Mat 27

Ma ya Zozii Pilatɩ ‑deliin fa

(Mak 15.1-2; Luk 22.66, 23.1; Zan 18.28)

1‑Zʋkpasa 'pɩɩ, ‑teyiyinyaa tocɩa 'fɩan ɩya ncaakpasɩa ya bhlo 'plɩ 'nyɩ ma ya wɔlɩ gʋa le ma 'ka gba ɩya ma 'ka Zozii 'bhla. 2Ma yɔɔ gʋa, ma yɔɔ famʋ 'nyɩ ma yɔɔ Wlɔmʋnyaa 'la goonvlaa ma la 'lɛ Pilatɩ na ‑deliin fa.

Zuda 'la 'kwɩ

3Na, Zuda, ɔmɔa ‑ɔ ‑saa 'lɛ Zozii na, daa ɔ 'lɩ lebhe ma yaa Zozii 'la 'bhlawɔlɩa kpo 'kʋ zʋ na, ɔ ya cɩɩnkalɔ 'lɩ 'nyɩ ɔ ya ‑teyiyinyaa tocɩa ɩya ncaakpasɩaa ‑daangbʋa ‑glʋʋa ɩya 'kʋgbaa calakan mʋ, 4'nyɩ ɔ ya maa 'cla lebhe: «N ya nyinyi nʋ, nclɔɔa, ‑ɔ 'ta ka 'lɛ lʋʋ nʋ na, n yɔɔ ‑sa.» Ma ma yɔɔ 'cla lebhe: «‑N 'ta ‑ala wɔlɩ!» 5Na, Zuda ya 'dalaa Laagɔpaakadiea* ‑zɔn 'pa, ɔ ya mʋ 'nyɩ ɔ ya ɔcɩ 'bhlu gɩ. 6-Teyiyinyaa tocɩa ya 'dalaa 'ma, 'nyɩ ma ya 'cla lebhe: «Ɩ 'ta nanɩ le, ‑a 'ma 'dala ‑naa, ɩya ‑a 'kɔsɔa Laagɔpaakadiea 'la 'bhaklɔa nɩkplaan, ‑masa a ‑glɩ ‑doludala na.» 7Ma ya neennununu, ma ya 'dalaa ‑naa 'ma 'nyɩ ma ya mamɛmanyɔ bhlo 'la 'kwla ‑pɩa le ma 'kaa lowie 'la lesikpa ple. 8'Lɩka wɔlɩ ‑naa 'la gbʋ na, dɛ ma la 'ka ‑azla 'lɛ 'kwla ‑naa ‑dolukwla. 9Na, Laagɔnekʋnyɩtɛnyɔ* Zelemii 'la niwɔlɩa ya 'kʋglalɩ: Ma ya ‑daangbʋa ‑glʋʋ ɩya 'kʋgbaa 'ma: Ɩ ‑glɩ ɔla 'pɛlʋa Izlayɛlɩcuoa* 'dɩ 'lɛ na. 10'Nyɩ ma ya 'lɛ 'dala ‑naa 'ma, ma ya 'lɛ mamɛmanyɔa 'la 'kwlaa ‑pɩa, saa ‑Kwlenyɔa loo 'lɛ wlɩɩn na.

Zozii ‑kʋ Pilatɩ ‑deliin

(Mak 15.2-5; Luk 23.2-5,9-10; Zan 18.29-38)

11Zozii ‑kʋa goonvlaa ma la 'lɛ Pilatɩ na ‑deliin. Goonvlaa yɔɔ neen 'cla lebhe: «‑Mɔ ‑glɩ 'lɛ Zifʋnyaa* 'la nyɩbhɛlʋa bha?» Zozii yɔɔ 'cla lebhe: «Sɛɛ ‑n 'bhli 'lɛ 'kʋ!» 12‑Ma wɔlɩa ‑teyiyiyakpasɩa ɩya ncaakpasɩa gɩa 'mɔɔ 'lɛ 'kʋ na, 'ɔ ‑sa 'taa ne ‑ylɛylɛ. 13Na Pilatɩ yɔɔ 'cla lebhe: «‑N 'nu 'ta wɔlɩa 'fɩan ‑tɛtɛa ma gɩɔ 'lɛ 'kʋ na bha?» 14‑Ma wɔlɩa 'fɩan ‑tɛtɛa ma nyɩtɛlɩɔ cɩ na, ɔ 'ta ne ‑sa. Na, ɩ ya goonvlaa nikpoo ‑slaa.

Ma ya Zozii 'la 'bhlawɔlɩa sɔɔnzʋ

(Mak 15.6-14; Luk 23.13-23; Zan 18.39-40)

15Geyliinwlʋfɛtlɩ* clɩɩa 'fɩan 'kʋ, goonvlaa sa ‑azla maa nclɔɔ bhlo ‑palʋʋn, ɔmɔa ma 'clalɩa 'lɛ na. 16Na, 'dɛ 'la 'bhlɛsʋa nɩkplaan, ma laa 'ŋlɩkalɩpalʋʋnpanyɔ bhlo Zozii Balabasɩ. 17Na, Pilatɩ ya ncɛlɩa ‑ɔ 'wlalɩa 'lɛ 'wlu na, neencla lebhe: «Ncaasaa a ‑wa 'lɛ lebhe n talɩ 'cin ɩya n 'nyɩ anyɩ bha? Zozii Balabasɩ, ‑aana Zoziia ma la 'lɛ Klisi na bha?» 18Sa ɔ ‑cia sɛɛ lebhe wozisa ma ‑saa 'mɔɔ 'lɛ na. 19Daa Pilatɩ ‑kʋa 'lɛ 'tɩtɩa ‑plada na, ɔ 'nʋŋlɔ ya nclɔɔ lobhu le ɔ 'clɔɔ lebhe: «'Wlʋ 'kʋnylugolunyɔ ‑naa 'la wɔlɩa nɩkplaan! ‑Masa 'claa ‑naa nɩkplaan, 'kwlɩ yaan bhɩa ‑gbɔɔn ɔmɔ 'wluku.»

20‑Teyiyinya ‑kpasɩa ɩya ncaakpasɩa yaa ncɛlɩa 'fɩan wɔlɩ 'wluun zʋ, le ma 'clalɩa Balabasɩ, ɩya ma gba, ma 'bhla Zozii. 21Pilatɩ ya nesa 'nyɩ ɔ ya ‑awlɛ ma neencla lebhe: «Maa ‑mɔsɔa nɩkplaan, ‑anɔsaa a ‑waa 'lɛ lebhe n 'talɩa 'cin ɩya n 'nyɩ anyɩ bha?» Ma nabhe: «Balabasɩ.» 22Na, Pilatɩ ya maa neencla lebhe: «Na, 'lɩsaa n cɩ 'kaa 'lɛ Zoziia, ma la 'lɛ Klisi na, nʋ bha?» Maa 'fɩan nabhe: «Bhoo dabhlalɩsu 'ciin.» 23Ɔ ya maa neencla lebhe: «Nyinyia ‑anɩ saa ɔ ya 'lɛ nʋ bha?» ‑Ma maa, ka ‑tɛɛ ma 'tɛbhalɩnɩa 'lɛ neen 'nyɩ ma claa 'lɛ lebhe: «Bhoo dabhlalɩsua 'ciin.» 24Daa Pilatɩ 'lɩ 'lɛ lebhe 'kpɔkpɔ 'titi ɔ bhɩanɩa 'lɛ ɔcɩ 'kwlɩ, ‑ma ka ‑tɛɛ wuyuwuyua zʋlʋzʋlʋnɩa 'lɛ 'kʋ na, ɔ ya 'nyu 'ma 'nyɩ ‑alawleea 'ci 'kʋ, ɔ ya wlɩ wɔlʋ 'nyɩ ɔ ya 'cla lebhe: «N 'ta nclɔɔ ‑naa, ɔla 'kwɩa nɩkplaan ‑kʋmʋ. Ala wɔlɩ ‑kʋ 'lɛ!» 25‑Alawleea ‑tɛtɛa yɔɔ 'cla lebhe: «Ɔla ‑dolua ‑gbɛ ‑anyɩ ɩya ‑a 'la 'cuoa 'wlu.» 26Daa ma gba 'lɛ sɛɛ na, Pilatɩ ya Balabasɩ 'cintalɩ, 'nyɩ ɔ ya maa 'nyɩ. ‑Ma ‑ɔ ‑glɩ 'lɛ Zozii na, ɔ ya gba 'nyɩ ma yɔɔ ‑ngblieen bhutili 'nyɩ ɔ yɔɔ 'sojanyaa 'nyɩnɩ, le ma 'kaa 'mɔɔ dabhlalɩsua 'kʋ bho.

'Sojaa 'kɔtɔlʋ Zozii 'kʋ

(Mak 15.16-20; Luk 23.11; Zan 19.2-3)

27Pilatɩ la 'sojaa ya Zozii 'ma, ma yɔɔ ɔla 'slea nɩkplaan famʋ 'nyɩ mala 'kpaa 'fɩan yɔɔ cɩ 'wluwlalɩ. 28Ma yɔɔ ɔla lokua nɩkplaan ‑sa, 'nyɩ ma yɔɔ lokwi ‑zalɛ nɩkplaanpla, 29'nyɩ ma ya 'ŋu ‑glipie ca, ma yɔɔ 'wlu zʋ. Ma yɔɔ 'dʋkɔlʋ 'lipasɔwlɩɩn zʋ. Ma slaa 'mɔɔ ‑kukoonkplii ‑deliin sa, ma nyanɩa 'mɔɔ, 'nyɩ ma claa 'mɔɔ lebhe: «‑Ayoka, Zifʋnya* 'la nyɩbhɛlʋ!» 30Ma paa 'mɔɔ ‑daadʋ 'kʋ 'nyɩ ma bhlaa 'mɔɔ 'dʋkɔlʋa 'wlu. 31Na, ma bhɩalɩɔ 'lɛ 'kʋkɔtɔlʋlɩɛ na, ma yɔɔ lokwia nɩkplaan ‑sa, ma yɔɔ ɔla lokua nɩkplaan ‑pla, 'nyɩ ma yɔɔ 'lɛ famʋ le ma 'kɔɔ dabhlalɩsua 'ciin bho.

Ma ya Zozii dabhlalɩsua 'ciin bho

(Mak 15.21-32; Luk 23.26-43; Zan 19.16-24)

32Daa 'sojaa ‑ya Zozii ‑kʋa 'lɛ mʋda na, maya Silɛnɩdua 'kʋ 'la nclɔɔ bhlo ya 'cɩlɩ, ma lɔɔ Simɔɔn. Ma yɔɔ 'nylugolu 'nyɩ ma yɔɔ Zozii 'la dabhlalɩsua bhɛda 'nyɩ. 33Ma ya daa ma la 'lɛ Gɔlʋgotaa na ŋeni, ‑ɩ sa 'lɛ ‑zɔn le 'wlukokloo 'la da na. 34Ma yɔɔ ‑diinvɛɛn ‑ɛ 'cakalɩɔ 'lɛ kalɔkalɔtɩtɔ na 'nyɩ, le ɔ 'ka 'mla. Ɔ clɛɛ 'lɛ neen na, ɔ yɛɛ 'bɩsa.

35Ma bhoo 'lɛ dabhlalɩsua 'ciin na, ma ya ‑gɔjɩma ghla, 'nyɩ ma ya 'lɛ ɔla lokua poli. 36Ma ‑kʋa 'dɛ sa 'nyɩ ma ‑bɛa 'mɔɔ. 37Ɔla 'wlua 'kʋ, ma ya wɔlɩa 'la gbʋa ɔ 'ku 'lɛ na, kpluukpaakpʋ 'kʋ zie, ɩ 'cla lebhe: «Ɔmɔ ‑naa, ɔmɔ ‑glɩ 'lɛ Zozii, Zifʋnyaa* 'la nyɩbhɛlʋ.» 38Ɔya ncaabhlanya ‑mɔsɔ ma bholu 'lɛ nebhlo dabhlalɩsia 'ciin. Bhlo ‑kʋɔ 'lipasɔ 'kʋ 'nyɩ bhlo ‑kʋɔ 'lɛ 'daba 'kʋ. 39'Plɩplɩnyaa vlaa 'mɔɔ, ma 'dɩdɔa 'wlu 'kʋ, 40'nyɩ ma claa lebhe: «‑Mɔa ‑ɔ gbɔlʋ 'lɛ Laagɔpaakadiea* 'nyɩ ‑ɔ ma 'lɛ clɩɩ ‑mɔta ‑ɔ slʋʋ 'lɛ na, ‑sanɩ ‑mɔ 'titi ‑ncɩ gbʋʋn na. Ɩ ‑ka ‑kʋ lebhe ‑n ‑ka Laagɔ 'la 'Cʋa ‑glɩ na, 'wlʋ dabhlalɩsua 'ciin ɩya ‑n kwli.» 41Sɛɛ bhlogbɩɩ, ‑teyiyinyaa tocɩa, maya ‑jlɩmaazienyaa* ɩya ncaakpasɩa nyanɩa 'mɔɔ 'nyɩ ma claa lebhe: 42«Ɔ ya ‑anʋa gbʋʋnsa 'nyɩ 'ɔ mino 'ta ɩya ɔ 'ka ɔmɔ 'titi ɔcɩ gbʋʋnsa. Ɔ ‑glɩ 'lɛ Izlayɛlɩ* 'la nyɩbhɛlʋ na, 'naa ɔ 'wlʋ ‑pɔtɔnʋ dabhlalɩsua 'ciin, ɔ kwlinɩ ɩya ‑a kanɩ ɔla pɔɔtɛtɛ kalɩ. 43Ɔ ya ɔla pɔɔtɛtɛa Laagɔ 'kʋ zʋ. 'Naa Laagɔ ‑sanɩɔ ‑pɔtɔnʋ gbʋʋn, ɩ ka ‑kʋ lebhe ɔ ‑kɔɔ ‑wa na, sa ɔ ya 'cla lebhe: N ‑glɩ Laagɔ 'la 'Cʋ.» 44Ncaabhlanyaa, ma bhoa 'lɛ mayɔɔsɔ dabhlalɩsia 'ciin na, maa ‑ma, ma vlamʋa 'mɔɔ.

Zozii 'la 'kwɩ

(Mak 15.33-39; Luk 23.44-48; Zan 19.28-30)

45Daa 'ylʋa slo 'lɛ dɩdɩ na, daa ‑tɛtɛa ya 'tutu pla ‑aan 'plɩplɩylʋʋn 'la 'ŋwacɩ ‑mɔta. 46'Ŋwacɩ ‑mɔta 'la 'klia nɩkplaan, Zozii ya nɩkplaan ‑gaa nikadieen 'nyɩ ɔ ya 'cla lebhe: «Eli, Eli, ‑lama ‑sabatani.» Ɩ sa ‑zɔn lebhe: «'Na Laagɔ, 'na Laagɔ, 'lɩsaa 'la gbʋ ‑n yaan 'lɛ te bha?» 47Maa ‑ɔ ‑kʋa 'lɛ 'dɛ na, ‑anʋa yaa 'mɔɔ neen 'nu 'nyɩ ma claa lebhe: «'Lɩka, ɔ la Elii.» 48'Kplookʋ, maa sidiin 'la bhlo ya sɔmɩ fa, ɔ ya mʋ, ɔ ya ‑vada 'ma, ɔ yaa diinvɛɛn ‑nyinye nɩkplaan 'ŋwa, ɔ yaa 'dʋkɔlʋ 'ciinzʋ 'nyɩ ɔ yɔɔ ‑tla le ɔ 'ka 'mla. 49-Da ‑naanʋa yɔɔ 'cla lebhe: «‑Bɩɔ 'ciin ɩya ‑a ka 'lɩ ɩ ‑ka ‑kʋ lebhe Elii cɩ 'kɔɔ gbʋʋnsakan ci na.» 50Ma, Zozii ya ‑awlɛ nɩkplaan ‑gaa, 'nyɩ ɔla nyɔmʋa ya bhli. 51'Kplookʋ, Laagɔpaakadiea* ‑zɔn 'la lokwia ya 'wlu 'kʋ 'manɩ, ɛ ya 'ŋatɔ ‑aan 'nyɩ ɛ ya ‑zɔn ŋeni. ‑Dʋdʋa ya tɩtɛlɩ 'nyɩ cɔkʋ 'kadɩa ya 'ŋatɔ. 52Lesia ya 'ŋatɔ 'nyɩ ‑kplɔkplɔnya ‑bhutukpa ya 'kwɩɩnkubho. 53Ma ya lesia nɩkplaan 'wlʋ 'nyɩ daa Zozii ‑bho 'lɛ 'kwɩɩn na, ma ya 'lɛ ‑kplɔkplɔdua nɩkplaan ble 'nyɩ ma ya 'lɛ ncaabhutukpa 'ciinfutolu. 54Ma ‑jlɛ 'lɛ ‑dʋdʋa ʋ tɩtɛlɩ 'lɛ ɩya ɩmɩa ‑tɛtɛa ‑ɩ plɩa 'lɛ na, 'soja ‑gwlɩɩ ‑ngbi toa, -ya maa ‑ɔ ‑kʋa 'lɛ 'dɛ, 'nyɩ ‑ɔ ‑bɛa 'lɛ Zozii na, ŋanɔ ya maa ‑pla 'kadieda, 'nyɩ ma ya 'cla lebhe: «‑Zaagbʋsa, ɔmɔ ‑naa, ɔ ‑glɩa Laagɔ 'la 'Cʋ.» 55'Ŋwlɛ ‑bhutukpa ‑kʋa 'dɛ, ma 'nylugoa 'vʋʋn 'nyɩ ma kopea. Ma yaa Zozii gɩlɩa, 'nyɩ ma lobhoa 'mɔɔ, Galilee tooto. 56Malii, Madalaaŋlɔa, Malii, Zakɩ ɩya Zozɛfʋ ma 'nɔ, ɩya Zebedee 'la 'cuoa ma 'nɔ, ma ‑kʋmʋa 'dɛ maa sidiin.

Ma ya Zozii ‑zizie

(Mak 15.40-47; Luk 23.49-56; Zan 19.25,38-42)

57'Ylʋ mʋ 'lɛ na, Alimateedua 'kʋ 'la ncaanyɩbhɛlʋ bhlo, ma la 'lɛ Zozɛfʋ, 'nyɩ 'ɔ glɩmʋa 'lɛ Zozii 'la gɩlɩnyɔ* na, ɔ ya ci. 58Nclɔɔ ‑naa ya mʋ, ɔ ya Pilatɩ ŋeni, 'nyɩ ɔ yɔɔ Zozii 'la ‑blaanyɛkɛa 'clalɩ. Na, Pilatɩ ya ‑jioli 'nyɩ le ma 'nyɩnɩɔ mɛ. 59Zozɛfʋ ya ‑blaanyɛkɛa 'ma, ɔ yɛɛ ‑slɛkɛlokwi cɩ gʋa, 60'nyɩ ɔ yɛɛ 'lɛ lesu ‑lelua ɔ gba 'lɛ 'nyɩ ma kɔtɔlʋa 'lɛ cokwie nɩkplaan ɔmɔ 'titi 'la gbʋ na, nɩkplaan zʋ. Ɔ ya cokwie 'kadie 'bhisio, ɔ yʋʋ kpaslɩlɩ 'nyɩ ɔ ya plɩ, ɔ ya mʋ. 61Madalaaŋlɔ Malii ɩya ‑daa Malii bhlo, ma ‑kʋa 'dɛ, lesua 'la 'kʋtakpaan sa.

Ncɛlɩ ‑bɛ Zozii 'la lesua

62Daa ‑zeli ze 'lɛ na, Zifʋnyaa* 'la nyɔkwɛclɩɩa* 'kʋ, ‑teyiyinyaa tocɩa ɩya Falizɩɛnnyaa* ya nebhlo Pilatɩ 'bhlɩ mʋ. 63'Nyɩ ma yɔɔ 'cla lebhe: «‑A to, ‑a ya luoli lebhe yodizʋnyɔ ‑naa, daa ɔ ‑kʋ kaa 'lɛ na, ɔ yaa 'cla lebhe: Clɩɩ ‑mɔta 'ka plɩ na, n cɩ 'ka 'kwɩɩnkʋbho. 64Na, 'maa gba ɩya ma 'ka lesua ‑bɛ ‑aan ɩya clɩɩa ‑mɔtaa 'ka ŋeni, ɔla gɩlɩnyaa* 'la ka sɛ ci, ma 'la kɔɔ ghli ɩya ma 'la ka ncɛlɩ 'cla lebhe: Ɔ ya 'kwɩɩnkʋbho. 'Dɛ 'la yodia cɩ 'ka 'ghlibholi ɩya ɩ 'ka ‑bɛka -naanɩa 'kʋ zi.» 65Pilatɩ ya maa 'cla lebhe: «'Lɩka 'sojaa. A mʋ, ɩya saa a ‑wa 'lɛ na, a ‑bɛ sɛɛ lesua.» 66Ma ya mʋ, ma ya lesua ne 'kʋ 'la cokwiea 'tla 'nyɩ ma ya 'lɛ 'dɛ 'sojaa te le ma ‑bɛʋ.

Àwon tá yàn lọ́wọ́lọ́wọ́ báyìí:

Mat 27: NTLD13

Ìsàmì-sí

Pín

Daako