लूका 6
6
शब्बाथान प्रभु
(मत्ती 12:1-8; मरकुस 2:23-28)
1ओवतो शब्बाथान एक दिह तो खेतामायरीन जाताला, एने तान चेला केणहे तोडीन तोडीन एने आथा केरीन चोलीन खाणे जात एता. 2तेवी फरीसी मायरीन कोलाक जान केहू लागिल, “तुमूह तो काम का केरणू जो शब्बाथान एक दिह केरणेन योग्य नाहं?” 3यीशु ताह उत्तर आपील, “काय तुमूह हजो वोचील नाहं का दाविदान ताहेरया, तो एने तान हेरी बुखल्या एता तर काय किरील? 4तो कोहलो बोगवानान घेराम गीयो, एने भेटने रोटा खाणु, ज्याह खाणेन केरता याजकाह सोडीन दिहीराह खाणेन योग्य नाह एता, एने आपणो दोस्ताहा पुण आपील?” 5एने तो ताह कियील, “माणहान सोरो शब्बाथ दिहान प्रभु हि.”
हुकील आथ वाला माणहाह हुदारणेन
(मत्ती 12:9-14; मरकुस 3:1-6)
6एने दिहीरा शब्बाथान एक दिह तो आराधनालय माय जाइन हिकू लागिल; एने ताहारी एक माणुह एतो एने तान आथ वूलील एतो. 7शास्त्री एने फरीसी तापोर दोष लागणेन योग्य टाइम जुळणेन नादान एता कि देखहुं शब्बाथान एक दिह हजो करने कि नाहं. 8पुण तो तान विचार होमजाडणे एतो; तावजेसे तान हुकील हातान माणहाह कियील, “उठ, विचमाय उबरील रीवू.” तो उठीन उबरील रेणू. 9यीशु ताह कियील, “मी तुमूह जो फुसहु कि शब्बाथान एक दिह का योग्य हि, हाजो केरणेन कि वाईट केरणेन; जीवाह वोचाळणु कि नाश केरुहू?” 10तेवी तान चारुबी बाजूमाय ता आखा देखीन ता माणहाह कियील, “तारो आथ ओगाण केर.” तान तोहोलोच किरील, एने तान आथ हाजो एय गीयो. 11पुण तो किचवाईन भोड्कीन एक-दिहरा केणे लागिल का आपु यीशु हे-यो काय केरणू?
बारा प्रेरिताह बोणावनणेन
(मत्ती 10:1-4; मरकुस 3:13-19)
12ता दिहामाय तो प्रार्थना केरणेन केरता गीयो, एने बोगवानान प्रार्थना केरणेम आखा रात काडीन टाकील. 13ओवतो दिह उजाडील तेवी तान चेलाह हादाडीन तामायरीन बाराजणान निवाडीन लीईल, एने ताह चेला कियील; 14एने तो ज्यो हि: शिमोन तान नाव तो पतरस भी मिलील, एने तान बाहाक आंद्रिया, एने याकूब, एने यूहन्ना, एने फिलीप, एने बर्थलमय, 15एने मत्ती, एने थोमा, एने अल्फिन सोरो याकूब, एने शिमोन जो जीलोट कियेल जात एतो, 16एने याकूबान सोरो यहूदा, एने यहूदा इस्कर्योत जो ताह देरावीन आपणार बोणील.
शिक्षा आपणेन एने हुदारणेन
(मत्ती 4:23-25)
17तेवी तो ताहेरया उतरीन सपाट जागीपोर उब रेणू, एने तान चेलान मोठलु टोलु, एने आखा यहूदिया, एने यरूशलेम, एने सोर एने सिदोन समुद्राम किनारापूररीन जादा माणुह, 18जा तान होमलने एने आपणो रोगाह हाजो एणेन केरता तान आहने आवा, एता. एने अशुद्ध आत्मा माय पिलील माणुह पुण हाजो किरील जात एता. 19आखा ताह स्पर्श केरणे ईच्छा केरतीन एता, कारण तामायरीन सामर्थ्य निकलीन आखा हाजो केरतीन एता.
आशीष एने दुखान वचन
(मत्ती 5:1-12)
20तेवी तान आपणो चेला देखीन कियील, “धन्य हेते तुमूह जो नम्र हेते, कारण बोगवानान राज्य तुमरो हि.” 21“धन्य हेते तुमूह जा बुखल्या हेते, काहाकाय ताह तृप्त केरणेन आवील हेते. धन्य हेते तुमूह जा ऐवी रेडनु, काहाकाय ता आहती.” 22“धन्य हेते तुमु जेवी माणहान सोरान वजसे तुवाहेर्यो माणुह तुमरो द्वेष केरुहू, एने तुमूह काडीन आपण्यू, एने तुमरी निंदा केरुहू, एने तुमरो नाव वाईट समजून काडीन टाकणे.”
23“ता एक दिह आनंदमाय उसल्या मारणेन, कारण देखू, स्वर्गाम तुमरीकेरता मोठो फोल हि; तान पूर्वजा हेर्यो पुण भविष्यवक्ताहेर्यो पुण ओहलास केरुहू.” 24“पुण हाय तुमरे पोर जे ऐवी श्रीमंत हि, कारण तुमूह आपणा सांत्वन मेलावीन लीईल हि.” 25हाय तुमरे पोर जे ऐवी तृप्त हि, कारण बुखल्या एती. “हाय तुमरे पोर जे ऐवी आहने हेते, कारण दुख केरुहू एने रेडहो. 26हाय तुमरे पोर जेवी आखा माणुह तुमूह हाजो केती, कारण तान पूर्वज पुण खोटा भविष्यवक्ता हे-या ओहलाच केरतीन एतो.”
दुश्मना से प्रेम
(मत्ती 5:38-48; 7:12)
27“पुण मी तुमूह होमलनारा किथु कि आपणो दुसमोनापूर प्रेम केरू; जो तुमरो शत्रु हि, तान हाजो केरू. 28जो तुमूह हाराप आपणे, ताह आशीर्वाद आपु, जो तुमूह बदनाम करने; तान केरता प्रार्थना केरू. 29जो तारे एक गाडश्यापूर थापू दीथी तान ओगांण दिहरो गाडशो भी ओगांण केरू; एने जो तारो डेगलो सांडाळी, ताह डेगली भी लीन जाणेन विरोध केरूह मा. 30जो कूण तुवा फाय मांगी, ताह आप; एने जो तारी वस्तु साडाळ लेह ताफायरीन मागुहू मां. 31एने तुमूह लागणे का माणहे तुमरे हेरया केरणू, तुमूह भी ताहेऱ्यो तोहोलाच केरू.”
32“जर तुमूह आपणे पोर प्रेम मेलणु एने प्रेम केरुहू, ते तुमरो काय जादा? कारण पापी भी आपणो प्रेम केरनारापूर प्रेम केरणू. 33जर तुमूह आपणा हाजो केरणारा उपेर हाजो केरणू, ताम तुमरो काय जादा? कारण पापी पुण ओहलास केरणू. 34जर तुमूह उदार आपण्यू ताफायरीन पोशा लेणेन आशा धरत हि, तर तुमरो काय जादा? कारण पापी पाप्याह उदार आपथु कि तो तोलोच पोशो मिलावूह.” 35पुण आपणो शत्रुपोर प्रेम केरू, एने हाजो केरू, एने पोशा जुडणेन आशा घेरू मा एने उदार दया; एने तुमरीकेरता मोठा फोल एती. एने तुमूह परमप्रधानान सोरा ठेरणार. कारण तो तां पोर जे तान आभार मानणार नाहं एने वाईटापोर पुण दयाळू हि. 36तोहोलोज तुमरो आबुक दयाळू हि, तोहोलोच तुमूह पुण दयाळू एवू.
दोष मा लागाडू
(मत्ती 7:1-5)
37“दोष लागाडू मा, म्हणजे तुमरेपुर भी दोष नाय लागी नाहं ते दोषी ठेरावहु मा, म्हणजे तुमूह पुर भी दोषी ठेरायेल जाहू. नाहं दिहीरा क्षमा केरू म्हणजे तुमूह भी क्षमा जुडी. 38आपु, म्हणजे तुमूह भी आपणे माय आवी. माणुह माप दाबीन दाबीन, एने आलाडीन एने हिंग बोरीन तुमरे सेवडे बोरती, काहाकाय जा मापासे तुमु मापहु ताच मापासे तुमरे केरता भी मापाय.”
39ओवतो तान ताह एक वार्ता कियील, “काय आंधलू, आंधल्हा वाट केय शकणे काय? काय तो दुयू खाडाम पोडती नाहं? 40चेला आपणा गुरुफायरीन मोठू नाहं पुण जो पुरो हिकणार तो आपणा गुरुहोस एय. 41तू आपणा बायाकान डोला माय वालो कोचराह काहा देखणे? एने आपणा डोला माय वालो केचरू होमजाडणे नाहं?” 42“जेवी तू आपणाच डोला माय वालो केचरू नाह दिखीत, ते आपणा बायाक किहीकाय केय शेकही, हे बाहाक, थोब जा मी तार डोला माय वालो केचरू काड देथु? हे कोपटी पेल आपणा डोला माय वालो केचरू काड, ओवतो जा जी केचरू काडने तारो डोला माय हि ताह हाजो केरीन देखीन काड दीही.” 43काल्लोज हाजो झाड नाहं, जो बिगरकामान फोल जो हाजो फोल नाह लावणे काल्लोज बिगरकामान झाड नाहं जो हाजो फोल लावूह. 44प्रत्येक झाड आपणा फोला पोररीन ओलखाय जाणे कारण माणुह काटावालो झाडा फायरीन अंजीर तोडीन नाहं एने बोरीन झाडा फायरीन अंगूर तोडीन नाहं. 45हाजो माणुह आपणो मोनान हाजो भांडारामरीन हाजो वातू काडीन एने वाईट माणुह आपणो मोनान वाईट भांडारामरीन वाईट वातू काडीन कारण जो मोनाम भूरील हि तोज मुयाम आवी. 46“जेवी तुमूह मारो केणेन नाह मानणु ते माहु हे प्रभु, हे प्रभु काहा केणु? 47जो कूण माहफाय आवणे एने मारी वातू होम्लीन तीह मानीन मी तुमूह किथु तो कुणान होस हि. 48तो ता माणहान होस हि तान घेर बोनावतालान जोमनि उंडो खोदीन सापरापुर पाया बांधील एने तेवी पुर आवो एने पाण्यान धारा ताह लागना पुण ताह आलवी नाहं सेकनी कारण तो पाक्को बांधील एतो. 49पुण जो होम्लीन मानत नाहं तो ता माणहान होस हि, ज्यान जोमनि पोर बिना पायान घेर बोणावणेन, तेवी ताह धारा लागण्यू तेवी ता चालूच पोडीन गीया एने बुंदे पोडीन तान नाश एय गीयो.”
Nahali (नाहाली) Bible by The Love Fellowship is licensed under Creative Commons Attribution-ShareAlike 4.0 License.