মথি 13
13
তয়ক লুকচাঃসা ওয়েথুউ
(মার্ক ৪:১-৯; লূক ৮:৪-৮)
1য়াং রাকনিই যীশুচা ইংগা থুওয়কলো ম্রনামা থৈংলিইরি। 2যীশুবামা কংগং লুঃউম্যা লাঃলো চুককেলিইরি, যীশুচা লং তাজাং তাকলো থৈংলিইরি অর হিকচা লুঃউম্যারোচা ম্রনামা রেঃ হিকগিলিইরি। 3য়াংখা যীশুচা ওয়েথুউগা নিংলো যে যে আক্রংগো সুয়েংসাং পিইলিইরি।
4যীশু প্রলিইরি, “লুকচাঃসা তয়কচা আচিই প্যুওফু লাঃখারি। আচিই প্যুওখা লৈজিচা লেংনামা ক্যালিইরি অর য়াংচাগো ঙ্রাকরো লাঃলো চাঃবলৈতি। লৈজিচা ক্যকম্রিমা ক্যালিইরি। 5য়াংদেমা ম্রিচা আম্যা মিহিকলিই। ম্রি আম্যা মিহিকরি আতুওয়ক আয়াং সারা তাকলিইরি। 6ছুগি নিং ছাখা য়াংচারোচা ঞ্যেউ লাঃখারি অর আম্রচা আহ্লাপা মুম্রুকপ্রি আক্রংনা সিই লাঃখারি। 7অর লৈজিচা চুউখ্রোংমা ক্যালিইরি। ছুগি চুুউখ্রোংচা ক্রিই তাকলো সারারোগো ফিই থাঃলিইরি। 8অর লৈজিচা আকং ম্রিমা ক্যালো তুখুতিরিইমা আপ্রেং তাঃরা, তেরেতিরিইমা আপ্রেং খ্রকছি অর তেরেতিরিইমা আপ্রেং সুংছি আসিই সিইলিইরি।”
9ওয়েথুউ আছুংমা যীশু প্রলিইরি, “যাসুউমা নাথংফু নাঃ হিকরিলি-য়াংসুউ নাথংবেচিই।”
ওয়িথুউ প্রচা আদিপি
(মার্ক ৪:১০-১২; লূক ৮:৯-১০)
10নক্কা তিবিরোচা যীশুবাদুঃ লাঃলো মিংগেলিইরি, “কুবাং ওয়েথুউনা প্রলো যাফু লুঃউরোগো সুয়েংসাং পিইরিলি?”
11য়াংখা যীশু আফ্রি পিইলিইরি, “গংখাং নেংঙেংদ আক্রংগো স্যুও থাঃচা চাঃগারোগো নাংরোগো সিকঞ্যং প্ররি য়িগিলি য়াংসুউরোগো মিসিকজিইলিই। 12আক্রংগা যাসুউমা হিকরি য়াংসুউগো অর পিইফু-য়াংখা য়াংসুউমা আম্যাগ্রিই ফ্রইফুব্যা। ছুগি যাসুউমা মিহিকলি, য়াংসুউমা যা হিকরি, য়াংচাগোবাং য়াংসুউগা প্রেং য়ুউফু। 13য়াং আতুওয়ক ঙা য়াংসুউরোগো ওয়েথুউনা সুয়েংসাং পিইরি আক্রংগা য়াংসুউরো ম্যাকচিই হিকলোলি মাম্রাং, নাঃ হিকলোলি মাক্রা অর নামিলি।” 14য়াংসুউরোগা নিংলো রিসিই যিশাইয় দিঃ চাঃগাচা আমেইং ফ্রইরি:
নাংরো নাথংগেমি য়িগিলি নামিলি মুহুক; ক্রিনিংগেমি য়িগিলি তাখালি মিসিক মুহুক। 15দিঃ লুঃউরোমা চিইনুন্হুংচা কংগং কেগেং অর নাঃ পাং লাঃখাব্যা অর য়াংসুউরো কুঃ ম্যাকচিইগোলি পুয়িই থাঃগেতি যাফুলিছুগি য়াংসুউরোচা ম্যাকচিইনা মাম্রাংরাঅং, নাঃগা মাক্রারাঅং অর চিইকা নামিলি রাঅং অর আকং ফ্রইফু আতুওয়ক ঙাদুঃ প্রেং মাঃলাগে।
16“য়িগিলি নাংরোচা কেইং কংরি আক্রংগা নাংরোমা ম্যাকচিইচা ম্রাংরি অর নাঃলি ক্রারি।” 17ঙা নাংরোগো আমেইং প্ররি, নাংরো যা যা ম্রাংগেতি য়াংচারোগো তুবুং রিসিই অর থাওরা ফোরাগো রুসিইসারো ম্রাংখ্যাংতয়ং মাম্রাংলিইরা অর নাংরো যা যা ক্রাগেতি, য়াংসুউরো নাথং খ্যাংরিতয়ং মানাথংরা।
লুকচাঃসা ওয়েথুউ আদিপি
(মার্ক ৪:১৩-২০; লূক ৮:১১-১৫)
18-19“আগু নাংরোচা লুকচাঃসা ওয়েথুউ আদিপিগো নাথংগে। খ্যাংসুউমুছু যাখা গংখাং নেংঙেংদ চাঃগাগো ক্রালোলি নামিলি য়াংখা নেঃছুওচা লাঃলো য়াংসুউ চিইনুন্হুংমা যা নাথংলিইরি য়াংচাগোতয়ং য়ুউ লাঃরি। য়াং লেংবামা ক্যাচা আচিইনা দিঃ পুয়েং লুঃউরো আক্রংগো প্রলিইরি। 20অর ক্যকমা ক্যাচা আচিইচা ফ্রইতি য়াং লুঃউরো আক্রংগো প্রলিইরি যাসুউরো গংখাংফুং চাঃগাগো নাথংরি খ্যাং খ্যাং চিই আপ্যনা লাকখেং য়ুউরি, 21ছুগি য়াংসুউরোমা আহ্লাপা আম্র মাক্যালিই আতুওয়ক য়াংসুউরোমা তছং আতুওয়ক মিম্রি নিংরিব্যা। যাখা য়াং চাঃগারো আতুওয়ক ওয়িদানা অর ঞ্যচিই খেংরারি খ্যাং খ্যাং য়াংসুউরো নক ছুউককেতিব্যা। 22ছুউক খ্রোংমা ক্যাচা আচিইচা য়াং লুঃউরো আক্রংগো প্রলিইরি যাসুউরো য়াং চাঃগাগো নাথংরি য়িগিলি ইংথংগো য়ুউলো চেংজাখ্রাং অর উচ্চা পৈচিগো চিইচা য়াং চাঃগারোগো ফিই থাঃরি। য়াং আতুওয়ক য়াংদেমা তুখুলি আক্যুও মফ্র। 23আকং ম্রিমা ক্যাচা আচিইনা য়াং লুঃউরো আক্রংগো প্রলিইরি যাসুউরো য়াং চাঃগাগো ক্রালো নালিরি অর আক্যুও রাঃরি। তয়কতিরি রাঃরি আপ্রেং তাঃরা, তয়কতিরি রাঃরি আপ্রেং খ্রকছি অর তয়কতিরি রাঃরি আপ্রেং সুংছি।”
গং আখাংমা সেয়েম্রাক
24নক্কা যীশুচা লুঃউরোগো সুয়েংসাং পিইফু অাতুওয়ক অর তুখু ওয়েথুউ প্রলিইরি। “ওয়েথুউচা ফ্রইতি: গংখুংফুংচা দিঃ পুয়েং লুঃউঞ্যংব্যা যাসুউ কুঃ খ্রেংমা আকং আচিই প্যুওলিইরি। 25নক্কা যাখা আলুংসুউ ওয়িই লাঃখাগি য়াংখা রেংসুউরো লাঃলো গং আখাংমা সেয়েম্রাক অাচিই প্যুওবৈলো লাঃখাগেতি। 26আছুংমা গং সারা ক্রিই তাকলো যাখা সিইলিইরি য়াংখা আক্রামা সেয়েম্রাকলি তাকরি। 27য়াংচাগো ম্রাংলো ইংমা ক্যুয়েংরোচা ইংস্যাংগো লাঃলো প্রগেলিইরি, কুবাং ম্রি আখাংমা আকং আচিইকো মুপ্যুওলিই লঃ? প্যুওগি সেয়েম্রাক যাগা লাঃরিলিঃ?”
28“ইংস্যাংচা ক্যুয়েংরোগো প্রলিইরি, ‘দিঃ অলুককো রেংসুউরো লুককেলিইফু।’
“ক্যুয়েংরোচা ইংস্যাংগো প্রগেলিইরি, ছুগি ঙুরো লাঃলো য়াংচারোগো নুংবলৈফু লঃ?’
29“ইংস্যাংচা প্রলিইরি, ‘মুনুং, সেয়েম্রাককো নুংফু লাঃলো নাংরোচা গং আপাংগোলি নুংকেমিদি। 30আসিই মাফ্রেসাগ্রা সেয়েম্রাংরোলি ক্রিইবেচিই। যাসুউরো আসিই ফ্রেফু, ঙা য়াংখা য়াংসুউরোগো প্রলৈমি, য়াংসুউরোচা পাথামা সেয়েম্রাকরোগো তেরেমা চুকলো মিং তঃবফু আতুওয়ক আচি-আচি খ্যুয়েংগে অর য়াংনক গংগো ঙা গোলামা(কেইং) থিগে।’”
রি আচিইনা চিছিই ওয়েথুউ
(মার্ক ৪:৩০-৩২; লূক ১৩:১৮-১৯)
31যীশুচা য়াংসুউরোগো অর তুখু ওয়েথুউ প্রলিইরি। ওয়েথুউচা ফ্রইতি: “গংখাংফুং তুখু রি আচিই পুয়েং, যাচাগো লুঃউ তয়কচা য়ুউলো কুঃ ম্রি আখাংমা প্যুওলিইরি। 32হিকচা আলুং অাচিইমা রি আচিইচা আলুংচাথাক আঞি য়িগিলি আপাং ফ্রইলো ক্রিই থাকখা, খ্রেংমা হিকচা আলুং হাংবাংরোথাক আগ্রিই ফ্রইতি। য়াং আপাংচা দিঃপুয়েং আপাং ফ্রইতি, যা আপাং আখাকমা ঙ্রাকরো লাঃলো আঃস তাংনৈংরি।”
33যীশুচা য়াংসুউরোগো অরতুকু ওয়েথুুউ প্রলিইরি, ওয়েথুউচা ফ্রইতি: গংখাংফুংচা চিছিই ঞ্যংব্যা। মিঃমা তয়কচা য়াংচাগো য়ুউলো তিছি সৈস ময়দ্যামা রঃলিইরি। নক্কা ময়দ্যা হিকচা ফুউলো তাকলিইরি। 34যীশুচা দি ওয়েথুুুউগা নিংলো হিকচা লুঃউরোগো সুয়েংসাং পিইলিইরি। যীশুচা ওয়েথুউ অাপিই য়াংসুউরোগো তুখুলি সুয়েংসাং মিপিই। 35দিঃচা ফ্রইরি যাফুলিছুগি রিসিইগা নিংলো যা চাঃগা প্রলিইরি য়াংচাচা আব্রিচুং ফ্রইরি:
সাংথতি ওয়েথুউগা নিংলো ঙা চাঃগা প্রফু;
কাবা তিম্রিরি কাবাং যাচারো স্যুওলো হিকলিইরি, য়াংচারোগো প্রফু।
সেয়েম্রাক ওয়েথুউ আদিপি
36নক্কা যীশু লুঃউরোগো বৈখারো ইংদুঃ ওয়ংখারি। য়াংখা তিবিরোচা লাঃলো যীশুগো মিংগেলিইরি, “ম্রিখাংমা য়াং সেয়েম্রাক ওয়েথুউচা আদিপিগো ঙুরোগো প্র।”
37আফ্রিমা যীশু তিবিরোগো প্রলিইরি, “যাসুউ আকং আচিই প্যুওরিলি, য়াংসুউচা ফ্রইতি মুনুসাওয়া সাঃ। 38ম্রিচা ফ্রইতি দিঃ কাবা অর গংখাংফুংমা লুঃউরোচা আকং আচিই। নেঃছুওরোচা ফ্রইতি য়াং সেয়েম্রাক। 39যা রেংসুউ য়াংচাগো প্যুওলিইরি য়াংসুউচা ফ্রইতি নেঃছুও অর আসিই ফ্রেখিংচা ফ্রইতি দিঃ খঃমা আছুং রাক। যাসুউরো আসিই ফ্রেফু য়াংসুউরোচা ফ্রইতি গংখাং নেঃসাঃ। 40সেয়েম্রাককো যাপুয়েং আচি চিলো মিংতৈবতি, কাবাং আছুং রাকমালি য়াংপুয়েং তেথেং ফ্রইফু। মুনুসাওয়া সাঃচা কুঃ গংখাং নেঃসাঃরোগো রুওয়েলৈফু। 41যাসুউরো অরলুঃউগো আপ্রই লুকচিইরি অর যাসুউরো কুঃদৈং আপ্রই লুকতি, য়াংসুউরো আলুংসুউগো য়াং গংখাং নেঃসাঃরোচা মুনুসাওয়া নেংঙেংদগা তেরেমা চুকফু অর মিংদকমা খ্যালৈফু। 42য়াংদেমা লুঃউরোচা ঙুগেফু অর ওয়িদানা খেংলো সুওয়া ক্রিককেফু। 43য়াং আখিংমা থাওরা ফোরাগো রুসিইসারোচা কুঃমা ফাখাং গংখাং নেংঙেংদগো আরং থুওয়ক ম্রাংফু। যাসুউমা নাথংফু নাঃ হিকরিলি, য়াংসুউ নাথং।”
অরলি সুংওয়েথুউ
44“গংখাংফুং ম্রিচা স্যুওলো থাঃচা উচ্চাঞ্যংব্যা। লুঃউ তয়কচা য়াংচাগো হ্রা রালো প্রেংলো স্যুও থালৈতি। য়াংনক চিই আপ্যনা লাঃখারি অর য়াংসুউমা যা হিকরি আলুংচাগো রংলো য়াং লিঃগো ওয়িলিইরি।
45“অর গংখাংফুংচা কুং প্রুকসা তয়কঞ্যংব্যা যাসুউ আকং চিংআম্যাক হ্রারি। 46তুখু আঃফুদেং চিংআম্যাক রাঃলো, য়াংসুউচা কুঃমা যা হিকরি আলুংচা রংলো য়াং আম্যাককো ওয়িলিইরি।
47“অর গংখাংফুংচা তুখু আগ্রিই কুয়েংঞ্যংব্যা, যাচাগো ম্রমা বৈলৈতি অর য়াংদেমা যে যে ঙা ক্যালিইরি। 48কুয়েংমা ঙা ক্যাব্রিইনক লুঃউরোচা ঙাং তাংগেলিইরি। নক্কা য়াংসুউরো আকং ঙারোগো রুইলো খারাংমা থাগেলিইরি অর মকংচারোগো বৈলৈকেতি। 49খঃ আছুং রাকমা দিঃপুয়েং ফ্রইফু। গংখাংনেঃসাঃ লাঃলো থাওরা ফোরাগো রুসিইসারোগো আপ্যাক লুঃউরোগা আখ্রা প্যাংফু অর মিংদকমা য়াংসুউরোগো খ্যালৈফু। 50য়াংদেমা লুঃউরোচা ঙুগেফু অর সুওয়ানা সুওয়া ক্রিককেফু।”
51য়াং নক যীশু কুঃ তিবিরোগো মিংলিইরি, “নাংরো দিঃ চাঃগারোগো নালিগে লঃ?”
তিবিরো যীশুগো প্রগেলিইরি, “অই,নালিগেরি।”
52য়াংখা যীশু য়াংসুউরোগো প্রলিইরি, “গংখাংফুংগো য়ুউলো যা কেইং ছারারো সুয়েংসাং রাগেরি, য়াংসুউরোচা ইংমা ইংস্যাং পুয়েং যাসুউ কুঃ গোলাগা আসৈ অর আহং ওয়েরোগো থুউতি।”
নাসরতমা যীশুগো লাক মেখেংগে
(মার্ক ৬:১-৬; লূক ৪:১-৩০)
53সুয়েংসাং পিইফু আতুওয়ক দিঃ ওয়েথুউরোগো প্রব্রিইনক যীশুচা য়াংচাগা লাঃখারিব্যা। 54য়াংনক কুঃ রুওয়ামা লাঃলো চেরেমা লুঃউরোগো সুয়েংসাং পিইলিইরি। যীশু চাঃগাগো ক্রালো-লুঃউরোচা এংঅরো প্রগেলিইরি, “দিঃ পৈঞ্যানা এংঅফুয়ি অলুকরোগো লুকফু ক্ষেমতাগো দিঃ লুঃউ যাগা রারিলিঃ? 55দিঃ লুঃউচা য়াং লাকসামা সাঃ মুহুক লঃ? য়াংসুউ মিখাং নাঃমিচা মরিয়ম মুহুক লঃ? অর য়াংসুউমা ঞিংরো যাকোব, যোষেফ, শিমোন অর যিহূদা মুহুক লঃ? 56য়াংসুুুউমা ঞিংমারো ঙুরোনা মিহিক লঃ? দিঃপুয়েং ছুগি য়াংসুউ দিঃচারো যাগা রারিলিঃ?” 57দিঃপুয়েং প্যাংলো লুঃউরো চিইমা যীশুগো য়ুউলো আঙাং-আতা ফ্রইকেলিইরি।
য়াংখা যীশু য়াংসুউরোগো প্রলিইরি, “কুঃ রুওয়ামা অর কুঃ ইং আপি অর হিকচা আলুং আঃরামা রিসিইরোচা ম্যাকন্হা রাঃরি।”
58লুঃউরো মুক্যুংগো ম্রাংলো, যীশুচা য়াংদেমা অর আম্যা এংঅফুয়ি অলুক মুলুকলিইব্যা।
Àwon tá yàn lọ́wọ́lọ́wọ́ báyìí:
মথি 13: BBSRMZ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
