Matayo 28

Kuzuka kwa Jesu

(Marko 16:1-10; Luka 24:1-12; Johana 20:1-10)

1Nao nyuma ya Sabato kavui na kuela ijua lya Jumwa, Mariamu Magdalene na ulya Mariamu mzima wakaghenda kuzighana mbira. 2Nao anyalye kukakala na mtetemo mubwaa ghwa isanga, kwani malaika wa Bwana oselele kufuma mlunguni; keja kalyibingilisha lyilya iwe noko na kalyikalila. 3Naye oluo keonekana sa king'alang'ala na nguo zake zeluo za mnyange sa theluji. 4Na kwa undu ghwa kiture, walye warindiri wakagaganika na kukala sa wandu wafwile kwa wogha. 5Ela ulya malaika kawauza walye wake, “Simwangilo ni wogha; kwani namanya mwondemuhada Jesu uyu awambilo. 6Seo aha kungi; kwani wazuka, selyi aghorire. Njuuni mzighane andu ezikilo. 7Ndamu ghendeni shoshowa muwaghorere wairimi wake kamba wamalila kuzuka kufuma kwa wafwa, na zighaneni wamalila kumkayaila kughenda Galilaya; andu mujemwonela. Namalila kumghorera.”

8Kwa hung'o wakafuma alye mbireni na iseghe weo na wogha na mabwelo mabwaa, nao wakakimbila kuwaghorera wairimi wake. 9Nao iyo ngelo yenyi, wakakoghana na Jesu, kawauza, “Sere ikale kwenyu.” Nao wekeja wakamwata maghulu na kumtasa. 10Nao Jesu kawauza, “Simwangilo ni wogha; ela ghendeni muwaghorere wana wakwetu waghende Galilaya, na alye wejeniona.”

Uvoro ghwa warindiri

11Nao ilyi walye wake weluo wekeghenda, wamoju wa warindiri nawose wakaghenda kele muzi wakawaghorera wakohani wabwaa ghalye ghose ghadeike mbireni. 12Nawo wakohani wabwaa waghenda wakoghana na waghosi na kudea njama wakawahawa walye askari pesa 13wakawauza, “Wauzeni wandu, ‘Wairimi wake wanajile na kiro wakaghuiwa muli ghwake isi titungure.’ 14Na ilyi ghasikilo ni mubwaa wa isanga, isi tijeghoranya naye, nenyo simujesirimiso.” 15Kwa hung'u walye warindiri wakausa pesa na wakadea selyi wauzilo. Na uvoro ughu ghukaereso ghati ya Wayahudi hata lelo.

Jesu kuonekana kwa wairimi wake

(Marko 16:14-18; Luka 24:36-49; Johana 20:19-23; Madeo 1:6-8)

16Nao walye wairimi ikumi na mumoju wakaghenda Galilaya kele mghondi ghulya Jesu ewalaghize. 17Nawo waghenda wamwona wakamtasa; ela wamoju wawe weluo, na ngera. 18Nao Jesu keja kawauza, “Nahawo ndighi zose za mlunguni na za isangeni. 19Ndamu ghendeni kwa wandu wa mbari zose na muwadee kukala wairimi wangu mukewabatiza, kwa izina lya Aba, na lya Mwana na lya Roho wa Kuela, 20na muwafundise kuwata malaghizo ghose nimughorere; na nio ngila mojori nenyo majua ghose hata kudua kwa ngelo.”

Àwon tá yàn lọ́wọ́lọ́wọ́ báyìí:

Matayo 28: SAGALLANT

Ìsàmì-sí

Pín

Daako