Mat 28

Zozii ya 'kwɩɩnkʋbho

(Mak 16.1-8; Luk 24.1-11; Zan 20.1,11-18)

1Nyɔkwɛclɩɩa* 'plɩ 'lɛ na, nyamaclɩɩa 'la ‑bɛkaclɩɩa 'kʋ, ‑zʋkpasaa 'pɩɩ, Madalaaŋlɔ Malii ɩya ‑daa Maliia ya lesua kopekan mʋ. 2'Nyɩ ‑atangblɩsa, ‑dʋdʋa ya gbasa tɩtɛlɩ: ‑Kwlenyɔ 'la 'bhlaandlee* bhlo ya ‑laagɔɔn 'wlʋ, ɔ ya kwli, ɔ ya cokwiea 'bhisio 'nyɩ ɔ yɛɛ 'kʋ 'plɩ, ɔ ya sakʋ. 3'Ɔ ‑lɩɩbhuoa lea le ‑laagɔɔn 'la 'wɛtɩalɩɛ, 'nyɩ ɔla lokua ‑pulua le 'cɔcɔlɛ 'bhisa. 4Ŋanɔ ya maa ‑ɔ ‑bɛa 'lɛ lesua na pla, ma tɩtɛlɩa 'nyɩ ma ya 'plɩ -Sekee. 5‑Ma 'bhlaandleea ya nesa 'nyɩ ɔya 'ŋwlɛa 'cla lebhe: «Anyɩ, ŋanɔ 'la 'bhlaa anyɩ. N ‑ci sɛɛ lebhe Zozii, ma bho 'lɛ dabhlalɩsua 'ciin na, ɔmɔ a 'matɩ 'lɛ. 6Ɔ 'ta ‑da ‑kʋ, ɔ ya 'kwɩɩnkʋbho, sa saa ɔ nyɩtɛa 'lɛ na, a ci ɩya a kope daa ɔ pʋa 'lɛ na. 7Na, a mʋ 'faanfan ɩya a solu ɔla gɩlɩnyaa* lebhe: Ɔ ya 'kwɩɩnkʋbho 'nyɩ 'lɩka ɔ pʋ anyɩ 'kʋklʋʋn 'yɛpɩ Galilee, 'yɛpɩ a cɩ 'kɔɔ 'lɛ 'lɩlɩ. 'Lɩka, n yɩɩ anyɩ solu.»

8Maya ŋanɔ ɩya pɔlɛkʋmɛnɔ ya 'faanfan lesua 'kʋwlʋ, 'nyɩ sɔmɩ sɔmɩɩn, ma ya mʋ, 'nyɩ ma ya Zozii 'la gɩlɩnyaa 'dɩ fa pɔlɛkʋmɛnɔ 'kadie nɩkplaan. 9Ma na ma 'ka kope na, Zozii ya maa 'bɩɩncili 'nyɩ ɔ ya maa 'cla lebhe: «N pa anyɩ ‑ayoka.» Ma yɔɔ cɩmɛ, ma ya ɔla bhɩa 'kʋ bhli, 'nyɩ ma yɔɔ ‑deliin ‑kukoonkplii sasla. 10Na, Zozii ya maa 'cla lebhe: «Ŋanɔ 'la 'bhlaa anyɩ. A mʋ ɩya a solu n bholiecɩa lebhe ma mʋ Galilee, 'yɛpɩ ma cɩ 'kaan 'lɛ 'lɩlɩ.» 11Daa 'ŋwlɛa ‑kʋa 'lɛ ‑gugwie 'kʋ na, 'sojaa ‑ɔ ‑bɛa 'lɛ lesua na, ‑anʋa ya duku mʋ, 'nyɩ ma ya ɩmɩa ‑tɛtɛa ‑ɩ 'plɩa 'lɛ na, ‑teyiyinyaa tocɩa 'dɩkʋsalɩ. 12-Teyiyinya ‑kpasɩa ɩya ncaakpasɩa ya 'wluwlalɩ 'nyɩ ma bhɩalɩ 'lɛ cɩzʋlʋlɩɛ na, ma ya 'lɛ 'sojaa ‑kpɔɔdala 'nyɩ, 13'nyɩ ma ya 'lɛ maa 'cla lebhe: «'Lɩka ɩmɩa a cɩ ka 'lɛ nyɩtɛ na, a 'cla lebhe: Daa ‑a ‑kʋa 'lɛ claan na, ɔla gɩlɩnyaa ya dobhesa ci, ma yɔɔ ghli 'nyɩ ma yɔɔ 'lɛ famʋ. 14'Nyɩ ka wɔlɩa ‑ka goonvlaa 'nyukwliin bhlili na, ‑anyɩ ‑ɔ ‑cɩ kɔɔ 'lɛ pɔlɛɛn bhlili ɩya ‑a ka saa 'fɩan nʋ ɩya wɔlɩ ‑ylɛylɛ 'la ka anyɩ ŋeni.» 15Ma ya 'dalaa 'ma 'nyɩ ma ya 'lɛ ɩmɩa ma solua 'lɛ maa na, 'kʋplɩlɩ. Wɔlɩ ‑naa -kʋ Zifʋnyaa* sidiin 'kʋmʋmʋnʋda ‑aan 'nyɩ ‑yaka ya 'lɛ ŋeni.

Zozii ya ɔla gɩlɩnyaa 'ciinfutolu

16Gɩlɩnyaa* 'kʋgba bhloa ya 'kʋbho, 'nyɩ ma ya Galileebhlɩa 'kʋ, 'kikea Zozii palaa 'lɛ maa na, 'wlu mʋ. 17Daa ma 'lɩ 'lɛ Zozii na, ma yɔɔ ‑deliin ‑kukoonkplii sasla, ‑ma ‑anʋa la 'taa ‑nʋawlɛ. 18Zozii ya maa cɩmɛ 'nyɩ ɔ ya maa 'cla lebhe: «N ya ‑laagɔɔn ɩya ‑dʋdʋa 'la ‑kwletɛtɩa ‑tɛtɛa 'lɩ. 19Na, a mʋ ɩya a ple 'lɔlɩa ‑tɛtɛa 'na gɩlɩnya, a zʋ maa 'nyu 'wlu To, 'Cʋ ɩya ‑Kplɔkplɔ ‑Wugoa* 'la 'ŋlɩa nɩkplaan ɩya 20a ca maa ɩmɩa ‑tɛtɛa n ca 'lɛ anyɩ na, ɩla 'kʋplɩlɩlɩɛ. 'Nyɩ -amʋ, n ‑kʋ anyɩ cɩ clɩɩa 'fɩan ‑tɛtɛa ‑aan ‑laagɔzɔan 'la 'wlukoda.»

Àwon tá yàn lọ́wọ́lọ́wọ́ báyìí:

Mat 28: NTLD13

Ìsàmì-sí

Pín

Daako