MAREKO 13
13
O Jesu ki tamasi renia na hagaerasiana na Ruma ni Rotu
(Mt 24.1-2; Lk 21.5-6)
1Matena o Jesu ki pania na Ruma ni Rotu, na hitangita na kariana ki vi tanga, ki vi: “Bâ, Araha! “Na ruma na hê ki bâkoro era!” 2O Jesu ki arami, ki vi: “Mu bâsigi na ruma raha ngegê? Mareha vê rârâ tani na hê, vi ge oga gatagata igê na peregana; ngaigi hato ki page agorata so i ano.”
Na bagabevoana ma na henahuita
(Mt 24.3-14; Lk 21.7-19)
3O Jesu ki oga so igê na Hungana ni Olive, kere tarê tenia na Ruma ni Rotu, mo Petero mo Jakobo mo Joane mo Anterea ka râ me getera i pasina. 4Ma ngaira ka vi: “Visia me, i na keta kani page voravora me igê na tarana ngekana. Ma ko visia me, manga i he ki na girarana, hanana mi girara, vi ga page voravora me na tarani hato ngegana.”
5O Jesu ki haganega ki hagesurira, ki vi: “Mu bâsigamu! Ma siana ta na enoni ki hagabekasigamu. 6Rako na mane ka page arâ me ma ka hêtata mareta reniê inê, ka vivi, ‘Inê na Mesaia’, ma ka page hagabekasira rako na enoni. 7Ma siana kamu magu, matena mu rongogi na henahuita hagarangi ma na tarohani na henahuita hagatê. Na tarani ngegana ka page voravora me, ma ka mareha ge vi, vi ngaigi ka na hagahatongini na ara ni marâ hato. 8Na marê ki page henahunahu henia ta na marê; na gavumane ki page meheariha ta na gavumane. Ka page nunu igê na ara ni agua, ma ka page magê na enoni. Na marâ hato ngegana ka manga na mamasiaganiha iana na gete, i riki na gerina.
9“Mu bâsigamu maremi! Renia na enoni ka page hagatotongogamu, ma ka page hagakotigamu. Ka page ramusigamu i ruma ni sukuru; mu page ura i maata na maneraha ma na gavumane reniê inê, hanana mu hagarongora renia na Taroha Koro. 10Na enoni hato i maveta ki tuguhira ga rongoa hagenago na Taroha Koro. 11Ma na matena ga hagatotongogamu ma ka hagakotigamu igê, siana kamu bani anumanuma igê na aitangihami renigi na marâ, mu page visigi. Ma igê na matena ngekana igamu kamu page visigi ma na ani mavê na marâ, God i hagatakusigamu renigi. Renia na tamasinga, mu visigi, ka mareha vi na tamasinga iami maremi; ngaigi hete ka na tamasinga, na Higona Apu i page vategamu renigi. 12Na mane ki page hagatotongoa o goana ma ki page hagamesia. Na mane ki page hagatotongora na karena ma ki page hagamesira. Na kare ka page urapusira na enata ma ka page hagamesira. 13Ngaira hato na enoni ka page kitenigamu reniê inê. Ma na enoni, i gatagata ka nahuia na merongana, ngaia ki page tahi.
Na Eraha Raha
(Mt 24.15-28; Lk 21.20-24)
14“Mu page rigia na ‘Eraha Raha’, i gâga igê na agua, i apu tanga vige gâga igê.” (Na enoni, i tomania na tarana ngekê, ki tuguhia, i rongorongogirara nga vi na ta ki na girarana na tarana ngekê.) “Ma ki koro, na enoni i Jutea ka gavagava tangagi na hungani. 15Na mane igê na gerina na ruma iana ki tuguhia, i vatovato rêrê, ma siana ki bêbanu i ruma, hanana vi torea ta na marâ henia. Siana ki kakaviaga. 16Na mane, i gâga i mu iana, siana ki aporo i ruma, hanana vi torea na tuguni iani. 17Na matena ngekana, e, ki aera ngavê tangara na gete, ga obara, ma na gete, ga hagasusu kare! 18Mu nungia God, hanana siana ka voravora me na tarani ngegana igê na matena na rogaroga huru. 19Renia na bagabevoana igê na tangiani ngegana ki page era ngavê teharigi na ani mavê na bagabevoani igê na maveta, tenia na haganegahana, matena God i hagavora igê na maveta, mataro me i ngekê. Ma ki asa, vi ge page vora me nikâ na bagabevoana manga na ani ngekê. 20Ma na Araha ki bani hagabubua na bevoana, siana ka rakorako na tangiani. Manga i mareha, ki asa hagetage, vi ge tahi ta na enoni. Ma renira na kariana, i bani atera, na Araha ki bani hagabubua na bevoana ngekana.
21“Hoi, manga ta na enoni, ma ki vi tangagamu, ki vivi, ‘Bâ, na Mesaia ikê!’ se ‘Bâ, ngaia ikana!’ siana kamu tongesuria. 22Suria na mesaia hagaparu ma na poropete hagaparu ka page vora me. Ngaira ka page katogi na mena ma na tagaraha, ga hagakonera na enoni renigi, hanana vi ga hagaparura na enoni, God i bani atera, manga i pe asa tangara. 23Mu bâsigamu! Inê kê bani vi tangagamu!
Na râha me iana o Karena Enoni
(Mt 24.29-31; Lk 21.25-28)
24“Surigi na tangiani i murina na bagabevoana ngekana, ki page meme na arito, ma ki hato, vi ge mave na hageha. 25Ma na higu ka page vota so tenia na vavearo, ma na raramohana na vavearo ki page hato. 26Hemuri o Karena Enoni ki page voravora me, i arâ me igê na vaha. Ngaia ki raramohaga hunia ma ki bâbâ hahanetaga ngavê. 27Ngaia ki page hagatorangenira na angero tangagi na apaneni ge he heri na maveta, ma ki page hagahakura na enoni, God i bani atera tenia ta bogona na maveta tanga ta bogona.
Na maramaraveta renia na apinige na fiki
(Mt 24.32-35; Lk 21.29-33)
28“Ge hagesurigamu na apinige na fiki. Matena na arani ka bâgo ma ka makamakaga, ma ka voravora me na ahani, igamu kamu girara, vi i hagarangi me noga na matena na hutohutoêa. 29I tagenana ma, matena mu bâsigi na tarani ngegana, ga voravora me, igamu kamu page girara, vi i hagarangi me noga na matena, ma ki bani nanê noga. 30Mu rongo! Na tarani hato ngegana ka page voravora me, ma tani na enoni, ga gâga i na matena i ngekê, ka page bâsigi. 31Na vavearo ma na maveta karu page hato, ma nga noga ma na tamasinga iaku ka gâga tare ma tarema.
Ga pe girara na tangiana se na bevoana
(Mt 24.36-44)
32“Mareha ta na enoni ge girara, vi i na keta kani page arâ me igê na tangiana ngekana se na bevoana ngekana. Nikâ na angero iana God ka pe girara nogata. Mo Karena ki pe girara nogana. Ngaia getea ma o Vaemana kani girara. 33Mu onono ma mu bâbâ, renia mu pe girara, vi i na keta ki page arâ me igê na bevoana ngekana. 34Ngaia ki manga na mane, i pania na hinua iana, ki râ igê na râha iana, ma ki hagatorara na enoni tagara iana, ka tonganigi na tagaraniha. Ma ngaia ki vi tanga ta na mane ki bâbâsuria na ruma. 35Tahema mu bâbâ, renia igamu kamu pe girara, vi i na keta kani page aporo me igê na avanuna na ruma: i manurahi vari, se i gupu na bungiana vari, se igê na kahuagana na tangiana vari, se i mavoraro vari. 36Manga i hagakakangi me, siana ki tarahugamu, vi gamu kamu mauru! 37Na marâ, gê visia tangagamu, ki ararira na enoni hato: mu bâbâ.”
Àwon tá yàn lọ́wọ́lọ́wọ́ báyìí:
MAREKO 13: KCB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2011 Bible Society of the South Pacific
