Matayo 25
25
Ikataniso lya wachana ikumi
1“Niko aho Uzuri ghwa mlunguni ghujefwananiso na wachana ikumi wetwalile taa zawe, wakaghenda kumumarira bwana harusi. 2Wasanu weluo wapumbavu na wasanu weluo walachu. 3Kwani walye wapumbavu wetwalile taa zawe ela siwetwalile mavuta ghejuzila, 4ela walye walachu wetwalile mavuta kele chupa ngila mojori na taa zawe. 5Na kwa kukala bwana harusi omukile luma, walye wachana wose wakashonga na wakatungura. 6Ela na kiro kibwaa kukakwito lukalaghala, ‘Loleni bwana harusi weja, Njuuni mumumarire.’ 7Nao walye wachana wose wakauka wakawasha taa zawe. 8Nao walye wapumbavu wakawauza walye walachu, ‘Tisarireni mavuta ghenyu ghamoju, kwani taa zetu zendezima.’ 9Ela walye walachu wakawauza, ‘Sighetikatagha isi nenyo! Ni kirani mughende mughule ghenyu.’ 10Nao walye wachana wapumbavu ilyi weluo wekeghenda kughula mavuta, bwana harusi keja, na walye wachana wadokilo tayari wakangilanya naye kele karamu ya harusi na mjango ghukarugharo. 11Nao uko nyuma walye wachana wamoju wekeja nawose wekeghora, ‘Bwana, bwana tirughurire.’ 12Ela iye kawatumbulila, ‘Fulo, namuza simweni inyo.’” 13Nao Jesu kawauza, “Lindeni kwani simumanyagha ijua ango saa.”
Ikataniso lya watumishi watatu
(Luka 19:11-27)
14“Uzuri ghwa Mlungu ni sa mundu etambagha isanga lya kulele, apangile watumishi wake na kuwasighila mali yake. 15Kamuhawa mumoju pesa ziitogho talanta sanu, mumoju kamhawa talanta mbili na mumoju kamhawa talanta mojori, kila mumoju kuirima udimo ghwake. Naye kaghenda ngila zake. 16Ulya mtumishi ahawilo talanta sanu kaghenda kadea kazi nazo kapata faida ya talanta sanu zimoju. 17Naye ulya mtumishi ahawilo talanta mbili kaghenda kadea ukwenyi, kapata talanta mbili zimoju. 18Ela ulya apatile talanta mojori, kaghenda kakota msangeni kavisa pesa ya bwana wake.
19“Nao nyuma ya majua mengi, bwana wa walye watumishi keja na kashaya kudea isabu nawo. 20Ulya mtumishi ahawilo talanta sanu keja hambiri kaleta talanta sanu zimoju, kamuza, ‘Bwana, wananihawile talanta sanu, lola nanapatile faida ya talanta sanu zimoju.’ 21Bwana wake kamuza, ‘Ni kirani mtumishi waloli na mudumusiliki. Oluo mudumusiliki kwa malagho machache nijekuika ighulu ya mengi. Ngila kele kubwelo kwa bwana wako.’ 22Nao ulya mtumishi apatile mbili naese keja hambiri, kamuza, ‘Bwana, wananihawile talanta mbili, lola nanapatile faida ya talanta mbili zimoju.’ 23Bwana wake kamuza, ‘Ni kirani mtumishi waloli na mudumusiliki; oluo mudumusiliki kwa machache nikuikagha ighulu ya mengi, ngila kele kuboelo kwa bwana wako.’ 24Nao ulya mtumishi apatile talanta mojori keja hambiri, kamuza, ‘Bwana, nanamanyile nuwe mundu ukulile; ukwashagha andu sowandile na ukoghanyagha andu sofisile; 25kwa hung'u nikaogha, nikaghenda nikaivisa talanta yako msangeni. Ndamu usa mali yako.’ 26Ela bwana wake kamutumbulila, ‘Uwe mtumishi awase na mghadi! Wanamanyile kamba nanakwashagha andu sewandile na nanakoghanyagha, andu sefisile? 27Ni mango uiikile pesa yangu benki, eri ilyi neja nipate pesa yangu na faida. 28Ndamu msokeni talanta ewo nayo na mumhawe uyu ewo na ikumi. 29Kwani uyu ewo navo ujejuzilo eri akale na vingi, ela uyu sewesi, hata ichi ewo nacho ujesoko. 30Ela uyu mtumishi sefweni mkumbeni shighati kele kiza andu kujekala kililo na kukengeresha majegho.’
Kutaghanyo kwa kudua
31“Nao ilyi Mwana wa Mdamu eja na ubwaa ghwake, ngila mojori na wana malaika, ujekala kele kifumbi chake cha nguma, 32na mbari zose zijekoghanyo hambiri yake, naye ujewasaghula selyi mlisa asaghulagha ng'onzi na mbuzi. 33Ujeika ng'onzi kele mkonu ghwa kijo na mbuzi kele mkonu ghwa kimosho. 34Niko aho mzuri ejewauza walye weo kele mkonu ghwa kijo, ‘Njuuni inyo mubarikio ni Aba mpate Uzuri muiikililo kufuma kuumbo urumengu. 35Kwani neluo na njala mukanihawa chakulya, neluo na kau mukanihawa chenwa, neluo mgheni mukanihokera. 36Neluo tuu mkanirusa nguo, neluo mkongo mkeja mkanilola, neluo kifungoni mukeja mkaniona.’ 37Nao walye wahachi wejemtumbulila, ‘Bwana, ni nini tikuonile uwo njala tikakulyisa ango uwo kau tikakuhawa chenwa? 38Na ni nini tikuonile uwo mgheni tikakuhokera ango uwo tuu tikakurwarisa? 39Na nini tikuonile mkongo ango kifungoni tikeja kukulola?’ 40Naye Mzuri ujewatumbulila, ‘Fulo namuza, Agha mumdeilile mumoju wa awa wana wakwetu wachache, mwananideilile imi!’
41“Nao ujewauza walye weo kele mkonu ghwa kimosho, ‘Ghendeni noko, inyo muwanyizo; mughende kele moto ghuikililo Shetani na wana malaika wake. 42Kwani neluo na njala simunihawile chakulya, neluo kau simunihawile chenwa. 43Neluo mgheni na simunihokere, neluo tuu na simunirwarise, neluo mkongo na kifungoni simujile mukanilola.’ 44Nao nawose wejemtumbulila, ‘Bwana ni nini tikuonile njala, ango kau, ango tuu, ango mkongo, ango kifungoni tikalegha kukutumikila?’ 45Naye ujewatumbulila, ‘Fulo, namuza, selyi kwenyi simomudeilile mumoju wa awa wachache simunideilile imi.’ 46Kwa hung'u awa wejeghenda kele matiriro gha kale na kale, ela wahachi wejengila kele umana ghwa kale na kale.”
Àwon tá yàn lọ́wọ́lọ́wọ́ báyìí:
Matayo 25: SAGALLANT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
(C) The Bible Society of Kenya, 1993
