Jɛ́nɛ́sì 47
47
1Hwɛ̀ ké Jòsé sɔ̀ ma dyí, ké ɔ mu, ké ɔ cɛ̃ɛ ma Féwòɖò gbo, ké ɔ ɖá, “Ḿ ɓǎ kè ní ɖíí-gàà ɓěɔ̀ kè waà nyúà-ɖɛ̀ ɓě kè waà kɔ̃̀ɔ̀-ɖɛ̀ séín ɖǎ ɖé Kénà-ɓòɖòɔ̀ kɔ̃ sɔ̀, ké wa ɖǎ dyi, ké wa nì ɖé Gósɛ̃̀ìn-pàɔ̀ mú ɓó kàǔn.” 2Ké ɔ ɖú ma ɔ ɖíí-gàà ɓěɔ̀ hm̀m̌ dyí, ké ɔ kpa ma wa, ɓɛ́ Féwòɖò ké ma wa dyé. 3Ké Féwòɖò diè ma wa dyi, ké ɔ ɖá, “Ɖɛ́ mɔ̀ ɓěɛ̀ nyuu-kũ̀à kɛ́?”
Ké wa ɖá, “À mɔ̀à nì gbo-nì-nyɔ̀ ɓěɛ̀ kɛɛ mɔ̀ nyúà-ɖɛ̀-po-nyɔ̀ ɓě. Kǎà à ɓǎ ɓě nì ma. 4À dyi, ɓɛ́ à ké nɔ̄ cĩ́ ɓó ti wè mú, sepóɛɖé mɔ́ɔ̀ ku wɔ̃ mìɔ ɖé Kénà-ɓòɖòɔ̀ kɔ̃, ké à nyúà-ɖɛ̀ ɓěɔ̀ ní dyé ɖii-pìǐ ɖò ɖe. Ɔ jèɛɛ, à ɓaà m̀ ní, ɓɔ̌ɔ̀, à mɛ cĩ́ ɖé Gósɛ̃̀ìn-pàɔ̀ mú.”
5Ké Féwòɖò cɛ̃ɛ ma Jòsé gbo, ké ɔ ɖá, “M̀ ɓǎ kè nì ɖíí-gàà ɓěɔ̀ ɖǎ m̀ gbo dyi. 6Íjè-ɓòɖòɔ̀ nìàǒ wɛ̀. Nyí m̀ ɓǎ kè nì ɖíí-gàà ɓěɔ̀ ɓóɖóɔ̀ dɛ̀ nɔ̀mɔ̀ dyíin nyɛ. Wa mɛ cĩ́ ɖé Gósɛ̃̀ìn-pàɔ̀ mú. Ɔ jǔ ké nyɔ ɖò dyi ɖé wa hwìɛ̀ nì, ké ɔ dyi nyúà-ɖɛ̀ dyí gmɔ̀ɔ̀ dyuò nɔ̀mɔ̀ dyíin ní, nìí, m̀ mɛ zàìn ḿ mìɔùn nììn nyúà-ɖɛ̀ ɓěɔ̀ ɔ xwáɖáún.”
7Hwɛ̀ ké Jòsé dyà ma ɔ ɓǎ Jékɔ̀ ɓó Féwòɖò dyúa. Ké Jékɔ̀ zà ma Féwòɖò nyíɔún. 8Ti ɓɛ́ Féwòɖò dyéɛ ma kà Jékɔ̀ ɖǎ ma nyɛ mìɔ kɛɛ, púɛɛ, ɔ diè ma ɔ dyi, ké ɔ ɖá, “Zɔ̃ jĩ̀ xwɛ̌ m̀ nyuà kɛ́?”
9Ké Jékɔ̀ ɖá, “Zɔ̃ jĩ̀ kà ḿ nyuá nɔ̄ ɓóɖó-kpàà kɔ̃ɛɛ mɔ̀ǎ zɔ̃ hɔ̃dɛ̀ɖɛ̀ ɖò kè kpáɖá-nyɔ ɓaɖa-bùè. Ní zɔ̃ ɓěɔ̀ se dyí vò, ké fũ̀à-fṹá ɓáún-ɓáún dyí ɖéɛ mú. Wa kè ḿ ɓǎ ɓě nììn zɔ̃ jĩ̀ kà wa nyu nɔ̄ ɓóɖó-kpàà kɔ̃ɛɛ se mú jĩìn.” 10Ké Jékɔ̀ po ma Féwòɖò hwuɖu ɖǎ hwɔ, ké ɔ sí ma píé. 11Hwɛ̀ ké Jòsé nyí ma ɔ ɓǎ kè ɔ ɖíí-gàà ɓěɔ̀ cĩ́-naín ɖé Íjè-ɓòɖòɔ̀ kɔ̃. Ɔ nyí ma wa ɓóɖóɔ̀ dɛ̀ nɔ̀mɔ̀ dyíin kà Féwòɖò nyuɛ ma kà ɔ gbo cɛ̃ɛ kɛ. Ɔ nyí ma wa Wàɖàmísì-gbɛ̌ɛ̀ gànáɔ̀. 12Ké Jòsé nyí ma ɔ ɓǎ kè ɔ ɖíí-gàà ɓěɔ̀ kè ɔ ɓǎà gbǒ-xwíníín gànáɔ̀ ɖii-ɖɛ̀ kà wa nyu ma jĩ̀ɛ̀ kɛ.
Mɔ́ vɛ̀nɛ̀ɔ̀
13Ɓó tia ɓaɖaa, mɔ́ɔ̀ ku ma wɔ̃ mìɔ jèɛɛ, ɖii-ɖɛ̀ ɖò se ma ɓóɖóɔ̀ dà ɖò nì. Íjè-ɓòɖòɔ̀ kè Kénà-ɓòɖòɔ̀ nì ma dyíin nyìnìɛ̌n ɓó mɔ́ɔ̀ jè. 14Ké Jòsé poìn ma wíɖí séín ɓě ɓɛ́ Íjè-nyɔ̀ ɓěɔ̀ kè Kénà-nyɔ̀ ɓěɔ̀ ɖǎ ma ɖii-ɖɛ̀ mú dɔ̃ɛɛ dyí, ké ɔ dyàà ma Féwòɖò gbo. 15Ti ɓɛ́ wíɖí séínɔ̀ ɖǎ ma Íjè-nyɔ̀ ɓěɔ̀ kè Kénà-nyɔ̀ ɓěɔ̀ xwai hwɛ̀ɛ, púɛɛ, Íjè-nyɔ̀ ɓěɔ̀ dyi ma Jòsé gbo, ké wa ɖá, “À wíɖíɔ̀ ɖǎ à xwai hwɛ̀. Nyí à ɖii-ɖɛ̀, à ní kɔ̃̀ ɖà m̀ dyéɖé waí mɛ́ìn.”
16Hwɛ̀ ké Jòsé cɛ̃ɛ ma wa gbo, ké ɔ ɖá, “Kà ɓěɛ̀ wíɖíɔ̀ ɖǎà ɓě xwai hwɛ̀ɛ, nìí, ɓě tò ɓěɛ̀ nyúà-ɖɛ̀ ɓěɔ̀, ɓɛ́ ḿ ké ɓě ɖii-ɖɛ̀ nyí ɓóɛ bɛ̃̌ǐn.” 17Ɔ jèɛɛ, wa pèɖèìn ma waà nyúà-ɖɛ̀ ɓěɔ̀ Jòsé gbo ɓó ɖii-ɖɛ̀ jè. Ké Jòsé dɔ̃ ma waà sǒ ɓěɔ̀ kè ɓáɖáá ɓěɔ̀ kè wiɖi ɓěɔ̀ kè ɓìɖǐ ɓěɔ̀ ɔ kè jǎkasì ɓěɔ̀ ɖii-ɖɛ̀ mú. Kǎà Jòsé nyu ma wa zɔ̃ gànáɔ̀ ɖii-ɖɛ̀ nyíɛ ɓó waà nyúà-ɖɛ̀ séín ɓěɔ̀ bɛ̃̌ǐn.
18Ti ɓɛ́ zɔ̃ɔ̀ dyɛ mɔ̀ɔ̀ ɖǎ ma ziɛɛ, zɔ̃ɔ̀ nyɔ kɔ ma ɓó dyíɛɛ, nyɔ ɓěɔ̀ dyi ma Jòsé gbo ɖe, ké wa ɖá, “À ɓéɖé ɓɛ́ à ké m̀ jǎà gbo cɛ̃, ɓɔ̌ɔ̀. Kà ɓɛ́ à wíɖíɔ̀ ɖǎ à xwai hwɛ̀, ké à nyúà-ɖɛ̀ ɓěɔ̀ mɔ̀ǎ kà nì kɔ̃̀ɔ̀-ɖɛ̀ kɛɛ, ɖɛ ɖò se à xwa sè ɖe, ɓɛ́ à kéɛ m̀ nyío, ɓɔ̌ɔ̀, ɔ sèìn à mìɔùn kè à pá ɓě. 19Ɖɛ́ kɔ̃̀ jè à kè à pá ɓěɔ̀ kéà mú gbɔɔ̀ ɓó m̀ dyéɖé waí kɛ́? Dɔ̃ à kè à pá ɓěɔ̀ ɖii-ɖɛ̀ mú, ɓɛ́ à ké Féwòɖòɛ̀ gǐì jǔ, ɓɛ́ à pá ɓěɔ̀ ké ɔ kɔ̃̀ɔ̀-ɖɛ̀ jǔ. Nyí à ɖii-ɖɛ̀, ɓɛ́ à kéɛ ɖi, à ní kɔ̃̀ ɖà mɛ́, ɔ kè ɓáá-ɖɛ̀-dyùà, ɓɛ́ à kéɛ ɓá, ɓɛ́ à ɓóɖóɔ̀ ní kɔ̃̀ ɖà fóɖóún kpá.”
20Ɔ jèɛɛ, Jòsé dɔ̃ ma pá séín nì ma Íjè-ɓòɖòɔ̀ kɔ̃ɛɛ ɓó Féwòɖò bìì. Íjè-nyɔ̀ séín ɓěɔ̀ peɖe ma waà pá ɓěɔ̀ ní, sepóɛɖé mɔ́ɔ̀ ku ma wɔ̃ mìɔ ɓó wa bìì. Kǎà pá ɓěɔ̀ nyu ma Féwòɖòɛ̀ kɔ̃̀ɔ̀-ɖɛ̀ jǔɛ. 21Ké Jòsé nyu ma Íjè-nyɔ̀ séín nì ma ɓóɖóɔ̀ dà séín nyɛɛ gǐì mú. 22Kɛɛ ɔ se ma sáa-zà-nyɔ̀ ɓěɔ̀ nììn páɔ̀ dɔ̃, sepóɛɖé Féwòɖò nyí ma wa ɖɛ ɓě ɓɛ́ wa ké ma kɔ̃ún cĩ́ɛ, ké ɔ nyuɛ ké wa ɓéɖé ma ɖii-ɖɛ̀ ti séín. Ɔ jèɛɛ, wa se ma wa nììn páɔ̀ peɖe. 23Jòsé cɛ̃ɛ ma nyɔ ɓěɔ̀ gbo, ké ɔ ɖá, “Kà ɓɛ́ ḿ ɖǎà ɓě kè ɓěɛ̀ pá ɓěɔ̀ dɔ̃ ɓó Féwòɖò bììɛɛ, ɓě mɛ kpɔ̃ ɓáá-ɖɛ̀-dyùà ɓěɛ̀ dyi, ɓɛ́ ɓě kéɛ ɓá. 24Kɛɛ ti ɓɛ́ ɓěɛ̀ geɖe ɓěɔ̀ mu kɔ́ùn wɛ̃ɛ, ɓě mɛ geɛ dú hm̀m̌ mú, ɓɛ́ ɓě ké dú dyúáɖò Féwòɖò nyí. Ɔ dú hĩinyɛ sèà ɓóɛɛ, ɓě mɛ dèɛ̀ dyi, ɓɛ́ ɔ ké ɖii-ɖɛ̀ jǔ ɓó ɓě kè ɓěɛ̀ gbǒ-xwíníín-nyɔ̀ ɓěɔ̀ bìì, ɔ kè ɓɛ́ ɖò ké ɓáá-ɖɛ̀ jǔ ɓó zɔ̃ mu ɓó dyí kɔùn wɛ̃ɛ jè.”
25Ké nyɔ ɓěɔ̀ cɛ̃ɛ ma Jòsé gbo, ké wa ɖá, “Ɓɔ̌ɔ̀, à wɔ̃́ ní ɓɛ́ à ké Féwòɖòɛ̀ gǐì jǔ, sepóɛɖé nì hwòɖǒ ɖǎ à múin dèìn, ké m̀ ɖǎ à fɛ̀ɛ̀ɔ̀ póìn.” 26Ɔ jèɛɛ, Jòsé nyu ma ɖɛ nìà kɛ gma mú ɓá pá ɓě nì Íjè-ɓòɖòɔ̀ kɔ̃ɛɛ jè dyí. Gmaɔ̀ mɔ̀ kà ɖɛ séín mu ɖé geɖe ɓě nì ɖé Íjè-ɓòɖòɔ̀ kɔ̃ɛɛ gbo sɔ̀ùn wɛ̃ɛ, wa mɛ geɛ mú dú hm̀m̌, ɓɛ́ Féwòɖò ké dú dyúáɖò kɔ̃̀ɛ. Ké gmaɔ̀ nì ma ɖé Íjè-ɓòɖòɔ̀ kɔ̃ kánáá pū. Kɛɛ sáa-zà-nyɔ̀ ɓěɔ̀ ɖòùn nyɛ̀nɛ̀ɛ̀ kɔ̃̀ pá se ma Féwòɖòɛ̀ kɔ̃̀ɔ̀-ɖɛ̀.
Jékɔ̀ɛ̀ zɔ̀ɔ̀-ɖɛ̀ hwɛ̀ìn-gbɔɔ̀
27Ɓó tia ɓaɖaa, Éézùɖùɛ̀-nyɔ̀ ɓěɔ̀ cĩ́ ma ɖé Gósɛ̃̀ìn-pà nìà ɖé Íjè-ɓòɖòɔ̀ kɔ̃ɛɛ mú. Wa kɔ̃̀ ma ɖé ɖɛ, ké wa zaìn ma ɖé dúún, ké wa vò ma dyí mìɔ. 28Ké Jékɔ̀ cĩ́ ma ɖé Íjè-ɓòɖòɔ̀ kɔ̃ ɓó zɔ̃ ɓaɖa-bùè sè mɛ̀nɛ̌ìn-sɔ̃́ xwíníín. Ɔ jèɛɛ, zɔ̃ jĩ̀ kà ɓɛ́ Jékɔ̀ nyu ma kɛɛ mɔ̀ ma zɔ̃ hɔ̃dɛ̀ɖɛ̀ ɖò kè kpáɖá-nyɔ sɔ̃́ sè mɛ̀nɛ̌ìn-sɔ̃́. 29Ti ɓɛ́ tiɔ̀ ɖǎ ma dyi xwɛ̃́ìn, ɓɛ́ Éézùɖùɛ̀ kéá ma mɛ́ɛ, ɔ ɖá ma ɔ dyú-gàà Jòsé, ké ɔ cɛ̃ɛ ma ɔ gbo, ké ɔ ɖá, “Ní ɓaà m̀ ní, po nì sɔ̃ɔ̀ ɓó ní ɓoɔ̀ pṹa, ɓɛ́ m̀ ké wuɖu ɖi kà nì mu ḿ nɔ̀mɔ̀ dyíin kè jǎà nìà kɛ bìì nyuùn wɛ̃. Ɖɛɔ̀ mɔ̀ kà m̀ se nɔ̄ ḿ Íjè-ɓòɖòɛ̀ kɔ̃ dyóɖóún zàǐn mu kɛ. 30Kɛɛ ti ní mu ḿ ɓǎ ɓě gbo muùn wɛ̃ɛ, m̀ mɛ zà ḿ Íjè-ɓòɖòɛ̀ kɔ̃, ɓɛ́ m̀ ké ḿ kpa, ɓɛ́ m̀ ké ḿ ɓó ḿ ɓǎ ɓěɔ̀ gbo dyóɖóún zàìn.”
Ké Jòsé ɖá, “Ḿ wɔ̃́ ní. Ní mu ɖɛ m̀ cɛ̃à kɛɛ nyuùn.”
31Ké Éézùɖùɛ̀ ɖá, “Ɖi wuɖu ɓó ḿ dyúa.” Ké Jòsé ɖi ma wuɖu ɓó Éézùɖùɛ̀ dyúa. Púɛɛ, Éézùɖùɛ̀ taɓa ma dú hwuɖu ɓó ɔ gbɛɔ̀ kɔ̃, ké ɔ po ma Bounɓoɔ̀ zùo.
Tans Gekies:
Jɛ́nɛ́sì 47: ƁB02
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Bassa Bible © Bible Society Liberia, 2002.
