɔ̀ ɔ gbo ɖe kpaùn ɖé gìɖìǐ múɛ. Ḿ ɖi wuɖu kà ɔ jǔ ké ḿ se ɔ ɖe kpa ní, nìí, mɔ̄ muɛ kpa dyí ɖúùn ɖé ɔ dyéɖéín ɖé ní fɛ̀ɛ̀-wè séín múɛ. 33Ɔ jèɛɛ, ɓɔ̌ɔ̀, ní ɓaà m̀ ní, ɓó kàǔn wɛ̃ɛ, ḿ mɛ mɔ̀ gǐìɔ̀ ɓó gàa-dyùɔ̀ bɛ̃̌ǐn, ɓɛ́ m̀ ké ɔ dyi táà, ɓɛ́ ɔ kè ɔ ɖíí-gàà ɓěɔ̀ ké ɖe mu. 34Ɔ jǔ ké ɔ dyúɔ̀ se à hwìɛ̀ nì ní, nìí, xwɛ̌ ní mu ḿ ɓǎ dyúa muɛ nyuùn wɛ̃́? Ɓɔ̌ɔ̀, ḿ se mɔ́ ɓɛ́ ɖɛ gbà ɖò ké ḿ ɓǎ gbo kpá.”
Tans Gekies:
Jɛ́nɛ́sì 44: ƁB02
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Bassa Bible © Bible Society Liberia, 2002.
