মথি 14
14
রিঃঙুক মাঙ্গালা পিইসা যোহন সিইচা
(মার্ক ৬:১৪-২৯; লূক ৯:৭-৯)
1-2য়াং আখিংমা যীশু আক্রংগো ক্রালো গালীল প্রিনিমা ওকখ্যুকসা হেরোদ মাংচা কুঃ ভেন্ডারোগো প্রলিইরি, “দিঃ লুঃউচা রিঃঙুক মাঙ্গালা পিইসা যোহন, আসিইগা আহ্রাং ফ্রই থালিইরি। য়াং আতুওয়ক য়াংসুউচা দিঃ এংঅফুয়ি অলুকরোগো লুকতি।”
3হেরোদ মাংচা কুঃ ঞিং ফিলিপ মিয়া চাঃগানা যোহনগো তিঃ য়ুউ লাঃলো থংমা থিলিইরি। 4আক্রংগা যোহন হেরোদগো প্রলিইরি, “হেরোদিয়াগো মিয়া প্যাং থাফুচা কুবাংমা মাসাং।” 5হেরোদ মাংচা যোহনগো সেবৈফু ক্রেংলিইরি য়িগিলি হেরোদচা লুঃউরোগো ক্রকলিইরি আক্রংগা লুঃউরোচা যোহনগো রিসিইছুলো রুসিইগেতি।
6হেরোদ মাং ম্যুয়িংরাক পুয়িইমা হেরোদিয়া সিমিংচা রকচা আগেংদুকরো হ্রিইগা কাঃ প্রালো হেরোদগো চিই আপ্য প্যাংলিইরি। 7য়াং আতুওয়ক হেরোদ মাংচা গিধি খেংলো প্রলিইরি, সিমিংচা যা লুরিলি য়াংচাগো ঙা পিইফু। 8সিমিংচা কুঃ মিখাংগা আতৈংবাং রালো প্রলিইরি, “যোহন আগংগো লংবেইংমা থিলো ঙাদুঃ য়ুউখা।”
9য়াংচাগো ক্রালো হেরোদ মাংচা চিই নালিইরি য়িগিলি যাসুউরো মাংনা চাঃফু থৈগেলিইরি, য়াংসুউরো হ্রিইগা গিধি খেংলিইরি আতুওয়ক মাংচা, যাচা তংরিলি য়াংচাগো পিইফু আনা পিইলিইরি। 10মাংচা লুঃউ রুওয়েলো থংমা যোহন আগংগো ফ্রেলিইরি। 11নক্কা আগংগো য়ুউ লাঃলো সিমিংগো পিইব্রিরিনক, য়াংসুউচা কুঃ মিখাংদুঃ য়ুউ লাঃখারি। 12য়াংনক যোহন তিবিরোচা লাঃলো, যোহন কেইংথাগো য়ুউ লাঃলো সাংগ্রুগেলিইরি অর য়াং সাদাংচা যীশুগো লাঃলো প্রগেলিইরি।
লুঃউ ঙাথংগো আঃচা পিইলিইরি
(মার্ক ৬:৩০-৪৪; ৯:১০-১৭; যোহন ৬:১-১৪)
13যীশুচা যোহন সিইচাগু ক্রারো, লংমা তাকরো তিদিং-চিঃছিঃ আঃরা তাঃরাদুঃ লাঃখারি। য়াংচাগু ক্রারো লুঃউরোচা আরায় রায় ম্রুঃগা থুওয়কলো যীশু নক্কা লৈকাইরে। 14যীশু লংগা ছাংরো লুঃউম্যাগো ম্রাংলিরি অর খ্যঃফু চিদানা রকরো, য়াংসুউরোবামা যাসুরো সানাসি হিকলিরি, য়াংসুউরোগু কেইংমাজিলিরি।
15নিং ওয়ংলো পাখা তিবিরোচা যীশুবাদুঃ লাঃলো প্রগেলিইরি, “আঃরাচা তিদিং চুছুয়িই, নিংলি ওয়ংহ্লাব্যা। লুঃউরোগো রুওয়েলৈফিই যাফুলিছুগি য়াংসুউরোচা রুওয়াদুঃ লাঃলো কুঃ আতুওয়ক আঃচা ওয়িনৈঅং।”
16যীশুচা তিবিরোগু প্রলিরি, “য়াংসুউরো লাঃফু আলু মিহিক। নাংরো য়াংসুউরোগু আঃচাঃ পিইগে।”
17তিবিরোচা যীশুগো প্রলিইরি, “ঙুরোমা দিঃমা রুটি ঙাস্যাক অর ঙা নৈকং আপি অর তুখুলি মিহিক।”
18-19য়াংসুউচা প্রলিইরি, “য়াংচারোগো ঙাদুঃ য়ুউখা।” নক্কা যীশুচা লুঃউরোগো ম্রাক আথাকমা থৈফু আনা পিইলিইরি অর য়াং ঙাস্যাক রুটিনা ঙা নৈকংগো য়ুউলো গংখাংদুঃ ক্রিলো ফোরাগো কিজু তাংলিইরি। য়াংনক যীশুচা রুটিগো ফিলো তিবিরো আলাকমা পিইলিইরি অর তিবিরোচা লুঃউরোগো পিইগেলিইরি। য়াংসুউরো তয়কমুক্যুয়েং ওয়েংতিব্রি চাঃগেলিইরি। 20চাঃব্রিইনক যা আপিরো ক্যা হিকলিইরি, তিবিরোচা য়াংচাগো কককেলিইরি-য়াংখা তিছিনৈ খারাং আব্রি ফ্রইরি। 21যাসুউরো চাঃগেলিইরি য়াংসুউরো আতুওয়ংমা মিমানা আশ্যি মিইমাশ্যি য়ক্ক্যাশ্যি আপি ঙাথংল্হক য়ক্ক্যা হিকলিইরি।
রিই আথাকমা লাঃচা
(মার্ক ৬:৪৫-৫৬; যোহন ৬:১৫-২১)
22য়াংনক যীশুচা তিবিরোগো প্রলিইরি যাফুলিছুগি তিবিরোচা লংমা তাকলো যীশু হ্রিইগা অরতাব্রাকতু লাঃগেঞ্যং অর যীশুচা লুঃউরোগো রুওলেতি। 23লুঃউরোগো রুওয়েপ্রিনক যীশুচা ছুউক তংফু আতুওয়ক নুংখ্যাং তংদুঃ তাকলিইরি। যাখা মুম্যুয়েং ফ্রইতিব্যা য়াংখা যীশুচা নুংখ্যাং য়াংদেমা হিকলিইরি। 24য়াং আখিংমা তিবিরোচা লংমা তাকলো কেইংনাগা তুবুং আওয়িইমা রকব্যা অর য়াংখা লিইচা আপ্রেং থালো ম্রমা রিইলৈং তাকলিইরি। 25মুলাংখিংখা যীশুচা ম্র রিই আথাকমা লাঃলো তিবিরোবাদুঃ লাঃখারি। 26তিবিরোচা লুঃউ তয়ককো রিই আথাকমা লাঃচাগো ম্রাংলো কংগং ক্রককেলো প্রগেলিইরি, “নেঃ নেঃ” অর য়াংনক অঃগেলিইরি।
27যীশুচা খ্যাং খ্যাং তিবিরোগো প্রলিইরি, “ঙা ঙা; মক্রককি, চিই লেল্হেং প্যাংগে।”
28পিতরচা যীশুগো প্রলিইরি, “আস্যাং ফোরা, আমেইং কুবাংরা ছুগি রিই আথাক্কা কুবাংবাদুঃ লাঃফু আনা পিই।”
29যীশুচা প্রলিইরি, “লাঃ।”
য়াংখা পিতরচা লংগা ছাংলো রিই আথাকমা সুওয়ালো যীশুবাদুঃ লাঃলিইরি। 30ছুগি লিই আম্যা থারি আতুওয়ক পিতরচা ক্রকলো রিইমা নঃ লাঃরিব্যা অর অঃলো প্রলিইরি, “আস্যাং ফোরা, ঙাগো কিছি।”
31যীশুচা খ্যাং খ্যাং আলাক ল্হেংলো কৈংলিইরি অর প্রলিইরি, “আক্যুং মিহিকরি লুঃউ, যাফু রাচা তুওয়কতিলি?”
32-33যীশুনা পিতরচা লংমা তাকপ্রিইনক লিইচা তেং লাঃখারি। যাসুউরো লংমা হিকলিইরি য়াংসুউরোচা যীশুগো থাওরা ফোরা পুয়েং রুসিই থালো হ্রিইখুলো প্রগেলিইরি, “কুবাংচা আমেইং থাওরা ফোরামা সাঃ।”
34নক্কা য়াংসুউরো ম্রকো কুউলো গিনেষরৎ হেতেবেদুঃ লাঃখাগেতি। 35য়াংদেমা লুঃউরোচা যীশুগো সিকগেলো হেতেবে আঃরারোমা লুঃউরোগো সাদাং পিইলৈকেতি। 36য়াংখা লুঃউরোচা সানাসিরোগো যীশুবাদুঃ য়ুউ লাঃখাগেতি অর আতংবেং থাগেলিইরি, যাফুলিছুগি য়াং সানাসিরোচা যীশু কুরোং আনাগো ম্হেংনৈংঅং; অর মন্হয়ক যীশু আওয়েকো ম্হেংগেরি-য়াংসুউরো আলুংসুউ কেংমাগেলিইরি।
Àwon tá yàn lọ́wọ́lọ́wọ́ báyìí:
মথি 14: BBSRMZ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
