लूका 8
8
यीशुन हिक
1ता बादमाय इही एय गीयो कि यीशु बोगवानान राज्यान बारामाय सुवार्ता केतालून, नगर नगर एने गावा गावामाय फिरीन एतो, तान चेला भी ताहेर्यो रेथे एता, 2तान हेर्यो काही बायकू पुण रेथे एता तान दुखा-यो एने दुष्ट आत्मा पासून सोडावील एता, यामाय मरियम मग्दालिया नावान एक बायकू एती, तीह सात दुष्ट आत्मा पासून सोडावील एता, 3हेरोदेसान कारभारी खोजा ज्ञान बायकू योअन्ना, तोहोलोच सुस्सना, एने दिहीरा मोक्तास बायकू एता. ज्याह बायकू आपणाच वस्तु केरीन यीशु एने तान चेला ज्यान सेवा चाकरी केरतीन एता.
पेरणारान वार्ता
(मत्ती 13:1-17; मरकुस 4:1-12)
4ताहेरया नगर मायरीन माणहान गेर्दी ताफाय आवील एती, तेवी तान ताह एक वार्ता कियेल: 5“एक पेरणार बीज पेरणे निकेल्नो. पेरतालु तेवी काही वाटीन मेरे पोड गीया, एने चेंदाय गीया, एने आकाशामाय वाला चिडा वीस खाय गीया.” 6काही सापराट्यो जोमनि पोर पोडील, तो ओलावू नाह एतो, केरीन उगताच वोलीन गीया. 7काही भी काटामाय पोडील, तो दासाह पुण काटानव जेसे दाबाय गीया. 8“काही भी हाजो जोमनि पोर पोडील, ता उगिल एने शंभर पट्ट पेक्षा होवटो फोल आवा.” ज्याह वातू किथी, येतो मोठला आवाजान कियील, “ज्यानस आहने होमलानेन कान हेते तास होमलू.”
वार्तन उद्देश
(मत्ती 13:18-23; मरकुस 4:13-20)
9तान चेला ताह फुसील ओवतो वार्तानन अर्थ काय हि? 10तो ताह कियील, “बोगवानान राज्यान बारामाय रहस्य सोमज जुडील हि, पुण दिहीरा वार्ताम सोमजाडने, जानकेरता कि, ताह देखात येतो देखहुं नाहा, एने होंबलेह येतो होमजू नाहा.”
11ज्या वार्तान अर्थ ओहलो हि: का बीज ते बोगवानान वचन हि. 12जो बीज वाटी पुर पोडील एतो, तो ता माणुह हेते का वचन होमेलनू; तेवी शैतान आवीन तान मोनामरीन वचन काड लेणे, तान केरता का तो विश्वास केरणे नाहा एने तान उद्धार एणार नाह. 13जो बीज सापराठी जोमनि माय पोडील, ज्यान अर्थ ज्यो हि का माणुह ताहेरया वचन होमेलनू एने आनंदमाय ग्रहण केरणू, पुण मूला नाह देरणेन तानकेरीन विश्वास मजबूत नाहरेने केरीन तो काही वेलवर विश्वास केरणू एने परिक्षा आवी कि विश्वास मेलतांलोन नाहं. 14एने जो भी काटामाय पोडील हेते, तानकेरीन अर्थ हा हि कि, जो माणुह वचन होमेलनू, पुण ताहेरया तो आपणो वाटी जातेह, तेवी चिंता धन दौलत एने जीवनामाय हुख दुख ज्यामाय दाबीन जाणुह उपेर पक्के फोल आविह नाहं. 15एने हाजो जोमनि पोर पुडील भी ज्यान अर्थ हा, जो माणुह जा हाजो एने खेरा मोनान वचन होमेलनू, ताह तो ग्रहण पुण केरणू पोशो तो आपणो धीराने फोल आपणु.
दिवान वार्ता
(मरकुस 4:21-25)
16“कुणीबी दिवू खटला बुंदे मेलणे केरीन लागाळने नाहं, केव्ही खाटला बुंदे मेलणे नाहं, पुण ताह दिवटीपोर मेलतेन, जानकेरता जो आहने आवणे ताह उजालो जुड सेकीह. 17प्रकट एय नाहं इही; काही डाकील नाहं, एने काही उघडकीस आवूह, इही काही लिकाडील नाहं. 18जानकेरता लक्ष्य आपील होमलू? काहाकाय जाफाय हि ताह होवटो आपणे माय आवी जाफाय नाहं ताऊखीर जो देख्या हि तो पुण पासाण लीईल जाय.”
यीशुन आहाक एने बाहाक
(मत्ती 12:46-50; मरकुस 3:31-35)
19तान टायीमा यीशुन आहाक एने तान बाहाक ताफाय आवा, पुण गर्दी वजेसे तो तान आहने जाहू शकले नाहं. 20जानकेरता यीशुह कियील गीया कि, “तारी आहाक एने बाहाक बाहेर उबरीयेल हेते, ता तुवाह मीलहु इच्छिता.” 21पुण यीशु उत्तर आपील, “मारी आहाक एने मारा बाहाक ज्या हेते का, जो बोगवानान वचन होमेलनू एने तानहोस चालणु.”
वारा एने वादुणाह शांत केरणेन
(मत्ती 8:23-27; मरकुस 4:35-41)
22तेवी एक एक दिह इही एय गीयो कि तो आपणो चेला हेऱ्यो एक नावीम चेढील, एने ताह कियील, “चाला, आपु समुद्राम पुरलेउखीर जाहू.” तेवी ताह नाव सुडील. 23ताहेरया तो नाव चालाडणेन एता, यीशु हूव गीयो: समुद्रा माय वादलो, एने नावेमाय पाणी भोरणे लागिल एने तो संकटात पोडील. 24तो तान आहने आवा ताह जागे केरीन कियेल, “गुरुजी! गुरुजी! आमु बुळीहि हेते.” पोशो तो उबरील रेणू, तान वाराह एने जावटाह जुल्यो एने तो थोबना एने ता जागापूर ठावकुच एय गीयो. 25तेवी तान ताह फुसील, “का गीयो तुमरो विश्वास?” पुण ता बिईल एता एने विस्मित एय गीयो एता तो आपसामाय कियेल, “आखिर हा हि तेभी कूण जो वारा एने पाणी दुईजानाह आज्ञा आपथु, एने तो तान होमेलनू?”
दुष्टात्मा लागिल माणहाह हुदारणो
(मत्ती 8:28-34; मरकुस 5:1-20)
26पोशो तो गररसेकरान देशांम आवो, जो गलील समुद्राम पुरलेउखीर एतो. 27तोहोलोज हि तो मेरापूर उतरना नगरातील एक माणुह ताह मिलील तामाय दुष्ट आत्मा वास किरील एतो. जुलुम वेगान ताहवोर तान फाडका पेरील नाह एता, एने घेरामाय रेणू नाह एतो पुण माहामाय रेथे एतो. 28तेवी यीशुह तास देखील तो आयेडतेन तान पायान जागे आवो एने मोठला आवाजामय कियील, “हे मोठला बोगवानान सोरा यीशु! तुवाह माफायरीन काय जुवी? मी विनंती करने का माहु पीडा आपुह मां.” 29तान ता अशुद्ध आत्माह ता माणहा मायरीन बाहेर निकलनेत आज्ञा आपील, काहाकाय ता दुष्ट आत्मा माय ता माणहा जुलुम वेळा दिरील एता. ओहलो टाइम ताह हाकली केरीन बांधीन देखरेख केरीन एता पुण तो सतत तो हाकूल तोडीन इही. एने दुष्ट आत्मा ताह जेंगलामाय लीन जात इही. 30तेवी यीशु ताह फुसील, “तारो नाव काय हि?” तो कियील, सेना, काहाकाय तामाय मोक्तास दुष्ट आत्मा एता. 31तो ताह विनंती केरूह लागिल कि आमूह अथाह कुंडाम जाणेन आज्ञा आपी मा. 32ऐवी देखू, तेविरीन ता जागापूर डोंगरापुर डुकरे चेरताला एता, दुष्ट आत्मांनी विनंती केरील कि आमूह तान माय जाहू. आपज्यू तेवी तान ताहाच आज्ञा केरील. 33ता टाइम ती दुष्ट आत्मा ता माणहा मायरीन निकलीन ता डुकरांमाय रिगनी एने ती डुकरे धडक दोवळतीन जाइन ता मेरापूररीन बुंदे पुडील एने बुडीन मोरनी. 34ता डुकरे चारणारे जो काही एय गीयो तो देखहुं दोवडीन गीया, एने नगर एने गावाम जाइन ज्याविषायापूर कियील. 35एने तावाला माणहे जो एनो तो देखणेन केरीन निकेलना, एने यीशुन आहने आवीन जा माणहा मायरीन दुष्ट आत्मा निकलील एती, ता माणहाह यीशुन पाया हेर्यो फाडका पेरीन बोहील एतो, एने हाजालोच शुद्धीपूर आयील देखानो एने ज्यो देखीन आखा बिय गीया; 36तान केरता देखील ता माणहान कियील, दुष्ट आत्मा लागिल माणुह कोहलो हाजो एनो. 37ज्यापूर गररसेकरान भागामाय आखा राहिवाश्यान विनंती केरील कि तान ता जागे रीन निकलीन जाणे; कारण आखा बिईल एता. तेवी यीशु नावीम आवा एने पोशा गीयो. 38जा माणहा मायरीन दुष्ट आत्मा निकलील एता ता यीशुह विनंती केरणे लागिल माहु रेणें दी, पुण यीशु मोकेलतेन कियील, 39“घेर जाइन जो बोगवानान तार केरता किरील तो आखा किजी, तेवी तो पोशा गीयो यीशु जो काही तान केरता किरील.” तो आखा नगरांम किथी फिरील.
याईरान मोरील सोरीह एने दुखारी बायकूह जीवन दान
(मत्ती 9:18-26; मरकुस 5:21-43)
40ऐवी देखू, ताहेर्यो यीशु पोचू आवु, तेवी माणहे समुदायान तान स्वागत किरील काहाकाय तो तान वाट दिखिह एता. 41तेविरीन याईर नावान एक माणुह ताजागेन आवा तो ता ठिकाणावाला यहूदी आराधनालयने सरदार एतो तो यीशुन चरणी आवा तान आपणो घेर आवु केरीन विनंती केरील. 42काहाकाय तान बारा वर्षान सोरी मोरनी एती ताहेर्यो यीशु जात एतो तो गेर्दीम ताह चेंगरीत एता. 43तान जागापूर एक बायकू एती तीह बारा वरह्यारीन रक्तस्राव एता एतो जो काही तीन आहने एता तिने खर्च केरीन वैद्याह आपील टाकील एता पुण ती हाजी एनी नाहां एती. 44ती तान पासाण आवी एने तान फाडकान बोंडाह स्पर्श किरील तेवी तीन रक्त आवणो बंद एनो. 45तेवी यीशु केईल, तो कूण हि, जो माहु स्पर्श किरील हि ता आखा मोनाई केरतीन एता पतरस एने हेरी कियील, आखा माणहान तुवाह गेरील हेते एने आखा तारपोर दोवडीह. 46पुण यीशु कियील, माहु कुणबी स्पर्श किरील हि, कारण मालूम पोडील हि मारेमाय रीन सामर्थ्या बाहेर निकलील हि. 47जेवी ती बायाकू देखील का मी लीकाय नाह सेकीत तेवी ती कापते कापतेन आवी एने तान पायापोर पोडीन ती आखा माणाहान ओगांण कियील का मी ताह काय कारण से मी तुवाह स्पर्श किरील एने किहिक चालूच हाजी एनी. 48यीशु तीह कियील सोरी, तुवाह तारो विश्वासान हाजो किरील हि शान्ति से जा. 49तो बोलतेच एतो कोलाकामाय यहूदी धर्म आराधनालयान मुख्य ज्यान घेराम रीन कूण आवा एने कियेल, तारी सोरी मरण देखाईल हि ऐवी गुरूला मेहनत आपुह मां. 50यीशु ज्यो होमलील, बिऊ मां, विश्वास देर, ती वाची. 51ताहेर्यो यीशु ता घेराम आवा तेवी तान आपणेहेर्यो पतरस, यूहन्ना, याकूब एने सोरिन आहाक आबुक व्यतिरिक्त कुणीबी आपणेहेर्यो आवहू देनो नाहं. 52आखा माणहे ता सोरिन केरता रेडतेन एता दुखी एता यीशु ताह केयो, रेडनेन बंद केरू काहाकाय ती मोरनी नाहं पुण हुवील हि. 53ज्यापूर माणहे तापोर आहना कारण ताह मालूम एता कि सोरी मोरनी हि. 54यीशु ता सोरिन आथ वीरनु एने तीह आयेड आपील कियील, “सोरी, उभी रीवू.” 55एने तीन आत्मा पोशा आवा एने चालूच उठीन उभी रेणी. यीशु आज्ञा केरील कि जीह काही खाणेन दया. 56ज्यापूर सोरिन आहाक आबुक जुलुम थक्क एय गीयू, कारण यीशु ताह आज्ञा केरील कि जी घटना घेडील हि हे कोणीही केहू मा.
Nahali (नाहाली) Bible by The Love Fellowship is licensed under Creative Commons Attribution-ShareAlike 4.0 License.