Mak 1
1
'Nyuwluzʋnyɔ Zaan 'la wɔɔnyɩtʋ
(Mat 3.1-6; Luk 3.1-6; Zan 1.19-23)
1'Lɩka Laagɔ 'la 'Cʋa ‑ɔ ‑glɩ 'lɛ Zozi Klisi na, 'la Dɩnanɩa* 'la bhɔlʋda. 2Laagɔnekʋnyɩtɛnyɔ* Izayii 'la ‑afluwaa nɩkplaan, ɩ ‑zieo lebhe:
«'Lɩka, n lobhu 'na dɩfanyɔa le ɔ pʋɔ 'kʋklʋʋn
ɩya ɔ 'ka ‑naa ‑gugwiea bhɔsʋa.
3 ‑Blɩɩzɔn bhlo ‑gaan 'pʋpʋa nɩkplaan,
ʋ cla lebhe:
A bhɔsʋa ‑Kwlenyɔ 'la ‑gugwiea.
A ‑sɔɔ ‑gugoa ‑ɩ 'nylugolu 'lɛ 'kʋ na!»
4Na, 'Nyuwluzʋnyɔ Zaan ya ci, ɔ ‑kʋa 'pʋpʋa nɩkplaan, ɔ zʋa ncɛlɩ 'nyu 'wlu 'nyɩ ɔ nyɩtɛa 'nyuwluzʋlɩɛa ‑ɩ ‑glɩ 'lɛ kwlacalalɩɛ 'nyɩ ‑ɩ bhɔsʋa 'lɛ nyinyi 'la valɩɛ na, 'la cɩa wɔlɩ. 5Zudeebhlɩa 'kʋ 'la ncɛlɩa ɩya Zolizalɛmʋnyaa 'fɩan, ma mʋa 'mɔɔ 'bhlɩ, ma wlaa mala nyinyia ‑zɔn 'nyɩ Zaan zʋa maa 'nyu 'wlu Zludɛɛnnyidɔlʋa nɩkplaan. 6Zaan -plaa ‑samoo#1.6 ‑Samoo ‑glɩ 'pʋpʋʋnbhlɩa 'kʋ 'la ‑gbaakʋbhɛmlɛ 'kadie. 'la cɩa 'nyɩa 'la lokwi nɩkplaan, 'nyɩ mlakubɛtʋ ‑pɩaa 'lɛ ɔla kɔa. 'Kuolɛglɩbholinya ɩya 'kɔnʋngʋ ‑glɩa 'lɛ ɔla lilinyɩ. 7Ɔ 'claa maa lebhe: «Ɔmɔa ‑ɔ ciin 'lɛ leen na, ɔ ‑ka 'tɛtɩ ɔ ziin 'kʋ 'nyɩ ‑amʋ n 'ta 'kʋŋwa le n kwlili sa ɩya n ‑blulu ɔla ‑gbanbʋɩa 'la 'bhlia. 8‑Amʋ, 'nyu nɩkplaan n zʋlʋ 'lɛ anyɩ 'nyu 'wlu, ‑ma ɔmɔ, ‑Kplɔkplɔ ‑Wugoa* nɩkplaan ɔ cɩ 'ka 'lɛ anyɩ 'nyu 'wlu zʋlʋ.»
Zaan ya Zozii 'nyuwluzʋ 'nyɩ gɔzɛ yɔɔ gbɩɩncla
(Mat 3.13-17; Luk 3.21-22; Zan 1.29-34)
9'Dɛ 'la clɩɩa nɩkplaan, Zozii ya Galileebhlɩa 'kʋ 'la 'dua ma la 'lɛ Nazalɛtɩ na, 'kʋ 'wlʋ 'nyɩ Zaan yɔɔ 'nyu 'wlu zʋ Zludɛɛnnyidɔlʋa nɩkplaan. 10Daa ɔ ‑kʋa 'lɛ 'nyia nɩkplaan 'wlʋda na, ɔ ya ‑laagɔɔn 'lɩ, ɩ ya 'gbokalɩ 'nyɩ ‑Kplɔkplɔ ‑Wugoa*, 'dablee 'bhisa, yɔɔ 'kʋ kwlili. 11'Nyɩ ‑blɩɩzɔn bhlo ya ‑laagɔɔn 'wlʋlʋ, ʋ claa lebhe: «‑Mɔ ‑glɩ 'lɛ 'na ‑wawacoa, ‑mɔ nɩkplaan n ‑zʋɔ 'lɛ 'na pɔlɛkʋmɛnɔa ‑tɛtɛa.» 12'Kplookʋ, ‑Kplɔkplɔ ‑Wugoa yɔɔ 'pʋpʋa nɩkplaan fa. 13Clɩɩ ‑gwlɩɩ ‑mɔsɔ, 'yɛpɩ 'pʋpʋa nɩkplaan, Sataan* yɔɔ gbɩɩncla. Ɔ ‑kʋa mla ‑nyinyi sidiin 'nyɩ Laagɔ 'la 'bhlaandleecɩa* lobhoa 'mɔɔ.
Zozii 'la ‑bɛkagɩlɩnyaa
(Mat 4.12-17; Luk 4.14-15; Zan 4.1-3,43-46)
14Daa ma bhli 'lɛ Zaan 'kʋ 'nyɩ ma 'pɔɔ 'lɛ ‑palʋʋn na, Zozii ya Galileebhlɩa 'kʋ mʋ 'nyɩ ɔ saa Laagɔ 'la Dɩnanɩa*. 15Ɔ claa lebhe: «Clɩɩa ‑ɩ ‑zʋɔa 'lɛ na, ɩ ya ŋeni 'nyɩ Laagɔ 'la Nyɩbhɛlɩdua* ya cɩ mɛ. A cala kwla ɩya a ŋonu a 'ma Dɩnanɩa.» 16Daa Zozii ‑kʋa 'lɛ Galilee 'la 'nyia cɩ 'plɩlɩda na, ɔ ya Simɔɔn ɩya ɔ bholi Andlee 'lɩ, ma paa ‑dada, sa ma ‑glɩa ‑zliibhlanya na. 17Ɔ ya maa 'cla lebhe: «A gɩlɩɩn ɩya n 'kanɩ anyɩ ncɛlɩ 'la jlinya ple.» 18'Kplookʋ, ma ya mala ‑dadɩa cɩɩnwlʋlʋ 'nyɩ ma yɔɔ gɩlɩ. 19Daa ɔya maasɔ mʋ 'lɛ 'pɛpɛ 'kʋklʋʋn na, ɔ ya Zebedee 'la 'cuoa ‑mɔsɔa, Zakɩ ɩya ɔ bholi Zaan 'lɩ. Ma ‑kʋa mala gɔlʋa nɩkplaan 'nyɩ ma tʋndʋa mala ‑dadɩa. 20'Kplookʋ, ɔ ya maa la, ma ya dɩpɩa ma to Zebedee ɩya ɔla lobholinʋnyaa gɔlʋa nɩkplaan te 'nyɩ ma yɔɔ gɩlɩ.
Zozii ya nclɔɔ bhlo 'wugo ‑nyunyu nɩkplaan ‑sa
(Luk 4.31-37)
21Zozii ɔya ɔla gɩlɩnyaa* ya Kapɛnayumʋdua 'kʋ mʋ. Zifʋnyaa* 'la nyɔkwɛclɩɩa* 'kʋ, ɔ ya mala bhibhiepalʋa* ‑zɔn ble 'nyɩ ɔ caa. 22Ɔla cacawɔlɩa ya ncɛlɩa 'fɩan nikpoo ‑sla, sa ɩ ‑kaa 'tɛtɩ 'nyɩ ɩ 'taa ‑kʋ le ‑jlɩmaazienyaa* 'la calɩɛa. 23'Kplookʋ, 'wugonyunyunyɔ bhlo ya ble. Ɔ ya nɩkplaan ‑gaa 'nyɩ ɔ ya 'cla lebhe: 24«Nazalɛtɩ 'la Zozii, 'lɩsaa nʋkan ‑n cia 'lɛ ‑anyɩ bha? Ka ‑n ci 'lɛ le ‑n ka ‑anyɩ 'pʋpʋa kʋ ‑sa bha? ‑Amʋ n ‑ci nclɔɔa ‑n ‑glɩ 'lɛ na. ‑Mɔ ‑ɔ ‑glɩ 'lɛ Laagɔ 'la ‑Kplɔkplɔnyɔa ɔ lobhu 'lɛ na!» 25Zozii ya 'wugo ‑nyunyua 'wlugaalɩ 'nyɩ ɔ yʋʋ 'cla lebhe: «Mɛ ‑naa nea ɩya ‑n 'wlʋ nclɔɔ ‑naa nɩkplaan.» 26'Wugo ‑nyunyua ya nclɔɔa 'dɩdɔ gbasa 'nyɩ 'kasɛpalɩɛɛn, ʋ yɔɔ nɩkplaan 'wlʋ. 27Neen ya maa 'fɩan yɛ 'nyɩ ma 'claclalɩa neen lebhe: «Wɔlɩ saa 'titi ‑ɩ ‑kʋa 'lɛ ‑sa bha? 'Lɩka calɩɛ ‑leli, ‑ɩ ‑ka 'lɛ 'tɛtɩ na. Ɔ nyɩtɛ ɔ solu 'wugwi ‑nyinyi 'nyɩ ɩla 'nyiyio.» 28'Kplookʋ, ɔla 'ŋlɩ ya Galileebhlɩa 'kʋ daa ‑tɛtɛa dlolu.
Zozii ya guzenya ‑bhutukpa jabha
(Mat 8.14-17; Luk 4.38-41)
29Daa Zozii ɩya ɔla gɩlɩnyaa* 'wlʋ 'lɛ Zifʋnyaa* 'la bhibhiepalʋa* ‑zɔn na, 'kplookʋ, maya Zakɩ ɩya Zaan ya Simɔɔn ɩya Andlee 'bhisleen mʋ. 30Wɔtlɩ bhlaa Simɔɔn 'wʋtlɔ 'nyɩ ɔ pʋʋa. 'Kplookʋ, ma ya sɛɛ Zozii solu. 31Ɔ yɔɔ cɩ mʋ, ɔ yɔɔ sɔ 'kʋbhli, ɔ yɔɔ 'nylugolu, wɔtlɩa yɔɔ 'ciin 'wlʋ 'nyɩ ɔ ya maa lobholɩɛ bhɔ. 32Daa 'ylʋ mʋ 'lɛ na, ma ya Zozii guzenyaa ɩya 'wugwinyinyinyaa 'fɩan ‑la. 33Dunyaa 'fɩan ya 'sligbinea 'kʋ 'wluwlalɩ. 34Ɔ ya ncaabhutukpa, gu ‑mizimizi 'bhlaa 'lɛ na, jabha 'nyɩ ɔ ya 'lɛ 'wugwi ‑nyinyi ‑bhutukpa 'tli. Ɔ 'nyɩ 'taa 'wugwi ‑naa ‑jioli ‑ylɛylɛ le ɩ nyɩtɛa, sa ɩ ‑cia nclɔɔa ɔ ‑glɩa 'lɛ na.
Zozii 'plɩlɩ Galileebhlɩa 'kʋ
(Luk 4.42-43)
35‑Zʋkpaziplia, Zozii ya 'kʋbho, ɔ ya ‑zɔnwlʋ, ɔ ya daa ‑ɩ ‑kʋ 'lɛ ɩcɩɩn na mʋ le ɔ 'ka bhibhie. 36Simɔɔn ɩya ɔ 'yea ya 'kʋbho 'nyɩ ma yɔɔ 'matɩkan mʋ. 37Daa ma 'lɩɔ 'lɛ na, ma yɔɔ 'cla lebhe: «Ncɛlɩa 'fɩan 'matɩɔ.» 38‑Ma ɔ ya maa 'cla lebhe: «‑A 'wlʋ ‑da ɩya ‑a mʋ 'dia ‑ɩ ‑mɛɛ 'lɛ ‑anyɩ cɩ na 'kʋ ɩya n 'ka 'yɛpɩ ‑ma Laagɔ 'la Dɩnanɩa* ‑salɩ, sa ɩla gbʋ dɛ n 'wlʋ 'lɛ ‑zɔn.» 39Ɔ 'plɩlɩa Galileebhlɩa ‑tɛtɛa 'kʋ 'nyɩ Zifʋnyaa* 'la bhibhiepalɩa* ‑zɔn, ɔ saa Dɩnanɩa 'nyɩ ɔ tlia 'wugwi ‑nyinyia.
Zozii ya kokobhebhlanyɔ jabha
(Mat 8.1-4; Luk 5.12-16)
40Kokobhebhlanyɔ bhlo ya Zozii 'bhlɩ ci, ɔ yɔɔ ‑deliin ‑kukoonkplii sasla 'nyɩ ɔ yɔɔ 'cla lebhe: «‑N ‑ka ‑wa na, ‑n cɩɩn jabha.» 41Nclɔɔa 'la gbɩa ya Zozii ŋaazɩ ‑pla, ɔ ya sɔɔn ‑glɔ, ɔ yɔɔ cɩkla 'nyɩ ɔ yɔɔ 'cla lebhe: «N ‑wa, 'maa jabha!» 42'Kplookʋ, kokobhea yɔɔ cɩ 'wlʋ 'nyɩ ɔ ya jabha. 43Dɩpɩa bhlogbɩɩ, Zozii yɔɔ 'cizalalɩ 'nyɩ ɔ yɔɔ 'cintalɩ. 44Ɔ yɔɔ 'cla lebhe: «‑Naa solua wɔlɩ ‑naa nclɔɔ bhlogbɩɩ, ‑ma mʋ, pala ‑ncɩ ‑teyiyinyɔa, ‑sa lɩɩa Moyizi 'clalɩ 'lɛ na ɩya ma 'ka dɩpɩa ‑danʋfʋɛ lili lebhe ‑n ya ‑zaagbʋsa jabha.» 45‑Ma daa ɔ 'wlʋ 'lɛ ‑zɔn na, ɔ ya ɩmɩa ‑ɩ 'plɩlɩa 'mɔɔ 'lɛ 'kʋ na, ncɛlɩ 'dɩkʋsalɩ. Ɩmɩ 'wluku na, Zozii mino 'taanɩa ɩya ɔ 'ka ncaacikʋ 'du nɩkplaan ble. Dɩa ‑ɩ -kʋ 'lɛ ɩcɩɩn na ‑tɛɛ ɔ ‑kʋanɩa 'lɛ 'nyɩ ncɛlɩ 'wlʋlʋa 'lɛ daa ‑tɛtɛa ma cia 'mɔɔ 'lɛ 'bhlɩ.
Àwon tá yàn lọ́wọ́lọ́wọ́ báyìí:
Mak 1: NTLD13
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.
