Jɛ́nɛ́sì 46
46
Jékɔ̀ mu ɖé Íjè-ɓòɖòɔ̀ kɔ̃
1Púɛɛ, Éézùɖùɛ̀ kè ɔ nyɔ séín ɓěɔ̀ kpá ma hwìè xwíníín. Ti ɓɛ́ wa nyini ma ɖé Bèsíɓà-pàɔ̀ múɛɛ, ɔ zà ma sáa ɖé ɔ ɓǎ Áázèɛ̀ Gèɖèpɔ́ɔ̀ gbo. 2Ké Gèɖèpɔ́ɔ̀ wùɖù ma ɔ gbo ɖé dya-dya mú ɓó máaún, ké ɔ ɖá, “Jékɔ̀, Jékɔ̀!”
Ké Jékɔ̀ ɖá, “Dyòo.”
3Ké ɔ ɖá, “Mɔ̄ mɔ̀ Gèɖèpɔ́ɔ̀ mɔ̀à m̀ ɓǎà Gèɖèpɔ́ɔ̀ kɛ. Ɓɔ́ fɛ̃̀ìn ɓó Íjè-ɓòɖòɔ̀ kɔ̃ mu jè, sepóɛɖé ní mu ɖé m̀ ɓóɖó-dù vɛ̀nɛ̀ ɖò mú nyuùn. 4Ḿ kè mɔ̀ mu ɖé Íjè-ɓòɖòɔ̀ kɔ̃ muùn, ké ní mu nì xwíníín-dyù ɓěɔ̀ ɖe dyàùn. Ti nì mu mɛ́iń nììn nyɛɛ, Jòsé mu ɓó dyi gã̀ùn.”
5Hwɛ̀ ké Jékɔ̀ sɔ̀ ma ɓó Bèsíɓà-pàɔ̀ mú dyí. Ɔ dyú-gàà ɓěɔ̀ po ma ɔ kè waà dyú mɛ́nɛ́ɛ́ ɓěɔ̀ kè waà gmàà ɓěɔ̀ hwíì-sǒ vɛ̀nɛ̀ ɓě ɓɛ́ Féwòɖò ɖoɓo ma kà, ɓɛ́ wa kéà wa kpaa mú. 6Wa kpa ma waà nyúà-ɖɛ̀ ɓěɔ̀ kè waà kɔ̃̀ɔ̀-ɖɛ̀ séín ɓɛ́ wa dyé ma ɖé Kénà-ɓòɖòɔ̀ kɔ̃ɛ. Ké Jékɔ̀ kè ɔ xwíníín-dyù séín ɓěɔ̀ mu ma ɖé Íjè-ɓòɖòɔ̀ kɔ̃. 7Ɔ kpa ma ɔ dyú ɓěɔ̀ kè ɔ nyúà-dyú séín ɓěɔ̀ ní.
8-9Éézùɖùɛ̀-dyù ɓě mɔ̀à Jékɔ̀ɛ̀ xwíníín-dyù ɓě mu ma kà ɖé Íjè-ɓòɖòɔ̀ kɔ̃ɛɛ, wa kɛà kɛ̀. Wuɖuɓíín mɔ̀à nyíɔ́-dyùɔ̀ kɛɛ nììn dyú ɓěɔ̀ kɛà kɛ̀: Hánɔ̀ kè Páɖù kè Hɛ́wɔ̀ɖɔ̀ùn ɔ kè Kámì. 10Ké Símìɔ̀ nììn dyú ɓěɔ̀ kɛà kɛ̀: Jɛ̀múè kè Jámì kè Óhà kè Jákììn kè Zóhà ɔ kè Sádyù. Sádyù mɔ̀ Kénà-màà ɖòɛ̀ dyú. 11Ké Ɖíìváà nììn dyú ɓěɔ̀ kɛà kɛ̀: Gésɔ̀ùn kè Kóhà ɔ kè Mɛ̀wáɖáwìɖì. 12Ké Júɖà nììn dyú ɓěɔ̀ kɛà kɛ̀: Ɛ́ɛ̀ kè Ónà kè Séɖà kè Pɛ́wɛ̀ɖɛ̀ ɔ kè Zɛ́wàɖà. Kɛɛ Ɛ́ɛ̀ kè Ónà mɛ́ìn ma ɖé Kénà-ɓòɖòɔ̀ kɔ̃. Pɛ́wɛ̀ɖɛ̀ nììn dyú ɓěɔ̀ mɔ̀ Hɛ́wɔ̀ɖɔ̀ùn kè Hámù. 13Ké Ɛ́sàkà nììn dyú ɓěɔ̀ kɛà kɛ̀: Tóɖà kè Púà kè Jásù ɔ kè Sĩ́wɔ̀nɔ̀. 14Ké Zɛ́ɓíúɖɔ̀ùn nììn dyú ɓěɔ̀ kɛà kɛ̀: Sɛ́wɛ̀ɖɛ̀ kè Éɖɔ̀ùn ɔ kè Jáɖèò. 15Kǎà dyú ɓě wóɖó ma ɖé Jékɔ̀ kè Ɖéà xwíníín ɖé Páɖàùn-Áwàɖàùn-ɓòɖòɔ̀ kɔ̃ ɓó waà dyú-màà Dánà wáún wɛ̃ɛ nyu ma jĩ̀ɛ̀. Wa séín mɔ̀ ma nyɔ kpáɖá-nyɔ ɓaɖa-bùè sè tã.
16Ké Gáà nììn dyú ɓěɔ̀ kɛà kɛ̀: Zɛ́fɔ̀ùn kè Hágì kè Súnì kè Ɛ́ɓɔ̀ùn kè Éwìɖì kè Àwóɖóɖì ɔ kè Àwéɖéɖì. 17Ké Ásè nììn dyú ɓěɔ̀ kɛà kɛ̀: Ímànà kè Ívà kè Ívì ɔ kè Bɛ̀wíɖíà. Waà ɖíí-màà nyɛ́nɛ́ mɔ̀ Sɛ́wàɖà. Bɛ̀wíɖíà nììn dyú ɓěɔ̀ mɔ̀ Hɛ́ɓɛ̀ kè Mààkíè. 18Kǎà dyú ɓě wóɖó ma ɖé Jékɔ̀ kè Zíópà mɔ̀à gbo-nì-màà ɓɛ́ Ɖéɓɛ̀ìn nyí ma kà ɔ dyú-màà Ɖéà kɛɛ xwíníín nyɛɛ nyu ma jĩ̀ɛ̀. Wa séín mɔ̀ ma nyɔ ɓaɖa-bùè sè mɛ̀nɛ̌ìn-ɖò.
19Jékɔ̀ gmàà mɔ̀à Wéɖécà kɛɛ nììn dyú ɓěɔ̀ mɔ̀ Jòsé kè Bɛ̃́címà. 20Ké Jòsé wóɖóìn ma Mànásì kè Ífèɖèìn ɖé Íjè-ɓòɖòɔ̀ kɔ̃. Ɔ kè Àsénà mɔ̀à Pɔ̀tífɛ́wàɖà dyú-mààɔ̀ kɛɛ wóɖóìn ma wa. Pɔ̀tífɛ́wàɖà mɔ̀à Ɔ́ùn-hwɔ̀ɖɔ̀ɔ̀ sáa-zà-nyɔ̀ɔ̀ kɛ̀. 21Ké Bɛ̃́címà nììn dyú ɓěɔ̀ kɛà kɛ̀: Bɛ́ɖà kè Bɛ́kɛ̀ kè Ásíɓèò kè Géwàɖà kè Néémà kè Éhì kè Wóɖósì kè Múpììn kè Húpììn ɔ kè Áɖì. 22Kǎà dyú ɓě wóɖó ma ɖé Wéɖécà kè Jékɔ̀ xwíníín nyɛɛ nyu ma jĩ̀ɛ̀. Wa séín mɔ̀ ma nyɔ ɓaɖa-bùè sè hĩinyɛ.
23Ké Dɛ̃́ìn nììn dyúɔ̀ mɔ̀ Húsììn. 24Ké Náfátàɖì nììn dyú ɓěɔ̀ kɛà kɛ̀: Jàzíè kè Gúnì kè Jézɛ̀ ɔ kè Síɖɛ̀ìn. 25Kǎà dyú ɓě wóɖó ma ɖé Jékɔ̀ kè Bíóhà mɔ̀à gbo-nì-màà ɓɛ́ Ɖéɓɛ̀ìn nyí ma kà ɔ dyú-màà Wéɖécà kɛɛ xwíníín nyɛɛ nyu ma jĩ̀ɛ̀. Wa séín mɔ̀ ma nyɔ mɛ̀nɛ̌ìn-sɔ̃́.
26Nyɔ séín ɓě mɔ̀ ma Jékɔ̀ɛ̀ xwíníín-dyù ɓě ɓɛ́ ɔ kè wa mu ma kà ɖé Íjè-ɓòɖòɔ̀ kɔ̃ɛɛ mɔ̀ ma nyɔ kpáɖá-nyɔ tã sè mɛ̀nɛ̌ìn-ɖò. Ɔ dyúɛ̀ gmàà ɓěɔ̀ se ma ɖé kpá. 27Dyú sɔ̃́ ɓě ɓɛ́ Jòsé wóɖóìn ma kà ɖé Íjè-ɓòɖòɔ̀ kɔ̃ɛ kè Jékɔ̀ kè Jòsé mìɔùn dyi ɓó kpá ní, nìí, Jékɔ̀ɛ̀ gbǒ-xwíníín gàná nì ma kà ɖé Íjè-ɓòɖòɔ̀ kɔ̃ɛɛ mɔ̀ ma nyɔ kpáɖá-nyɔ tã ɓaɖa-bùè.
Jékɔ̀ kè ɔ gbǒ-xwíníín-nyɔ̀ ɓěɔ̀ nyini ɖé Gósɛ̃̀ìn-pàɔ̀ mú
28Hwɛ̀ ké Jékɔ̀ ɖoɓo ma Júɖà dyúa ɖé Jòsé gbo, ɓɛ́ ɔ ké ma wa hwìè mu ɖé Gósɛ̃̀ìn-pàɔ̀ múɛɛ da zàìn. Ti ɓɛ́ Júɖà ɖǎ ma wa gbo ɖe dyiɛɛ, wa mu ma ɖé Gósɛ̃̀ìn-pàɔ̀ mú. 29Ké Jòsé naɓaà ma ɔ hwíì-sǒɔ̀, ké ɔ mu ma ɔ ɓǎ Éézùɖùɛ̀ hwìǐ ɖé Gósɛ̃̀ìn-pàɔ̀ mú. Ti ɓɛ́ wa gmɔ̌ìn ma kɛɛ, Jòsé kpá ma ɔ ɓǎ ɖɔ, ké ɔ po ma kpé kpã́ún cá. 30Hwɛ̀ ké Éézùɖùɛ̀ cɛ̃ɛ ma Jòsé gbo, ké ɔ ɖá, “Ɓó kàǔn wɛ̃ɛ, ḿ ɖǎ ti dyé, ɓɛ́ ḿ kéá mɛ́, sepóɛɖé ḿ mìɔùn ɖǎa dyé kà m̀ nì cĩ́ɛń keɛ.”
31Hwɛ̀ ké Jòsé cɛ̃ɛ ma ɔ ɖíí-gàà ɓěɔ̀ kè ɔ ɓǎà gbǒ-xwíníín gànáɔ̀ gbo, ké ɔ ɖá, “Ní mu muùn, ɓɛ́ ḿ kéɛ Féwòɖò gbo cɛ̃, ɓɛ́ ḿ ké níiń, ‘Ní ɖíí-gàà ɓěɔ̀ kè ḿ ɓǎà gbǒ-xwíníín, ɓɛ́ wa cĩ́ ma kà ɖé Kénà-ɓòɖòɔ̀ kɔ̃ɛɛ ɖǎ nɔ̄ ḿ gbo dyi. 32Kɛɛ gàa ɓěɔ̀ mɔ̀ nyúà-ɖɛ̀-po-nyɔ̀, ké wa ɖǎ waà nyúà-ɖɛ̀ ɓěɔ̀ kè waà kɔ̃̀ɔ̀-ɖɛ̀ séín dyà.’ 33Ɔ jǔ ké Féwòɖò dyi ɓě ɖá, ké ɔ dyi ɓě dyi diè, ké ɔ dyi níiń, ‘Ɖɛ́ mɔ̀ ɓěɛ̀ nyuu-kũ̀à kɛ́?’ ní, 34nìí, ɓě mɛ ɖá, ‘À mɔ̀à nì gbo-nì-nyɔ̀ ɓěɛ̀ kɛɛ, à mɔ̀ nyúà-ɖɛ̀-po-nyɔ̀ ɓě sɔ̀ìn ɖé à dyú-gbɔ́ɔ́-tì mú. Kǎà à ɓǎ ɓě nì ma.’ Ɔ dyi ná nìǐn, nìí, ɔ mu wɔ̃́ùn ɓɛ́ ɓě ké nɔ̄ Gósɛ̃̀ìn-pàà mú cĩ́. Sepóɛɖé nyúà-ɖɛ̀-po-nyɔ̀ ɓě nyàìn Íjè-nyɔ̀ ɓěɔ̀ dyi.”
Tans Gekies:
Jɛ́nɛ́sì 46: ƁB02
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Bassa Bible © Bible Society Liberia, 2002.
