Matayo 26

Njama yemulagha Jesu

(Marko 14:1-2; Luka 22:1-2; Johana 11:45-53)

1Nao Jesu amalila kughora izi ghore kawauza wairimi wake, 2“Mwamanya kamba nyuma ya majua maili kujekala Pasaka, na Mwana wa Mdamu ujefunyo awambo.”

3Nao wakohani wabwaa na waghosi wa wandu wakakoghana kele nyumba ya Mkohani Mubwaa eluo keito Kayafa, 4wakadea njama ya selyi wemwatagha Jesu kwa kiviso na wamuulaghe. 5Ela wakaghora siyakale ngelo ya karamu sikojekala na zuhe na wandu.

Jesu kuvilo mavuta alye Bethania

(Marko 14:3-9; Johana 12:1-8)

6Nao Jesu ilyi eluo Bethania kele nyumba ya Simoni mundu eluo na ukoma. 7Ngelo eluo kelya, muke mumoju kamjila na chupa ya alabasta ijule marashi gheo na zoghori mbwaa, kaghanyinyila kele chongo chake. 8Ela wairimi waghenda waona wakawasilo wakaghamba, “Kudani ghahakilo matuu? 9Ni Kumacho mavuta agha ghatagho kwa pesa nyingi na izo pesa zikahawo wakiwa.” 10Ela Jesu kemanya agha, kawauza, “Kudani mumusirimisagha uyu muke? Wanideila kazi yaloli. 11Kwani wakiwa muo nawo majua ghose, ela imi simkalanyagha nemi. 12Kwa kuninyinyila marashi kele muli ghwangu, waniika tayari kwa kuziko kwangu. 13Fulo namuza, andu kose kuchilogho ilyi Ilagho Lyaloli kele urumengu ghose, ilyi lyadeo ni uyu muke lyighorogho kwa ukumbuso ghwake.”

Juda kudumusa kumfunya Jesu

(Marko 14:10-11; Luka 22:3-6)

14Nao mumoju wa walye wairimi ikumi na waili, aitogho Juda Iskariote, kaghenda kwa wakohani wabwaa, 15kawauza, “Munihawagha kimuni ilyi namufunya kwenyu?” Wakamtalila pesa mirongo mitatu wakamhawa. 16Nao kufuma ilya ngelo Juda kahada ngila yemfunya.

Jesu kulya chakulya cha Pasaka na wairimi wake

(Marko 14:12-21; Luka 22:7-13,21-23; Johana 13:21-30)

17Nao ijua lya hambiri lya karamu ya mikate siyengizilo chachu, wairimi wakamjila Jesu wekemkotela, “Ni hiyo ushaile tighende tiboese ulya chakulya cha Pasaka?” 18Naye kawatumbulila, “Ghendeni kele muzi kwa mundu mumoju, na mumuze, ‘Mwalimu ughoragha, ngelo yangu yafika, nilyilagha chakulya cha Pasaka kele nyumba yako ngila mojori na wairimi wangu.’” 19Nao wairimi wakadea selyi Jesu awauzile, wakatayarisha chakulya cha Pasaka. 20Nao kufika hafukeni, Jesu kakala kitembo kulya na wairimi ikumi na waili. 21Na ilyi weluo wekelya kawauza, “Fulo namuza, mumoju wenyu ujenifunya.”

22Wairimi wakafurusa na kudyowa kughora mumoju mumoju, “Nimi Bwana?” 23Jesu katumbulila, “Uyu evililagha mkate kele bakuli nemi, niye mwenyi enifunyagha. 24Mwana wa Mdamu ufwighagha selyi Mawandiko gha Kuela ghaghora, ela ni bugha kwake uyu mundu emufunyagha Mwana wa Mdamu! Ni baha kwake uyu mundu ngera sevelo!”

25Juda ulya amufunyile kaghora, “Nimi Mwalimu?” Jesu kamtumbulila, “Uwe waghora.”

Kilalilo cha Bwana

(Marko 14:22-26; Luka 22:14-20; 1 Wakorintho 11:23-25)

26Nao ilyi weluo wekelya, Jesu kawata mkate, kaghubarikia, kaghuvunja na kuwahawa wairimi wake kewauza, “Wateni mulye, ughu ni muli ghwangu.” 27Nao kawata kikombe, naye aghenda amkasa Mlungu kawahawa kewauza, “Nweni ichi inyose. 28Iyi ni bighati yangu ya ilagano itikagha kwa undu ghwa wengi kwa kusigho kaung'a. 29Imi namuza, sinweghagha sena mavalo gha mzabibu hata ijua lyilya nijenwa uishi ngila mojori nenyo kele Uzuri ghwa Aba.”

30Nao waghenda waimba lumbo, wakafuma wakaghenda mghondi ghwa Mizeituni.

Jesu kutondola ighulu ya Petro kumkana

(Marko 14:27-31; Luka 22:31-34; Johana 13:36-38)

31Nao Jesu kawauza wairimi wake, “Mujenisigha inyose ichi kiro, kwani yanawandiko kele Mawandiko gha Kuela, ‘Nijemkwita mlisa na ng'onzi za uranu zijesaghasagha.’ 32Ela nikazukiso, nijemkayayila Galilaya.” 33Petro kamuza Jesu, “Hata ngera wose wejekusigha, imi sikusighagha.” 34Jesu kamuza, “Fulo nakuza, ichi kiro chenyi, hambiri ya jongole siyetetile ujenikana mandu matatu.” 35Petro kamuza, “Hata ngera ni suti nifwanye na uwe, sijekukana.” Na walye wairimi wamoju wose, wakaghora ukwenyi.

Jesu kulomba Gethsemane

(Marko 14:32-42; Luka 22:39-46)

36Nao Jesu kaghendanya na wairimi wake andu kuitogho Gethsemane, kawauza, “Kaleni kitembo aha nighende alye chambuko nilombe.” 37Naye kawatwala Petro na wana waili wa Zebedayo, kadyowa kufurusa na kusirima, 38naye kawauza, “Roho yangu yana furuse hata kifwa; kaleni aha mcherese ngila mojori nemi.” 39Nao kaghenda hambiri kuchache, kagwa hubu, kalomba, “Aba ikadimika kikombe ichi chesirima uniukisile; ela si selyi imi nishaile, sala selyi uwe ushaile.” 40Nao kawauyila walye wairimi, kawadoka watungura; kamuza Petro, “Ado simudimile kucheresa nemi hata kwa saa mojori? 41Chereseni na mlombe eri simwangile matimoni. Fulo roho yanashaile, ela muli ni mnyonge.”

42Nao kaghenda sena indu lya kaili kalomba, “Aba ngera ichi kikombe sichedimikagha chiite sechinwele, mashayo ghako ghadeike.” 43Nao kawuya sena kawadoka watungura, kwani meso ghawe ghegwaile.

44Nao kawasigha sena kaghenda kulomba indu lya katatu, keghora malagho ghalye ghenyi. 45Nao kauya sena kwa wairimi, kawauza, “Mwanatulagha mtungure na mkezumua? Loleni ngelo yafika na Mwana wa mdamu ujefunyo kwa wandu wa kaung'a. 46Ukeni, tighende, zighaneni ulya enifunyagha uwo avui!”

Kuwato kwa Jesu

(Marko 14:43-50; Luka 22:47-53; Johana 18:3-12)

47Nao ilyi Jesu eluo keghora, Juda mumoju wa walye wairimi ikumi na waili keja, ngila mojori na ikoghano ibwaa lya wandu weo na nyufu na rungu. Wafumile kwa wakohani wabwaa na waghosi wa wandu. 48Naye ulya amufunyile owahawile alama yewauza, “Uyu mundu nimususugagha niye mwenyi; mwateni.” 49Na Juda kamghendela Jesu, kamuza “Wasinda sere Mwalimu!” Nao kamususuga. 50Jesu kamuza, “Mgheni wangu, Dea ichi chakuleta aha.” Nao walye wandu wekeja wakamwata Jesu na kumuhasisa gi.

51Nao mumoju wa walye wekezanye na Jesu kafunya lufu lwake, kamtema msunyi wa mkohani mubwaa, kampasa kisikilo. 52Jesu kamuza, “Uja lufu lwako kele andu kwake, kwani wose wewatagha lufu wefwigha kwa lufu. 53Ado mwonderirikanya sidimagha kumlomba Aba na aseleze indakwenyi majeshi ghechumbagha ikumi na maili gha wana malaika? 54Ela Mawandiko gha Kuela ghekatilagha ije, agha ghaghora kamba ni suti ghakale hung'o?”

55Nao iyo ngelo yenyi Jesu kawauza makoghano, “Mweja na nyufu na rungu kuniwata sa muvekuri? Kila ijua neluo Hekaluni kitembo nikefundisa na simuniwatile. 56Ela agha ghose ghadeika eri Mawandiko gha Kuela gha wana tondolo ghakatile.” Nao wairimi wose wakamsigha wakakimbila.

Jesu hambiri ya Baraza

(Marko 14:53-65; Luka 22:54-55,63-71; Johana 18:13-14,19-24)

57Nao walye wandu wamwatile Jesu wakamlongoza hata kwa mkohani mubwaa Kayafa, andu Walimu wa Sheria na waghosi wekoghanike. 58Petro kamwirima kwa kulele, hata kafika kele nyumba ya mkohani mubwaa, kangila kakala kitembo na warindiri eri aone kudua kwake.

59Nao wakohani wabwaa na baraza yose wakahada ushuhuda ghwa ndimi ighulu ya Jesu eri wamuulaghe. 60Ela wakasowa hata ngera sani wanajile washahidi wengi wa ndimi. Ela kudua wekeja waili. 61Wakaghora, “Uyu mundu wanaghorire, ‘Nadima kuivunja hekalu ya Mlungu na kuiwaghala kwa majua matatu.’” 62Mkohani mubwaa kakala kimusi kaghora, “Ado suwesi ilagho lyingi lyetumbulila? Ni malagho muni awa wandu wekushitakiagha nagho?” 63Ela Jesu kanyamala kima. Nao Mkohani Mubwaa kamuza, “Ndekughemesa kwa Mlungu ewo moyo, utighorere ngera nuwe Masihi Mwana wa Mlungu.” 64Jesu kamuza, “Uwe waghora. Ela namuza, Nyuma ya agha, mujemwona Mwana wa Mdamu kekala kitembo kele mkonu ghwa kijo ghwa Mlungu wa Ndighi zose, keja na maengu gha mlunguni!” 65Nao aho Mkohani mubwaa karashura nguo zake, keghamba, “Wamutukana Mlungu. Nini sena tishailagha washahidi? Ba mwasikila inyo wenyi matukano ghake. 66Muonagha ije?” Nawo wakaghamba, “Yanamfweni afwe.” 67Nao wakamchila mate gha ushu na wakamukwita, na wamoju wakamubahala. 68Wekeghamba, “Titondolele uwe Masihi! Nani akukwita?”

Petro kumkana Jesu

(Marko 14:66-72; Luka 22:56-62; Johana 18:15-18,25-27)

69Nao Petro oluo kitembo shighati ya nyumba, kajilo ni mtumishi wa kichana, kamuza, “Uwe nawose okezanye na Jesu wa Galilaya.” 70Ela iye kalegha hambiri ya wandu wose, “Simanyagha agha ughoragha.” 71Naye aghenda afuma mjangoni mtumishi mumoju kamwona, naye kawauza wandu weluo kimusi alye, “Uyu mundu oluwanyo na Jesu wa Nazareti.” 72Petro kakana sena kaghema. “Simweni ulya mundu.” 73Nao kumukamuka kachache, walye weluo kimusi wakamjila wakamuza Petro, “Fulo nuwe mumoju wa wairimi wake, kwani kughora kwako kwakumanyisa.” 74Nao Petro kadyowa kuwanyiza na kughema keghamba, “Simweni uyu mundu.” Nao iyo ngelo yenyi jongole ikateta! 75Nao Petro kakumbuka malagho ghaghoriro ni Jesu. “Hambiri jongole siyetetile ujenikana mandu matatu.” Nao kafuma shighati kalila na ndighi.

Àwon tá yàn lọ́wọ́lọ́wọ́ báyìí:

Matayo 26: SAGALLANT

Ìsàmì-sí

Pín

Daako