Mak 2
2
Zozii ya bhubhubhubhunyɔ jabha
(Mat 9.1-8; Luk 5.17-26)
1Clɩɩ ‑zlʋsaasa 'plɩ 'lɛ na, Zozii ya Kapɛnayumʋ cɔlɔ. Ma ya 'nu lebhe ɔ ‑kʋa 'sleen. 2Ncaabhutukpa ya 'dɛ 'wluwlalɩ 'nyɩ 'plɩda ‑ylɛylɛ 'taanɩa 'sligbinea 'titio 'kʋ ‑kʋ. Zozii caa maa Laagɔ 'la wɔlɩa. 3Ma yɔɔ bhubhubhubhunyɔ bhlo ‑la, ncɛlɩ ‑nmɔɔna bhɛa 'mɔɔ. 4Sa ‑alawleea 'la gbʋ, 'ma mino 'taa 'lɛ ɩya ma 'kaa 'mɔɔ Zozii cɩ ŋenia na, ma ya ‑palʋa ‑zɔan ɔ ‑kʋa 'lɛ na, 'wlu ‑gblaa, ma ya daa ɔ ‑kʋlʋa 'lɛ na kofo ‑sa, ma ya guzenyɔa ‑ɔ ‑kʋ 'lɛ ɔla 'kʋpʋlʋʋa 'kʋ na, kofoa neen bleli 'nyɩ ma yɔɔ Zozii ‑deliin kwlee. 5Daa Zozii 'lɩ 'lɛ mala pɔɔtɛtɛa na, ɔ ya bhubhubhubhunyɔa 'cla lebhe: «'Na 'cʋ, ‑naa nyinyia ɩ yɔɔ ‑vɔɔ.»
6Ɔ 'bhli 'lɛ sɛɛ 'kʋ na, ‑jlɩmaazienya* ‑zlʋsaasa ‑kʋmʋa 'dɛ sa, ma claa macɩ pɔlɛɛn lebhe: 7«'Lɩsaa 'la gbʋ nclɔɔ ‑naa, ɔ nyɩtɛa 'lɛ ‑sa bha? Ɔ vla Laagɔ. Ɩ ‑ka ‑kʋ le ‑n 'ta Laagɔ bhloo na, ncaasaa ‑ɔ ‑cɩ ka 'lɛ nyinyi valɩɛ mino bha?» 8'Kplookʋ, Zozii 'la 'wugoa nɩkplaan, ɔ ya mala wɔɔgugwiea cibhlili 'nyɩ ɔ ya maa 'cla lebhe: «'Lɩsaa 'la gbʋ a kaa 'lɛ ‑sa 'la wɔɔgugwie pɔlɛɛn bha? 9Ma 'ka 'lɛ bhubhubhubhunyɔa 'cla lebhe: ‑Naa nyinyia yɔɔ, ‑vɔɔ, ‑aana ma 'kɔɔ 'lɛ 'cla lebhe: ‑Bho 'kʋ, 'ma ‑naa 'kʋpʋlʋʋa ɩya ‑n namʋ na, ‑anɩsaa ‑ɩ 'ta 'lɛ 'tɛ bha? 10‑Ghɛɛ, a 'ka 'lɛ cibhlili lebhe Nclɔɔa 'Cʋa* ‑ka ‑dʋdʋa 'kʋ ‑jioli ɩya ɔ 'ka nyinyi va na, ɔ ya bhubhubhubhunyɔa 'cla lebhe: 11N clɔɔ lebhe: ‑Bho 'kʋ, 'ma ‑naa 'kʋpʋlʋʋa ɩya ‑n mʋ ‑n 'bhisleen.» 12Dɩpɩa bhlogbɩɩ, nclɔɔa ya 'kʋbho, ncɛlɩa 'fɩan 'ci 'kʋ, ɔ ya ɔla 'kʋpʋlʋʋa 'ma 'nyɩ ɔ ya ‑zɔnwlʋ. Ɩ ya ncɛlɩa 'fɩan nikpoosla, ma woa Laagɔ ‑evli 'nyɩ ma claa lebhe: «‑A 'ta ka ‑azla ‑sa 'la wɔlɩ 'ciinlɩ.»
Zozii ya Levii la
(Mat 9.9-13; Luk 5.27-32)
13Ɩmɩ ‑naa 'fɩan 'plɩ 'lɛ na, Zozii ya ‑awlɛ gea cɩ mʋ. Ncaabhutukpa cia 'mɔɔ 'bhlɩ 'nyɩ ɔ caa maa. 14Daa ɔ ‑kʋa 'lɛ 'plɩda na, ɔ ya Alɩfee ‑yowli Levii 'lɩ, ɔ ‑kʋa ‑lapooplʋpalʋa ‑zɔn sa. Ɔ yɔɔ 'cla lebhe: «Gɩlɩɩn!» Levii ya 'kʋbho 'nyɩ ɔ yɔɔ gɩlɩ.
15'Lɩka ɔ ‑kʋnɩ Levii 'bhisleen, 'tlɔnblɩ 'kʋ 'nyɩ ‑lapooclanya ɩya nyinyinʋnya ‑bhutukpa ya Zozii ɩya ɔla gɩlɩnyaa* cɩ sakʋ, sa 'sɛ 'la ncaabhutukpa gɩlɩa 'mɔɔ 'lɛ na. 16'Nyɩ ‑jlɩmaazienya* ‑anʋa, ‑ɔ ‑glɩ 'lɛ Falizɩɛnnya* na, ma lɩ 'lɛ lebhe ɔya ‑lapooclanya ɩya nyinyinʋnya lilia dabhlo na, ma ya ɔla gɩlɩnyaa 'cla lebhe: «'Lɩsaa 'la gbʋ ɔya ‑lapooclanya ɩya nyinyinʋnya lilia 'lɛ dabhlo bha?» 17Zozii ya maa neen 'nu 'nyɩ ɔ ya maa 'cla lebhe: «Maa ‑ɔ ‑ja 'lɛ na, ‑n 'ta maa ‑ɔ 'matɩ 'ta 'lɛ ‑dɔtɛ, ‑ma maa ‑ɔ 'ta 'lɛ ‑ja na. ‑N 'ta 'kʋnylugolunya lakan n 'ta 'lɛ ci, ‑ma nyinyinʋnya.»
Zozii nyɩtɛ ‑zelizlolɩɛ 'la wɔlɩ
(Mat 9.14-17; Luk 5.33-38)
18Clɩɩ bhlo, 'Nyuwluzʋnyɔ Zaan 'la gɩlɩnyaa ɩya Falizɩɛnnyaa* ma zloa ‑zeli. Ma ya ci 'nyɩ ma ya Zozii 'cla lebhe: «'Lɩsaa 'la gbʋ Zaan 'la gɩlɩnyaa* ɩya Falizɩɛnnyaa 'nʋa, ma zloa 'lɛ ‑zeli 'nyɩ ‑mɔɔ ‑naa gɩlɩnyaa, 'ma zlomʋ 'taa 'lɛ ‑zeli bha?» 19Zozii ya maa 'cla lebhe: «Daa 'cɩcɩɛnʋnyɔa ɔya 'tlɔnblɩkʋcinyaa ‑kʋ ka 'lɛ dabhlo na, ma cɩ mino 'nyɩ ma cɩ ‑zelizlo bha? Daa maya 'cɩcɩɛnʋnyɔa ‑kʋ ka ka 'lɛ sa na, ma cɩ 'ta ka ‑zelizlo. 20‑Ma clɩɩ bhlo cɩ 'ka ŋeni ɩya 'cɩcɩɛnʋnyɔa ma 'kɔɔ maa sidiin ‑sa. 'Dɛ 'la clɩɩa 'kʋ, dɛ ma cɩ 'ka 'lɛ ‑zelizlo. 21Maa 'ma 'ta lokupɛlʋ ‑lelu ɩya ma 'ka lokwia ‑ɛ ya 'lɛ cɔbha na, tʋndʋa. Ma ‑ka sɛɛ nʋ na, ka 'pɛlʋ ‑lelua sasalɩ lokuzʋa cɩ 'nyɩ ʋla 'ŋatɔlɩɛa zʋlʋzʋlʋlʋkʋ. 22Maa 'ma 'ta nʋcalʋ ɩya ma 'kʋʋ 'bhua ‑ɩ ya 'lɛ ‑gwlɛlɩ na nɩkplaan zʋ. Ma ‑ka sɛɛ nʋ na, ka nʋa wla 'bhua 'nyɩ nʋa ɩya 'bhua gbɩɔ. Nʋcalʋ ʋya 'bhu ‑leli ‑fata 'lɛ.»
Nclɔɔa 'Cʋa ‑kwle nyɔkwɛclɩɩa
(Mat 12.1-8; Luk 6.1-5)
23Zifʋnyaa* 'la nyɔkwɛclɩɩ* bhlo 'kʋ, Zozii 'plɩlɩa 'bleekwla nɩkplaan 'nyɩ ‑gugwiea 'kʋ, ɔla gɩlɩnyaa* ya 'bleeca kplalɩɛ bhɔ. 24Falizɩɛnnyaa* yɔɔ 'cla lebhe: «Kopeka ɩmɩa ma nʋ 'lɛ nyɔkwɛclɩɩa 'kʋ na, ɩ 'ta ‑fata lebhe ma nʋ sɛɛ.» 25Zozii ya maa 'cla lebhe: «Daviti ɩya ɔla 'namʋnyaa, daa ŋɔmʋa bhlaa 'lɛ maa 'nyɩ ma ‑miea 'lɛ na, 26saa ‑teyiyinyɔ ‑kpasaa Abiatalɩ 'la 'bhlɛsʋan, Daviti ble 'lɛ Laagɔ 'la ‑palʋa ‑zɔn, ɔ 'ma 'lɛ ‑teyiyiflawoa ‑ʋ ‑glɩ 'lɛ ‑teyiyinyaa ‑tɛɛ 'la lilinyɩ, ɔ li 'lɛ 'nyɩ ɔ 'nyɩmʋ 'lɛ ɔ 'yea ‑ma ‑kʋa 'mɔɔ 'lɛ cɩ na, a 'ta ka ‑azlɩɩ Zieziewɔlɩa* nɩkplaan zɛlɩ bha?» 27'Nyɩ ɔ ya maa 'cla lebhe: «Nclɔɔ 'la gbʋ ma nʋ 'lɛ nyɔkwɛclɩɩa, ‑ma ma 'ta nclɔɔ nyɔkwɛclɩɩa 'la gbʋ nʋ, 28ɩmɩ 'wluku na, Nclɔɔa 'Cʋa* ‑glɩ nyɔkwɛclɩɩa 'titi ‑ma 'la ‑kwleto.»
Àwon tá yàn lọ́wọ́lọ́wọ́ báyìí:
Mak 2: NTLD13
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Dida New Testament © Bible Society of Côte d'Ivoire, 2013.
