MAREKO 12
12
Na maramaraveta renira na enoni ga taharia na mu ni vaini
(Mt 21.33-46; Lk 20.9-19)
1Mo Jesu ki tamasi maramaraveta tangara, ki vi: “Ta na mane ki hasia na mu ni vaini, ma ki panga rihia, ma ki oparia na kiru tanga na rusi i piringigi igê na guani na vaini, ma ki torea na bebetehe. Ma hemuri na enoni tagara ka taharia na mu ni vaini, ma na avanuna na mu ni vaini ki aporo igê na râha iana tanga i pasina. 2Ma na matena i mata na guani, ngaia ki hagatorangenia ta na kare vurivuri tangara na enoni ga tagara, hanana vi ga metongani renigi tani na vaini. 3Ma na enoni tagara ka ranguia, ma ka ramusia, ma ka hagatorangenia vê baguru. 4Me muri na avanuna na mu ni vaini ki hagatorangenia nikâ ta na kare vurivuri. Na enoni tagara ka tahurua na bêna, ma ka guharia ka hagamakia. 5Na avanuna na mu ni vaini ki hagatorangenia nikâ ta na kare vurivuri, ma ngaira ka nahuia ki me. Ma ngaira ka katora vikana nikâ rako na kare vurivuri getera: ga ramusira tani ma ka nahuira ka me tani. 6Na ani gi tage ma na kare kani hita so, hanana vi na avanuna na mu ni vaini ki girara vi hagatorangenia nikâ. Na ani ngekê ngaia ki no karena i takuia baraha. Hoita, ngaia ki hagatorangenia o karena ngekana tangara na enoni tagara. Ma ngaia ki vi, ‘Inê kê girara, vi ngaira ka page hanetasia o kareku.’ 7Ma na mane tagara ngegana ka hetamatamasi, ka vi, ‘O karena o avanuna na mu ni vaini ngekana! Nika, ge nahuia ke me, ma ka page nahunia igia na mu ni vaini!’ 8Tahema ngaira ka ranguia o karena ma ka nahuia ki me, ma ka kasia hura na gahuana tenia na mu ni vaini.”
9O Jesu ki hagate, ki vi: “Hoi, ta kani page katoa na avanuna na mu ni vaini? Ngaia ki page arâ me, ma ki page nahuira ka meme na mane ngegana, ma na ani getera na enoni tagara ka page taharia na mu ni vaini. 10Igamu kamu bani tomania noga na tarana ngekana igê nga na Buka Apuna!
‘Na u, ga kasia na mane, ga torea na ruma,
renia vi pe koro,
na u ngekê ki vora na rangata na hagêguringa.
11Na Araha ki katoa tarana ngekana,
ma ki bâkoro era!’”
12Na meraha iata na Siu ka uhungia, vi ga hagatotongoa o Jesu, renia ga girara, vi ngaia ki tamasi maramaraveta renira ngaira. Ma ngaira ka magutenira na enoni. Tahema ngaira ka pania so o Jesu ma ka hetake vê ka râ.
Na hagatenga renia na vuriha ni takesi
(Mt 22.15-22; Lk 20.20-26)
13Ma tani na Pariseo ma tani na kariana o Herote ka râ me, hanana vi ga uhungia o Jesu renigi na hagatenga. 14Ngaira ka râ me tanga, ka vi: “Araha, igami kami girara, vi igo ki mareha ngavê, vi gu hagahagaparu. Igo ko tamasi monari tare. Igo ki na mane haritagi, renia na parongamu ki tagenana ma tangara na ara ni enoni, ma ko visigi ma na marâ, God i obanira na enoni, vi ga katogi. Hoi, gu visia me: surigi na Ramata iaka i na Buka Apuna ki koro ma vari, vi ga vuria na takesi tanga na Gavumane i Roma se mareha? I tuguhigia, vi ga vurivuri takesi se mareha?”
15Mo Jesu ki girara na katokato iata, ma ki aramira, ki vi: “I hega mu uhungiê? Me na haga be bâsia!” 16Ngaira ka vatea na maana gi tage, ma ngaia ki hagatera, ki vi: “Na nununa ma na atana o ti kani ikê?” Ngaira ka arami, ka vi: “Na maneraha teha igê na gavumane.” 17Vikê o Jesu ki vi: “Hoi, mu vatea na maneraha teha igê na gavumane na anina, ma kamu vatea God na anina God.” Ma ngaira ka konetenia ngavê.
Na hagatenga renia na mêriha aporo
(Mt 22.23-33; Lk 20.27-40)
18Tani na Satuseo ka râ me tanga o Jesu. (Ngaira ki na enoni, ga vi, vi na enoni, ga me, ki asa, vi ge mêri aporo.) 19Ngaira ka vi tanga o Jesu, ka vi: “Araha, o Moise ki bani segea na ramata ikê tangagia, ki vi: ‘Manga vi na mane, ma ki meme tenia ngaia kaniana, ma ki mareha, vi garu apara kare, ki tuguhia o vesina, vi auragia kehana i nâ ngekê, hanana vi garu apara kare tanga na mane, i me.’ 20Manga vi o vahegoata gi pi. Na mane i nago ki êragi, ki pe apara kare, ma ki me. 21Me muri na ruata na mane ki êragia kehana i nâ ngekê, ma ngaia ki pe apara kare nikâ, ma ki me. I tagenana ma henia na oruta na mane, 22ma henira heheuri na mane i murita. Ngaira hato o vahegoata gi pi ngegana ka êragia na gete ngekê, ka pe apara kare, ma ka me. Ma hemuri na gete ki me nogana. 23Hoita, matena ga mauri aporo na enoni, ga me, igê na tangiana ni mêriha aporo, o ti na hitangita kani kaniana? Suria ngaira hato o hegoata gi pi kaniga êragia!”
24O Jesu ki aramira, ki vi: “I bono na osumi! Mu bagatatako! Ma kamu girara vi manga i he? Renia igamu kamu pe girara na Buka Apuna, ma kamu pe girara God i raramohaga hunia. 25Renia matena ga mauri aporo na enoni, ga me, ngaira ka mauri mangara na angero iana God, ma na mane ma na gete ki asa, vi ge êragi. 26Hoi, renia na mauriha aporo: vari mu pe bani tomania na sihonga i na Buka iana o Moise renia na apinige, i noro? Renia i na buka ngekana God ki bani vi tanga igê o Moise, ki vi, ‘Inê na God iana o Abaramo, inê na God iana o Isako, minê na God iana o Jakobo.’ 27Tahema ngaia ki na God iata na enoni, ga mauri, mareha vê vi iata na enoni, ga me, suria na enoni ka pe meme su ngavê. Igamu na Satuseo, kamu tasi nga vê!”
Na ramata na ani i teha
(Mt 22.34-40; Lk 10.25-28)
28Ta na mane ni hagesuringa ni rotu ki oga i ngekana, ma ki rongora, ga hetamasi. Ngaia ki rongoa o Jesu, i aramira bâkoro na Satuseo. Tahema ngaia ki râ me tanga o Jesu, ma ki hagatea, ki vi: “Na ramata ta ki teha?” 29O Jesu ki vi: “Na ramata, i teha, ki manga ikê: ‘Rongo, igamu na Isiraelita! Na Araha, na God iaka, ki na Araha gi tage togo. 30I tuguhigamu, vigamu takuia na Araha God iami igê na mêrihami hagenani.’ 31Na ruata na ramata, i teha, ki manga ikê: ‘I tuguhigamu, vigamu takuira na tamani manga igamu maremi.’ I mareha ta na ramata getea, vi ge teharirerua na ramata gi rua ngegê.”
32Na mane ni hagesuringa ni rotu ki vi tanga o Jesu, ki vi: “Go vi koro era, Araha! I monari manga go visia: na Araha ngaia getea ma ki God, ma ki mareha vê, vi ta na God getea. 33Tahema ki tuguhia na enoni, vi takuia God igê na mêrihana hagenani, ma ki tuguhia, i takuia na tamana manga ngaia marena. Na enoni, i marupererua na ramata gi rua ngegê, ngaia ki koro teharia na enoni, i susu tanga God igê na bea ni vogasiha se i vogasia God.” 34O Jesu ki girara, ngaia ki arami koro era, ma vikê ngaia ki vi tanga, ki vi: “Igo ko têa noga na Arahanga iana God.” Ma hemuri ki mareha ta na enoni, ge magu, vi ge hagatea nikâ o Jesu.
Na hagatenga renia na Mesaia
(Mt 22.41-46; Lk 20.41-44)
35Matena o Jesu i hagesurira na enoni i Ruma ni Rotu, ngaia ki hagatera, ki vi: “Tanu hega na mane ni hagesuringa ni rotu kaniga visia, vi na Mesaia, i page voravora me, vi ngaia ki no karena o Tavite? 36Na Higona Apu ki hagatakusia o Tavite, ki vi:
‘Na Araha ki vi tanga na Araha iaku, ki vi:
Gu oga so heniê igê na atohaku,
mataro me na matena gê nakara na merongamu
i ruguhaterua na êgamu.’
37O Tavite ngaia marena ki visia, vi Araha. Hoi, ma ki tanu hega na Mesaia kani girara i voravora vi na karena o Tavite?”
Mu hinarura na mane ni hagesuringa renigi na Ramata
(Mt 23.1-36; Lk 20.45-47)
Na hakuta raha na enoni ka vagevage, matena ga rongoa o Jesu i tamasi. 38Matena i hagesurira, ngaia ki vi: “Mu hinarura na mane ni hagesuringa ni rotu. Renia ngaira ka tuguni renigi na tuguni borahu, ma ka arârâ, ma ka obanira na enoni getera, vi ge hanetasira igê na mahera. 39Ngaira ka obania, viga gâga igê na atohata na maneraha i ruma ni sukuru, ma ka obania, vi ga gâga igê na atohata na maneraha igê na matena ni ngêra. 40Ngaira ka hagabekara na gete, ga nâ, ma ka hanagogi na nahuninga iata. Ma hemuri igê na nunginungiha borahu iata ngaira ka hagaparu ma! Ngaira ka page hatamia ngavê na mamasiaganiha.”
Na votovoto iana na gete na nâ
(Lk 21.1-4)
41Matena o Jesu i oga so hagarangia na agua ga hakuhaku haga igê i na Ruma ni Rotu, ngaia ki boretenira na enoni, ga hakuhaku haga tanga na rotu. Rako na enoni ruruguha ka kasi na haga raha i rarona na bokesi. 42Ma ki râ me nikâ na gete na nâ, i matareha, ma ngaia ki kasia na kere haga sisite ma i rarona na bokesi: na senti gi rua ma vari. 43O Jesu ki unira me haku na kariana, ma ki vi tangara, ki vi: “Bâsia! Na nâ matareha ikê ki kasia i rarona na bokesi na haga, i raha teharigi na haga iata na enoni getera. 44Renia na enoni getera ka nahunigi bâraha na haga, ma ngaira ka kasi i na bokesi tani na haga, na ani ga pe obanigi tangara mareta, vi ge ngêngê renigi. Ma kamu bâsia na nâ ikê. Ngaia ki matareha ngavê. Henaka ma ngaia ki kasi hato ngavê na haga iana, na haga i obania, vi ngêngê renigi.”
Àwon tá yàn lọ́wọ́lọ́wọ́ báyìí:
MAREKO 12: KCB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2011 Bible Society of the South Pacific
