लूका 7
7
सुभेदारान विश्वासापोर यीशुन बोगलाणो
(मत्ती 8:5-13; यूहन्ना 4:43-54)
1जेवी ता माणहाह हि आखा वात केईन आपील एती, तेवी कफर्णहुमाम आवा. 2ताहारी कूण एक सुभेदारान एक दास जो तान मोगालो एतो, हेरयामाय मोरण्यू एतो. 3तास यीशुन चर्चा होमलील यहूदीयान काहिक डाय डायाह जी विनंती केरणे तान उगे मोकलील कि, आवीन मारो दासाला हाजो केरूह. 4ते यीशु उगे आवा एने ताह विनवणी केरीन केणेंन लागिल, “तो ज्यान योग्य हि, कि तू तान केरता ज्याच केरही, 5कारण तो आमरा जातीपूर प्रेम करने, एने ताच आराधनालयाह बोणाविल हि.” 6यीशु तान हेरी गीयो, पुण तेवी तो घेराहे-योरीन सेटो नाहं एतो, तर सुभेदाराने तान उगे जुलुम दोस्तीफायरीन केयीन मोकलील, “हे प्रभु, दुख वीसहु मां, कारण मी मी ज्या लायक नाहं, का तू मारो छत बुंदे आवही. 7ज्योच कारणाने मी तारो योग्य सोमजील कि, मी तारो उगे आवहू, पुण वचन पुण कियील तर मारो दास हाजो एय जाय. 8मी भी न्यायान अधीन माणुह हि, एने मारे अधीन मारा शिपाई हेते, जेवी मी एकाह केणे, जा, ते तो जाणे; एने दिहीराह केणे, आव, ते तो आवणे, एने कानला दासाह केणे ज्यो केरते तो करने.” 9ज्यो होमलील यीशुह आश्चर्य एय गीयू, एने तान मूय फिरावीन ता गर्दीह जी तान पासाणुच आविह एती कियेल, “मी तुमूह खेरीज किथु का, माहु इस्राएल माय भी ओहलो विश्वास कुणामाय भी देखायील नाहं.” 10एने मोकलील माणहान गिर जाइन, ता दासाला हजो किरील.
मोरीलाह जीवन दान
11थोडच दिहा बादमाय ते नाईन नावान एक नगराम गीया, तान चेला, एक मटली गेर्दी तान हेरी जात एती. 12जेवी तो नगरान फाटील आहने पोचनु, तेवी देखू, माणहे एक मुरीलाह लेईन जात एता; तो आपणो आईकने एकुच सोरो एतो, एने ती विधवा एती: एने नगरान जादा माणहे तान हेरया एता. 13तीह देखीन प्रभुह दया आवी, एने तान कियील, रेडू मां. 14तेवी तो आहने आवीन तिरडीला स्पर्श किरील; एने विसनारू थोबीन गीया, तेवी तान कियील, “हे जुवान्यो, मी तुवाह किथी हि, उठ” 15तेवी तो मोरील उठीन बोहील, एने बोलणेन लागिल: तान ताह तान आहाक उगे होपीन आपील. 16ज्यांन मुळे आखा भयभीत एय गीयू, एने ते बोगवानान महिमा केरतीन केणे लागिल, “आमरा माय एक मोठू भविष्यवक्ता उत्पन्न एनो हि, एने बोगवानान आपणो माणहांपोर कृपा दृष्टी केरील.” 17एने तान विषयी हि वात आखा यहूदीयान हि आजू बाजुवालान आखा देशाम फैलुन गीयी.
यूहन्ना बाप्तिस्मा आपणारान प्रश्न
(मत्ती 11:2-19)
18यूहन्नाहा तान चेलाह ओवतो आखा वातून सुसमाचार आपील. 19तेवी यूहन्नान आपणो चेला मायरीन दुईजानाह हादाडळीन प्रभु उगे तो फुसनेनकेरता मुकलेल का, “काय आवणार तूच हि, नाहं तर आमु दिहरा वाट देखहु?” 20ते तान आहने आवीन कियेल, “यूहन्ना बाप्तिस्मा आपणार आमूह तो फुसनेनकेरता मोकलील हि, काय आवणार तूच हि, कि आमु दिहरा वाट देखहुं?” 21तेवी तो जुलीम जाणाहा दुखा-या मायरीन एने पीडा मायरीन, एने दुष्ट आत्मा मायरीन सोडावील; एने जादा आंधलान हाजो किरील. 22एने तो ताह कियील, “जो आखो तुमूह देखील एने होमलेल हि, जाइन यूहन्नाहा केयीन आपु; आंधला देखताला एने किइल चालणु फिरुणु, कुष्ठ दुखा-यो शुद्ध केरील जातेह बैरा होमलू लागणू एने मुरील उठाळ्या जातेह एने गेरब्याह सुवार्ता होमलाळीन जातेह. 23जो मारबाराम ठोकर नाहं, खाते ता धन्य.”
24जेवी यूहन्नान मोकलील दूत जात रेणा, ओवतो यीशु यूहन्नान विषयी माणहाह केणेंन लागिल, “तुमूह जेंगलामाय काय देखणेन गीया एता? कायता आलतालो एता ता जेड्या? 25तर ओवतो तुमूह काय देखणेन गीया एता? काय कोमल फाडका पिरील माणहाह? देखू? जो भडक फाडका पिरिह एने हुख, चैन माय रेतेह, तो राज वाडाम रेतेह. 26तेव्ही अवतो काय लेखणेन गीया एता? काय काल्ही भविष्यवक्ता? हा, मी तुमूह किथु, नापून भविष्यवक्ता पुण मोठलाह. 27हा तोच हि, ज्यान विषयी लिखील हि: देखू, मी आपणो दूताना तारो ओगाण ओगाण मोखलेल, जो तारो ओगाण तारो सिडिक हेल्लीच केरूह.”
28मी तुमूह किथु कि जो बायकू तारीन जन्मले हि, तान मायरीन यूहन्नान पेक्षा मोठू कुनुस नाहं: पुण जो बोगवानान राज्यातम आतल्यान आत्या हि, तो तान पेक्षा भी मोठू हि. 29एने आखा साधारण माणहान होमलीन केर वसूल केरणारा जकात बायणो हाते पुण यूहन्नान बाप्तिस्मा आपिन बोगवानान खेरो सेमजीन लीईल. 30पुण फरीसी एने शास्त्री ज्याच ताह बाप्तिस्मान आपिन बोगवानान संकल्पाला वाया किरील.
31सेवट: मी आवु युगान माणहान उपमा कुणबी आपुह कि तो कुणान होस हि? 32तू ता आतल्या सोरा सारकोस हि जो बाजारामारीन बुहील एक दिहीराह आयडीन केणु, आमु तुमरो केरता बासुरी वाजाडील, एने तुमूह नाचना नाहं; आमु आक्रोश किरील, एने तुमूह रेडील नाहं! 33काहा यूहन्ना बाप्तिस्मा आपणार नाहं रूटू खाणे आवा नाहं अंगूररस पित आवा एने तुमूह केणु तामाय दुष्ट आत्मा हि. 34माणहान सोरो खातोपितो आवा हि, एने तुमूह केणु, देखू, हा एड्ख्यो एने दारुडा माणुह, चुंगीलेणारा एने पाप्यान हेरी हि, 35पुण ज्ञान आपणो आखा सोरा द्वारे खेरो ठेराव्यू गीया हि.
फरीसीन घेर पापी बायकूह क्षमा
36ओवता कूण एक फरीसीन ताह विनंती केरील कि तो तान हेरी जेवण केरूह, सेवट: तो ता फरीसीयान घरा माय जाइन जेवण केरणे बोहील. 37त्या नगरामायवाली एक पापी बायकू हे होमजाडीन कि तो फरीसीयान घेराम जेवण केरणे बोहील हि, संगमरमरान कुपीत सुगंधीत तेल लावील, 38एने तान पायान आहने, पासाण उभी रेयीन, रेडतेन एतालून तान पाया आवहाकेरिन भिजाळील एने आपणो मुंडान लेट्याकेरिन लागिल, एने तान पाया घडी घडी चुंबन लेईन तापोर सुगंधीत तेल लागाडील. 39हि पाहून तो फरीसी तान केरता ताह हादील एता, आपणो मोनाम विचार केरूह लागिल, “केध्दीह हा भविष्यवक्ता एयतेर याने होमजाडीन लेदो एयस कि जी हि ताह हिवणे हि ती, कूण एने कोहली बायकू हि कारण ती पापी हि.” 40यीशु ताह उत्तरू माय कियील, हे शिमोन, माहु तुवाह काही तेभी केणेन हि तो बोल्णु, हे गुरु किजी. 41“कूण एक होवकारान दुय कर्जदार एता, एक पाचशे एने दिहरो पन्नास दिनाराचा एतो. 42ताहेरया तान उगे पोटाळणे कायीच जुडील नाह, तेवी तान ताह क्षमा केरीन आपील. ज्ञान केरता तामाय कूण तासहेऱ्यो जादा प्रेम मेलील एने?” 43शिमोन उत्तर आपील, “मारो लक्षाम ते ज्याह, तान जादा सोडीन आपील. तो ताह कियील, तू हाजालूच विचार किरील हि.” 44एने ता बायकून उगे फिरीन तान शिमोनान कियील, “काय तू आवो बायकूह देखतेज हि? मी तारो घेराम आवूह पुण मारा पाय धोवनेन केरता पाणी आपील नाह, पुण ती मारा पाय आवहा केरी भिजाईल एने आपणो लेट्याकेरिन नुसेल. 45तू माहु चुंबन आपील नाहं, पुण एने मी जेव्हीरीन आवूह हि तेविरीन ती मारो पाया मुका आपणे सुळील नाहं. 46तू मारो मुंडीपोर तेल लागाडील नाहं, पुण जीन मारपायापोर सुगंधीत तेल लागाडील हि. 47ज्ञान केरता मी तुवाह किथे कि जीन पाप जादा एता, ते क्षमा एनाह, कारण जीन जुलुम प्रेम किरील; पुण ज्यान थोडोक क्षमा एय गीयो, तो जारीकुच प्रेम करने.” 48एने तान बायकू ला केयेल, “तारो पाप क्षमा एय गीयो.” 49तेवी ते माणहे तान हेरी जेवण केरणे बोह्ना एता, ते आपणो आपणो मोनाम विचार केरणे लागिल, तो कूण हि जो पापान पुण क्षमा केरीह? 50पुण तान बायकूह कियील, “तारो विश्वासान तुवाह वोचाडीन लीईल हि, शान्ति से निकलीन जा.”
Nahali (नाहाली) Bible by The Love Fellowship is licensed under Creative Commons Attribution-ShareAlike 4.0 License.