MAREKO 14
14
Na katoha vi ga nahuia o Jesu
(Mt 26.1-5; Lk 22.1-2; Jn 11.45-53)
1I na tangiani gi rua i nago tarana na Tangiana Raha na Paseka, ma i nago tarana na tangiana, na enoni ka ngêa igê na bereti, i pe ahunga, na mane ni vogasiha ga teha ma na mane ni hagesuringa ni rotu ka kato, vi ga hagatotongoa pinihi o Jesu ma ka nahuia ki meme. 2Ngaira ka vi: “I pe ararigia vige hagatotongoa igê na tangiana raha, i era ma na enoni ka nahuigia.”
Ta na gete i Betani ki monea o Jesu
(Mt 26.6-13; Jn 12.1-8)
3O Jesu ki oga i Betani i na ruma iana o Simone, na mane asiahu. Matena i ngêngê, ma ta na gete ki banu me, i merâ me na pi ne hê, i vunu renia na marâ, i manga na suru. Na marâ ngekana ki raha era na mena ma ki sigini koro ngavê. 4Ngaia ki botagia na pi na hê, ma ki meria i bêna o Jesu na marâ, i sigini koro ngavê ngekana. Tani na enoni, ga oga i ngekana, ka mangariaga, ma ka hetamatamasi, ka vi: “Tanu hega kaniga erasigi purua ma na marâ, i sigini koro ngavê? 5Manga ge hagavuringenia, ke tavogi rako teha vê na haga renia, ma na haga ke vatea tangara na enoni matareha!” Ma ngaira ka ramonia bâraha na gete.
6Mo Jesu ki vi: “Naka vê marena! Hega kanimu ramonia? Ngaia ki katoa na tarana i koro ma ki bâkoro tangê. 7Na enoni matareha ngaira ka gâga tare henigamu, ma kamu girara mu tamanira i na ani mavê na matena mu obania. Menê ki mareha ve gâga henigamu tare. 8Ngaia ki katoa na tarana i girara: ngaia ki monea na apeku, hanana i bani hagarêa tanga viga page bagia na gahuaku. 9Hoi, mu rongo! Igê na ara ni agua i maveta hagenani, ga ateate igê renia na Taroha Koro, na enoni ka page rongoa na sihonga renia na gete ngekê ma ka takusia renia.”
O Juta ki agana ki hagavuringenia o Jesu
(Mt 26.14-16; Lk 22.3-6)
10Mo Juta Isikariote, ta na hitangita na kariana tangahuru matarerua o Jesu, ki râ tangara na mane ni vogasiha ga teha, hanana i tagarenia o Jesu tangara. 11Ngaira ka vagevage bâraha i obata renia na tamasinga iana, ma ka surua, vi ga vatea na haga. Vikê o Juta ki haganega ki naasia na bevoana, i araria, vi hagavuringenia igê o Jesu.
O Jesu ma na kariana ka ngêa na ngêra na Paseka
(Mt 26.16-25; Lk 22.7-14, 21-23; Jn 13.21-30)
12Igê na ani gi tage na tangiani raha, ga ngêa igê na bereti, i pe ahunga, na tangiana, ga nahuira igê na kareta na sipi tanga na ngêra na Paseka, na kariana o Jesu ka hagatea, ka vi: “I he kanigo obanigami, vi gami arâ kami hagarêa igê na ngêra Paseka?” 13Mo Jesu ki hagatorangenirerua na ani gi rua na kariana, ma ki vi tangarerua, ki vi: “Muru bêbanu i hinua raha, ma ta na mane, i torea na pi, i vunu renia na ve, ki page arâ me vurusigamurua. 14Muru arâ suria nga tanga na ruma, i bêbanu igê, ma kamuru vi tanga na avanuna na ruma, kamuru vivi, ‘Na Araha ki vi, i he nga na kiboru tangagami, na kariaku menê, hanana gami page ngaua igê na ngêra na Paseka?’ 15Ma ngaia ki page hagabâsigamurua renia na kiboru raha i haha, ma na ara ni marâ, muru obanigi, ka bani oga i rarona, ma i ngekana kanimuru hagarêa igê na ngêra tangagia.” 16Ngairerua na kariana karu râ, karu banu i hinua raha, ma i ngekana ngairerua karu bâsigi igê na ara ni marâ, o Jesu i bani visigi tangarerua. Ma ngairerua karu hagarêa na ngêra na Paseka.
17Matena i bungi me, o Jesu ma na kariana tangahuru matarerua ka râ me. 18Matena ga oga so ka ngêngê, o Jesu ki vi: “Mu rongo! Na hitangimi ki page hagavuringeniê, na ani i meêbêrihu.” 19Na kariana ka tako bâraha, ma ka haganega ka hagatea, tatage, ka vi: “Inê ki mareha, iê?” 20O Jesu ki arami, ki vi: “Igamu na tangahuru matarerua. Na hitangimi, na ani i meêbêrihu ma ki anomia na bereti iana igê na apira. 21O Karena Enoni ki page me, manga i bani visia na Buka Apuna, ma ki era ngavê tanga na mane, i page hagavuringenia o Karena Enoni. I gahanita ma kini vora me!”
Na ngêra mora iana na Araha
(Mt 26.26-30; Lk 22.14-20; 1 Kor 11.23-25)
22Matena ga ngê, o Jesu ki têa na bereti, ki rahesia God, ki pipia na bereti, ma ki vatera na kariana, ma ki vi: “Mu têa, ikê na apeku.”
23Me muri ngaia ki têa na kâkâ, ki rahesia God, ma ki vatea na kâkâ tangara na kariana. Ma ngaira hato ka tono igê. 24Mo Jesu ki vi: “Ikê na gapuku, i gogo renira na enoni hato, na gapuku, i hagagatagatania na suruheri iana God. 25Gê vi tangagamu: i asa, be page tonomia nikâ na vaini ngekê ikê, mataro me na tangiana gê tonomia igê na vaini haoru i pasina na Araha God.”
26Ma hemuri ngaira ka kirigi na ki ni rotu, ma ka hura vê ka râ tanga na Hungana ni Olive.
O Jesu ki visia vi o Petero ki page hagaiga pusia marena renia
(Mt 26.31-35; Lk 22.31-34; Jn 13.36-38)
27O Jesu ki vi tangara, ki vi: “Igamu hato kamu page gava paniê, renia na Buka Apuna ki vi, ‘God ki page nahuia ki meme na mane, i bâsurira na sipi, ma na sipi ka page totoko.’ 28Ma na matena gê mauri aporo, inê kê page nanago tarami i Galilea.” 29O Petero ki tamasi, ki vi: “Naka ma ngaira hato ka gavagava panigo, inê ma ki mareha!” 30O Jesu ki vi tanga o Petero, ki vi: “Rongo vego! I rikini bungi igo ko page hagaiga pusigo maremu hageoru reniê, ma hemuri ki kahu angiangi hagerua na kua mane.” 31O Petero ki raramohaga bê aporo, ki vi: “I asa iaku hagetage, ve page hagaiga pusiê mareku renigo, naka ma gê meme henigo!” Ma ngaira hato na kariana ka vi vikana nogata.
O Jesu ki nunginungi i Gesemani
(Mt 26.36-46; Lk 22.39-46)
32Ngaira ka ata râ i na agua, ga visia Gesemani, mo Jesu vi tangara na kariana, ki vi: “Mu oga so ikê, matena gê nunginungi.” 33Ma ki merarâ o Petero mo Jakobo mo Joane. Ma ngaia ki haganega ki magu, ma ki hata era na obana. 34Tahema ngaia ki vi tangara, ki vi: “I hata era bâraha na aitangihaku, gê haga ni meme nga renia. Mu oga so ikê ma kamu bâba.”
35Ngaia ki ura râ sisite, ma ki aba i ano, ma ki nunginungi, hanana vi na bevoana na mamasiaganiha siana ke tarahua, manga i pe asa. 36Ngaia ki nunginungi, ki vi: “Mama, Vaemaku! Na ara ni marâ ka pe asa tangago. Torea vê na kâkâ na mamasiaganiha ikê teniê. Ma ki koro ma, igo ma.”
37Me muri ngaia ki aporo tangara na kariana gi oru, ma ki tarahura, ga mêru, ma ngaia ki vi tanga o Petero, ki vi: “Simone, o mêru? I asa iamu, vi gu bâ suria ma na kere matena abubu?” 38Ma ngaia ki vi tangara, ki vi: “Mu bâbâ ma kamu nunginungi, hanana mu pe votavota igê na tasi. Na nununa ki agana ki ura pusia na heuhungiha, ma na apena ki marababaga.”
39Ma ngaia ki aporo râ nikâ ma ki nunginungi, manga i nunginungi i nago. 40Me muri ngaia ki aporo me tangara na kariana, ma ki tarahura, ga mêru. I higa bâraha na maata. Ma ngaira ka tako makira, vi na ta ke visia tanga.
41Na oruta na matena ngaia ki aporo me, ma ki vi tangara, ki vi: “I hega, mu mêru ma kamu mamaro mênga? I arari noga! Nga na matena ngekê! Bâ, i na matena nga ngekê ka mahatangenia igê o Karena Enoni tangara na enoni era. 42Aharaga! Ke râ! Bâ, na mane, i hagavuringeniê, ikana!”
Ga hagatotongoa o Jesu
(Mt 26.47-56; Lk 22.47-53; Jn 18.3-12)
43Ngaia ki tamasi mênga, matena i ata me o Juta. Ngaia ki na hitangita na kariana tangahuru matarerua. Kere rako na enoni ga râ me henia. Ngaira ka tora na tatapa borahu ma na tarure. Na meraha, na mani ni vogasiha ga teha ma na mane ni hagesuringa ni rotu ka hagatorangenira. 44Na mane, i hagavuringenia o Jesu, ki bani hagarari tangara na enoni, ki vi: “Na mane, gê siginia, ngaia nga. Mu hagatotongoa ma kamu torea vê, ma kamu bâbâsuria maninga i tara.”
45O Juta, matena i ata me, ngaia ki oto râ tanga o Jesu, ma ki vi: “Araha,” ma ki siginia. 46Ngekana ngaira ka hagatotongoa o Jesu, ka ruia ma ka têa gatagata. 47Ma ta na mane, i oga i ngekana henira, ki amuria kê na tatapa borahu ma ki tahurua renia na kare vurivuri iana na mane ni vogasiha i teha, ma ki retea takia na karingana. 48Mo Jesu ki tamasi tangara, ki vi: “Hega kanimu migirâ me na tatapa borahu ma na tarure, hanana vi gamu hagatotongoê? Na manero vari kani inê? 49Na ara ni tangiana inê kê bani gâga me henigamu ma kê hagesurigamu i Ruma ni Rotu, ma igamu kamu pe bani hagatotongoê. Ma ki koro ma, ga hagamonaria na marâ, i visia na Buka Apuna.” 50Ma ngaira hato na kariana ka gava vê ka râ pania.
51Ta na mane haoru ki râ suria o Jesu. Ngaia ki hagesuru ma renia na gahu tatarasi. Ngaira ka uhungia, vi ga hagatotongoa. 52Ma ngaia ki tasia na gahu tatarasi, ma ki gava vê ki râ rupaturi.
O Jesu i maata na maneraha igê na Kaunselo
(Mt 26.57-68; Lk 22.54-55, 63-71; Jn 18.13-14, 19-24)
53Ma ngaira ka torea râ o Jesu i pasina na mane ni vogasiha i teha. Ma i ngekana ka haku me igê na mane ni vogasiha ga teha, na meraha, ma na mane ni hagesuringa ni rotu. 54O Petero ki mumuri me, ma ki banu i beraro i ruma iana na mane ni vogasiha i teha. I ngekana ngaia ki oga so henira na mane ni me, hanana i rangia na gi. 55Na mane ni vogasiha ga teha ma na Kaunselo hagenani ka uhungia, vi ge tarahua ta na tarana era i pasina o Jesu, hanana vi ge hagamesia, ma ki asa, vige tarahua rârâ ta na marâ. 56Na enoni rako ka hagaparu renia o Jesu, ma na tamasinga iata ki râ hehegitigi ngavê.
57Ma hemuri tani na mane ka ura aharaga ma ka hagaparu vikê renia o Jesu, ka vi: 58“Igami kami rongoa, i vi, ‘Inê kê page hogea na Ruma ni Rotu ikê, na ani ga tagarahia na enoni, ma i murini na tangiani gi oru inê kê page tagarahia na ani, i bara na enoni, vi ge tagarahia.’” 59Ma na tamasinga iata ka râ hehegitigi nikâ.
60Na mane ni vogasiha i teha ki ura aharaga i maata na mane hato, ma ki hagatea o Jesu, ki vi: “I asa vari, vi gu aramigi na tuguriha iata renigo?” 61Mo Jesu ki muni ma, ma ki usi, vi ge tamasi. Ma na mane ni vogasiha i teha ki hagatea nikâ, ki vi: “Na Mesaia igo, o Karena God vari kani igo?” 62O Jesu ki arami, ki vi: “Inê nga. Ma igamu hato kamu page bâsia o Karena Enoni, i gâga so henia God raramohaga hunia igê na atohana, ma ki page arâ me igê na vaha i vavearo.”
63Na mane ni vogasiha i teha ki tarisigi na tuguni iana, ma ki vi: “I uhu noga. Igia ka pe obania nikâ ta na enoni vige tamasia! 64Igamu kamu bani rongoa noga, vi ngaia ki tamasi erasia God. Na ta kanimu takusia?” Ngaira hato ka suria ka hagaitangia, ka vi: “Ngaia ki tarahua monari na bevoa, ma ki araria, vi ga hagamesia.”
65Tani ka haganega ka musuria o Jesu, ma ka bara pusigi na maana, ma ka tahurua. Ngaira ka vi: “Mêsigo ma ko girara, vi o ti kani tahurugo!” Ma na mane ni me ka torea ma ka bahitaria.
O Petero ki hagaiga pusia marena renia o Jesu
(Mt 26.69-75; Lk 22.56-62; Jn 18.15-18, 25-27)
66O Petero ki gâga mênga i beraro i ruma matena i râ me ta na kere gete tagara iana na mane ni vogasiha i teha. 67Matena i bâsia o Petero, i rangia na gi, ngaia ki boretenia, ma ki vi: “Igo nikâ ka na kariana o Jesu ni Nasarete.” 68Ma ngaia ki hagaiga. Ngaia ki arami, ki vi: “Inê kê pe girara. Inê kê pe rongogirara na ta go visia!” Ma ngaia ki râ vê tanga na maa ni ruma. Me na matena ngekana ki angi igê na kua mane.
69Na kere gete tagara ki bâsia râ ma ki haganega ki tamasi nikâ tangara na enoni, ga oga i ngekana, ki vi: “Na hitangita kani ngaia!” 70Mo Petero ki hagaiga nikâ. I na kere matena i muri na enoni i ngekana ka vi tanga nikâ o Petero, ka vi: “Siana ko hagaiga pusigo maremu vi igo ki mareha vi na hitangita, suria igo nikâ ka na mane i Galilea!” 71Mo Petero ki tohe, ki vi: “Inê kê tohe renia God, vi inê kê tamasi monari! Inê kê pe hagarea na mane, mu visia!”
72Ma na matena ngekana ta na kua mane ki angi nikâ, na ruata, mo Petero ki takusia aporo na marâ, i bani visia o Jesu tanga ki vi: “Hageoru igo ko page hagaiga pusigo maremu reniê, ma hemuri ki kahu angiangi hagerua na kua mane.” Ma ngaia ki rugu bâraha na obana ma ki angi.
Àwon tá yàn lọ́wọ́lọ́wọ́ báyìí:
MAREKO 14: KCB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2011 Bible Society of the South Pacific
