MAREKO 15
15
O Jesu i maana o Pilato
(Mt 27.1-2, 11-14; Lk 23.1-5; Jn 18.28-38)
1Igê na mahogotana na mane ni vogasiha ga teha, na meraha, ma na Kaunselo hagenani, ma na mane ni hagesuringa ni rotu ka hatani haku me ka hekarigi. Ngaira ka rakua o Jesu renia na seni, ma ka torea râ, ka tagarenia tanga o Pilato. 2O Pilato ki hagatea, ki vi: “Igo vari nga na Araha raha iata na Siu?” O Jesu ki arami, ki vi: “Manga go visia.” 3Na mane ni vogasiha ga teha ka tuguria o Jesu renigi rako na mara. 4Vikê o Pilato ki hagatea nikâ, ki vi: “I asa iamu, vi gu aramira? Bâ, ngaira ka tugurigo renigi rako na marâ!” 5Nikâ o Jesu ki usi, vi ge tamasi, mo Pilato ki konekone bâraha.
Ga suria ki me o Jesu
(Mt 27.15-26; Lk 23.13-25; Jn 18.39—19.16)
6Igê na ara ni Tangiana Raha na Paseka o Pilato ki rupasia tare tenia na ruma ni hagaitangiha na anima na mane, na enoni ga obania. 7I na matena ngekana ta na mane, o Baraba na atana, ki oga i ruma ni hagaitangiha. Ngaia ma na tamana ka nahu enoni, matena ga urapusia na gavumane. 8Bevoana ga haku me na enoni, ngaira ka nungia o Pilato, vi rupasia ta na mane pania na ruma ni hagaitangiha. 9O Pilato ki hagatera, ki vi: “Igamu kamu obania vari, vi gê rupasia tangagamu na Araha raha iata na Siu?” 10Ngaia ki bani girara bâkoro, vi na mane ni vogasiha ga teha ka tagarenia o Jesu tanga, suria ngaira ka hengari.
11Ma na mane ni vogasiha ga teha ka vi tangara na enoni, ka naka vê o Jesu, ma ka nungia o Pilato, vi rupasia o Baraba tangara. 12O Pilato ki tamasi nikâ tangara na enoni, ki vi: “Na ta kanimu obania, vi gê katoa tanga na ani mu hêtana, vi na Araha raha iata na Siu?” 13Ngaira ka ngiria bê aporo, ka vi: “Rapusia igê na kuruse!” 14O Pilato ki hagatera, ki vi: “Na tarana era ta kani erasia?” Ngaira ka ngerengere ramo, ka vivi: “Rapusia igê na kuruse!” 15O Pilato ki obania, vi hagakoro obata na enoni, tahema ngaia ki rupasia o Baraba tangara. Ma hemuri ngaia ki bonasira na mane ni me, ka ramusia o Jesu, ma ka rapusia igê na kuruse.
Na mane ni me ka memarabe o Jesu
(Mt 27.27-31; Jn 19.2-3)
16Na mane ni me ka mebanu o Jesu igê na beraro i ruma. (Ngaia ki na ruma raha iana na Gavumane.) Ma na mane ni me ka unira haku me na tamata. 17Ngaira ka aruha o Jesu renia na gahu rotorotoaga memera, ma ka hêria na mahe renigi na varo kakaruga, ma ka bagia i bêna. 18Ma ngaira ka kasi rurunga huria, ka vi: “Mauru koro, Araha raha iata na Siu!” 19Ma ngaira ka tahurua na bêna renia na apinige, ka musuria, ka susure i maana ma ka bêtuhia. 20Matena ga memarabe hato, ngaira ka tasia na gahu rotorotoaga memera, ma ka hagatugunia aporo renigi na anina marena. Ma hemuri ngaira ka mehura, hanana ga rapusia igê na kuruse.
Ga rapusia o Jesu igê na kuruse
(Mt 27.32-44; Lk 23.26-43; Jn 19.17-27)
21I tara ngaira ka tarahua igê ta na mane, o Simone na atana, i aporo me i hinua raha tenia na bemu, ma ngaira ka tuguria, ki torea na kuruse iana o Jesu. (Na mane ngekê ki no Simone ni Sairini, o vaematerua o Alesanta mo Rupo.) 22Ngaira ka merâ o Jesu tanga na agua, ga visia vi Gologota, i vi “Na Agua ni Ratana Bê”. 23I ngekana ngaira ka uhungia, vi ga hagatonomia renia na vaini, ga toraria henia na rauga na mira, mo Jesu ki usi, vi ge tonomia. 24Hemuri ngaira ka rapusia igê na kuruse, ma ka pile taisi renigi na gahu iana, hanana vi ga girara, vi o ti kani page nahunia tani na gahu. 25I ahakê na arito, matena ga rapusia igê na kuruse. 26Ngaira ka segea na marâ, ga tuguria renia, ga sege ka vi: “Na Araha raha iata na Siu.” 27Ngaira ka rapusirerua nikâ na manero gi rua, na ani i otona ma na ani i mahana o Jesu. 28Vikana ngaira ka hagamonaria na marâ na Buka Apuna i bani visia, ki vi: “Ga tomania henira na manero.”
29Na enoni, ga hetaratarari, ka babaringe ma ka guharia o Jesu, ka vi: “Se vego! Igo ko bani visia, vi go hogea na Ruma ni Rotu ma ko torea aporo surigi na tangiani gi oru! 30Hoi, gu so me tenia na kuruse ma ko hagatahigo maremu!”
31Ma ngaira nogata na mane ni vogasiha ga teha ma na mane ni hagesuringa ni rotu ka memarabe o Jesu, ka hetamatamasi, ka vi: “Ngaia ki hagatahira na ani getera, ma ngaia so marena ki asa. 32Ge bâsia na Mesaia, na Araha raha iata na Isiraelita, i soso me tenia na kuruse i ngekê, ma ka kahu tongesuria!” Ma na manero gi rua, ga rapusirerua henia o Jesu, ngairerua nikâ karu guharia o Jesu.
I me o Jesu
(Mt 27.45-56; Lk 23.44-49; Jn 19.28-30)
33Igê na ritovagana ki roto na agua hagenani, mataro me ki pane na arito. 34Igê na panehagana na arito o Jesu ki ngere raha, ki vi: “Eloi, Eloi, lema sabakatani?” i vi, “God iaku, God iaku, hega go paniê?” 35Tani na enoni i ngekana ka rongoa ma ka vi: “Rongo, ngaia ki unia o Elia!” 36Ta na hitangita ki metango râ na rumurumu, ki anumia igê na vaini, ma ki naka igê na bogona na apinige. Ma hemuri ngaia ki tagarenia akê, hanana vi hagatonomia o Jesu renia, ma ki vi: “Naka, ke bâ, o Elia vari ki arâ me ki torea vato tenia na kuruse!”
37O Jesu ki ngere raha ma ki me.
38Na gahu raha, i kuku i Ruma ni Rotu, ki tatari hagenani i gupu. 39Na araha iata na mane ni me, i ura i ngekana, ki maturia na kuruse, ma ki bâsia, manga hanana o Jesu i ngere raha ma ki me. Ngaia ki vi: “I monari, na mane ngekê ki no Karena God.” 40Tani na gete, ga oga i ngekana, ka ura hagatê, ma ka bâbâ me. I berarogata ka oga ka Salome, ka Maria Matalena, ma ka Maria na kenaterua o Jakobo sisite mo Jose. 41Ngaira ka takua o Jesu, matena i gâga i Galilea, ma ka tamania. I ngekana ka rako nikâ igê na gete, ga râ me henia tanga Jerusaleme.
Ga naka o Jesu
(Mt 27.57-61; Lk 23.50-56; Jn 19.38-42)
42I bungi noga, matena o Josepo i Arimatea ki ata me. 43Ngaia ki na mane, ga hanetasia igê na Kaunselo. Ngaia ki naasia na Arahanga iana God. I ngekana ki na tangiana, ga tatêha igê. (Ngaia ki na tangiana i nago tarana na Tangiana ni Mamaroha.) Vikê o Josepo ki pe magu ma ki râ i pasina o Pilato ki nungia na gahuana o Jesu. 44O Pilato ki kone, renia i rongoa, vi o Jesu ki bani me. Ngaia ki unia me na araha iata na mane ni me, ma ki hagatea, manga vi o Jesu ki bani me. 45Matena i rongoa hato na tamasinga iana na araha iata na mane ni me, o Pilato ki vi tanga o Josepo, ki torea na gahuana o Jesu. 46O Josepo ki vuria na gahu siki, ki torea vato na gahuana o Jesu, ki baraia renia na gahu siki ma ki naka igê na vaba, ga bani karua igê na hê. Hemuri ngaia ki purisia na hê raha ma ki purusia renia na maana na vaba. 47Ka Maria Matalena ma ka Maria na kenana o Jose karu bore suria, ma karu bâsia na agua, o Josepo i bagia igê na gahuana o Jesu.
Àwon tá yàn lọ́wọ́lọ́wọ́ báyìí:
MAREKO 15: KCB
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2011 Bible Society of the South Pacific
