Matayo 27

Jesu kughenzo hambiri ya Pilato

(Marko 15:1; Luka 23:1-2; Johana 18:28-32)

1Nao kughenda kucha, wakohani wabwaa wose na waghosi wa wandu wakadea njama wamuulaghe Jesu. 2Wakamfunga na minyororo, wakamlongoza na kumfunya kwa Pilato mubwaa wa lyilya isanga.

Kifwa cha Juda

(Madeo 1:18-19)

3Nao Juda uyu amufunyile aona kamba Jesu wataghanyo, kariha na kauja zilya pesa mirongo mitatu kwa wakohani wabwaa na waghosi. 4Keghora, “Nanadeile kaung'a yemufunya mundu sekosile aulagho.” Nawo wakamuza, “Isi tatakiani? Agho ni ghako uwe mwenyi.” 5Naye kazikumba zilya pesa Hekaluni, kauya kaghenda kakunyora mwenyi. 6Wakohani wabwaa wakazishowa zilya pesa, wakaghora, “Kwanarighidogho kuziika kele isanduku lya pesa lya Hekalu, kwani ni pesa za bighati.” 7Kwa hung'u wakadea njama, wakaghula nazo mbuwa ya muumbi nyungu kwa undu ghwa kuzika wagheni. 8Kwa hung'u ilya mbuwa yanaitogho mbuwa ya bighati hata lelo. 9Nao lyikakatila ilagho lyeghoriro ni tondolo Jeremia, keghamba, “Nao wakausa pesa mirongo mitatu zoghori yake uyu aikililo ni wana wa Israeli, 10nawo wakaghula nazo mbuwa ya muumbi nyungu selyi Bwana enilaghize.”

Pilato kumukotela Jesu makotelo

(Marko 15:2-5; Luka 23:3-5; Johana 18:33-38)

11Nao Jesu kakala kimusi hambiri ya mubwaa wa isanga; naye mubwaa wa isanga kamkotela, “Ado uwe nuwe Mzuri wa Wayahudi?” Jesu katumbulila, “Uwe waghora hung'o.” 12Ela ashitakio ni wakohani wabwaa na waghosi satumbulile kindu chingi. 13Nao Pilato kamuza, “Ado susikilagha malagho wekushitakiagha nagho?” 14Ela Jesu satumbulile hata ilagho lyingi; kwa hung'u mubwaa wa isanga kashinika na ndighi.

Jesu kutaghanyo kufwa

(Marko 15:6-15; Luka 23:13-25; Johana 18:39—19:16)

15Nao ngelo ya karamu ya Pasaka yeluo ni ada ya mubwaa wa isanga kuwafungulila wandu mfungo mumoju wamshaile. 16Na ilya ngelo koluo na mfungo mumoju emanyikane aitogho Baraba. 17Nao wandu waghenda wakoghana, Pilato kawauza, “Nani mushaile nimufungulile? Baraba ango Jesu aitogho Masihi?” 18Kwani omanyile kamba wendemfunya kwake kwa undu ghwa kumwonela iziso.

19Ngila mojori na hung'u, ilyi Pilato eluo kemutaghanya Jesu, mkwake katuma uvoro keghamba, “Swakale na ilagho lyingi na uyo mundu wa hachi, kwani nanasirime na ndighi ihwayu nikeloteso ighulu yake.” 20Nao wakohani wabwaa na waghosi wakawashoterea wandu walombe Baraba afungulo na Jesu aulagho. 21Nao mubwaa wa isanga kawakotela sena “Ni uyo wa awa waili mushaile nimufungulile?” Nawo wakaghora, “Baraba.” 22Pilato kawakotela “Ndamu nimudee ije Jesu aitogho Masihi?” Wose wakaghora, “Mwambe!” 23Nao Pilato kawauza, “Kudani, kwani ni ikosa muni adea?” Ela wakakema wose na ndighi, “Mwambe.” 24Nao Pilato aghenda aona sedimagha kindu chingi na zuhe yeluo ikedyowa, kawata meji kaoghesha mikonu yake hambiri ya makoghano keghamba, “Imi siwesi ikosa lyingi kwa kifwa cha uyu mundu! Agho ni ghenyu inyo wenyi.” 25Nao wandu wose wakatumbulila, “Bighati yake ikale ighulu yetu na wana wetu.” 26Nao Pilato kawafungulila Baraba; na Jesu aghenda achapo, kamfunya awambo.

Askari kumusholela Jesu

(Marko 15:16-20; Johana 19:2-3)

27Nao askari wa Pilato wakamungiza Jesu kele nyumba ya uzuri iitogho Praitorio, na wakakoghana wose hambiri yake. 28Nao wakamfunya nguo zake wakamrwarisa kanzu ya ngundu. 29Nao wakaluka kofia ya miya wakamungiza chongo na wakamuikila mtomoko kele mkonu ghwake ghwa kijo; nao wakadyaya ngokoro hambiri yake wakamsholela, “Sere Mzuri wa Wayahudi!” 30Wamchila mate, wakausa ghulya mtomoko wakamriba nagho chongo. 31Nao waghenda wamalila kumsholela, wakamfunya ilya kanzu ya ngundu, wakamrwarisa nguo zake zenyi, na kumlongoza noko kumwambo.

Jesu kuwambo

(Marko 15:21-32; Luka 23:26-43; Johana 19:17-27)

32Nao ilyi weluo wekefuma, wakakoghana na mundu mumoju wa Kurene aitogho Simoni, wakamfunganyizila uyu mundu kutuka msalaba ghwa Jesu. 33Nawo wafika andu kuitogho Golgotha, kutambula kwake “Ngomeni.” 34Wakamhawa divei irunganyo na nyongo. Ela iye aghenda aitowa sainwele.

35Nawo waghenda wamwamba, wakasara nguo zake ghati yawe kwa kukwita kura. 36Nao wakakala kitembo alye wekemlinda. 37Na ighulu ya chongo chake wewandike mashitaki ghake, gheluo ghekeshomeka, “Uyu ni Jesu Mzuri wa Wayahudi.” 38Nao wavekuri waili wakawambo ngila mojori naye, mumoju mkonu ghwa kijo na mumoju mkonu ghwa kimosho.

39Wandu weluo wekeita wakamtukana na kusheghesha vongo vawe. 40Wekeghora, “Uwe ughorire uivunjagha Hekalu na kuiwaghala kwa majua matatu! Kukize uwe mwenyi. Ngera nuwe mwana wa Mlungu, selela msalabeni.” 41Hung'u kwenyi wakohani wabwaa na Walimu wa Sheria na waghosi wakamsholela wekeghamba, 42“Wanakizile wazima sedimagha kukukiza iye mwenyi! Iye ni Mzuri wa Israeli saselele ndamu kufuma kele msalaba, nesi tijemdumusa. 43Wanamdumusilagha Mlungu, Ndamu Mlungu samukize ngera amushaile, kwani oluo keghora, ‘Nimi Mwana wa Mlungu.’” 44Na walye wavekuri wewambanyo naye, nawose wakamsholela ukwenyi.

Kifwa cha Jesu

(Marko 15:33-41; Luka 23:44-49; Johana 19:28-30)

45Nao kufuma saa ndandatu hata saa kenda koluo na kiza isanga lyose. 46Nao saa kenda, Jesu kakema na lwaka lubwaa, “Eli, Eli, lama sabakthani?” Kutambula kwake, “Mlungu wangu, Mlungu wangu kudani wanisigha?” 47Nao wamoju wa walye weluo kimusi alye wasikila wakaghamba, “Mundu uyu ondempang'a Elija.” 48Nao mumoju wawe kakimbila shwa ngweri kausa sifongo, kaingiza kele siki, kaiika kele mrangi, kamhawa anwe. 49Ela wandu wamoju wakamuza, “Dafwa tione ngera Elija ukujagha amukize.” 50Nao Jesu kakema sena na lwaka lubwaa na kufunya roho yake.

51Nao iyo ngelo yenyi pazia ya hekalu ikazaika vindi vili, kufuma koighulu hata koisi, na isanga lyikanyavurika na nywala zikapaika. 52Mbira zikafunguka na mili mingi ya waeli wefwile ikazukiso. 53Nawo waghenda kufuma mbireni, nyuma ya kuzuka kwa Jesu wakaghenda muzi ghwa kuela, wakaonekana kwa wandu wengi.

54Nao ulya jemadari ngila mojori na walye wekezanye wekemlinda Jesu, waghenda waona mtetemo na ghalye ghadeike, wakangilo ni wogha wakaghora, “Fulo uyu oluo ni Mwana wa Mlungu!” 55Nao anyalye koluo wake wengi weluo wekezighana kufuma kakulele. Awa wemwirime Jesu kufuma Galilaya wekemtumikila. 56Wamoju wawe ni Mariamu Magdalene na Mariamu mee Jakobo na Josefu, na mee wana wa Zebedayo.

Kuziko kwa Jesu

(Marko 15:42-47; Luka 23:50-56; Johana 19:38-42)

57Nao kughenda kuswa, kukeja mundu mumoju wa Arimathaya eluo mzuri, aitogho Josefu, naye naese oluo mwirimi wa Jesu. 58Kaghenda kwa Pilato kalomba muli ghwa Jesu. Naye Pilato kaghora ahawo. 59Nao Josefu kausa muli ghwa Jesu kaghufunga na sanda ielile, 60kaghuzika kele mbira yake mbishi eyikotile kele lwala; kabingilisha iwe ibwaa kele mjango ghwa mbira kaibula, nao kaghenda ngila zake. 61Mariamu Magdalene na ulya Mariamu mumoju weluo kitembo alyenyi wekelola mbira.

Warindiri kele mbira

62Nao ilyo ikesho, ijua lya Sabato, wakohani wabwaa na Wafarisayo wakakoghana kwa Pilato 63wakamuza, “Bwana tikumbukagha selyi ulya mundu wa ndimi aghorire ngelo eluo moyo, kamba, ‘Nyuma ya majua matatu nizukagha sena.’ 64Kwa hung'u ghora mbira yake ilindo hata ijua lya katatu eri wairimi wake siwejeja na kughuiwa muli ghwake na kuuza wandu, ‘Wazuka kufuma kwa wafwa!’ Nazo ndimi izi za kudua zijekala ziwase kuchumba zilya za hambiri.” 65Pilato kawauza, “Muo na askari, ghendeni mlinde mbira selyi mudimagha.” 66Nao wakaghenda wakailinda mbira kwa kuika muhuri kele iwe na kuika askari.

Àwon tá yàn lọ́wọ́lọ́wọ́ báyìí:

Matayo 27: SAGALLANT

Ìsàmì-sí

Pín

Daako