মথি 12
12
উবু/সদাং নি-রাক আক্রংগো যীশু অঃওয়াদা পিঃখ্রাং
(মার্ক ২:২৩-২৮; লূক ৬:১-৫)
1তারাকখা যীশুচা তুখু গং খেরেংনাগা লাঃলিইরি। য়াং রাকচা সাদাং রাক হিকলিইরি। যীশু তিবিরোচা ম্যুওকেতিলো গং আঞোয়েং খ্যুও চাঃগেলিইরি। 2য়াংচাগো ম্রাংলো ফরীশীরোচা যীশুগো প্রগেলিইরি, “বাসা থুংজৈং আলৈই সাদাংনিক যাচা মুুলুকসাং, ক্রি, কুবাং তিবিরোচা য়াংচাগো লুককেতি।”
3যীশুচা য়াংসুউরোগো প্রলিইরি, “দায়ুদ মাং অর য়াংসুউ নক্কা লৈসারো ম্যুওয়েকেলিইরি য়াংখা দায়ুদ মাং যা লুকলিইরি, য়াংচাগো কুবাংরো মেফেসিই লঃ? দায়ুদ মাংগা থাওরা ফোরা ক্যংদুঃ ওয়ংলো ফোরামা তাংচা মুংগো চাঃলিইরি। 4দায়ুদ মাংনা নক্কা লৈসারো আমেইং য়াংচাগো চাঃফু মাসাংলিই, য়াংচাগো ফুংগ্রিইরোরা চাঃ সাংরিব্যা। 5দিঃচাগো আপিলি কুবাংরো মোশি পৈংঞেকো মেফেসিই লঃ, সাদাংরাকমা ওয়িপাসানা ক্যংমা ফুংগ্রিইরো সাদাংনিক পৈঞেকো মুসুংগিলি য়াংসুউরোমা আপ্রই মাক্যা? 6ঙা কুবাংরোগো প্ররি, ওয়িপাসানা ক্যংথাক পাং দিঃমা তয়ক আগ্রিই হিকরি। 7ঙা মিত্তা হিকচাগো ম্রাংখ্যাংরি, সুঃদুওয়া হ্লুউফুচা মুহুক- কেইংমা দিঃ চাঃগা আদিপিগো নাংরো সিকগি য়াংখা আপ্রই মিহিকসারোগো আপ্রইস্যাং মাপ্যাংলিই মুুহুক। 8ম্হেলো থাঃগে, মুনুওয়াসা সাঃচা সাদাংরাক আথাকমা আস্যাং।”
আলাক আসিই তয়ক কেংমালিইরি
(মার্ক ৩:১-৬; লূক ৬:৬-১১)
9নক্কা য়াং আঃরাগো বৈলো যীশুচা য়াং ফরীশীরো তাঃরা চেঃরেদুঃ লাঃখারি। 10য়াংদেমা লুঃউ তয়ক হিকলিইরি-য়াং লুঃউমা আলাক তাফাক আসিই হিকলিইরি। যীশুগো আপ্রই খ্যাফু আতুওয়ক ফরীশীরোচা যীশুগো মিংগেলিইরি, “বাসা থুংজৈং অালৈই সাদাংরাকমা তয়ক মুসুউগো কেংমাজিইনৈং লঃ?”
11যীশু য়াংসুউরোগো প্রলিইরি, “আচ্ছা, কুবাংরো আতুওয়ংমা যাসুউমা সাংফছুয়িই তগং হিকরিলি। য়াং ছুয়িইচা সাদাংরাকমা তুওয়ংমা ক্যা লাঃখাগি-ইংস্যাংচা ছুয়িইকো ঙাং মাতাংব্যা লঃ? 12অর ছুয়িই থাকপাং লুঃউ আসাক্কা আম্যা আঃফু হিকরি। ছুগি ম্রাংচাগা, সাদাংরাকমা আকং অলুক লুক থতি।”
13য়াংনক যীশুচা য়াং লুঃউগো প্রলিইরি, “নাক আলাক পিইনা।” য়াংসুউচা কুঃ অালাক্কু পিইব্রিনক, য়াং আলাকচা অর তাফাক আলাক পুয়েং আকং ফ্রইলিইরি। 14য়াংখা ফরীশীরোচা প্রাংদুঃ লাঃখাগেতি অর যীশুগো সেঃবৈফু আতুওয়ক, যীশুগো ছেংগ্যাংফাক লুকলো অাতৈংবাং প্যাংগেলিইরি।
থাওরা ফুরা রুইকক থাঃচা লুঃউ
15য়াংসুউরো আতৈংবাংচাগো সিকলো যীশুচা য়াংচাগা লাঃখারিব্যা। য়াংখা তুবুং লুঃউ যীশু নক্কা লৈকেলিইরি। 16য়াংসুউরো অাতুওয়ংমা যাসুউরো আনিং মকং হিকলিইরি যীশুচা য়াংসুউরো আলুংসুউগো আকং প্যাংলিইরি অর কংগং হেং থাঃলিইরি যাফুলিছুগি যীশুগো য়ুলো য়াংসুউরোচা চাঃগা মাম্যারাঅং। 17দিঃচা ফ্রইলিইরি আক্রংগা রিসিই যিশায় যা চাঃগা প্রলিইরি য়াং চাঃগাচা আব্রিচুং ফ্রইঅং:
18ক্রিগে, ঙামা ক্যুয়েং যাসুউগো ঙা রুইকক য়ুউলিইরি।
দিঃ লুঃউচা ঙামা আখ্য লুঃউ-যাসুউগো য়ুউলো ঙা ওয়েংসারি।
ঙা য়াংসুুউ আথাকমা ঙাঃ ওয়িইঞেংগো পিইফু,
অর য়াংসুউ যিহুদী মুহুক লুঃউরোবামা সাংরি তাঃরাগো চঃমি।
19য়াংসুউচা চাঃগা আঙ্রাং মাপ্যাং মুহুক অর মঅঃ মুহুক;
য়াংসুউচা লেংমা লেংমা কুঃ চাঃগাগো মফ্র মুহুক।
20সাংরি তাঃরাগো অংম্রাং মিপিইসাগ্রা
য়াংসুউ কক লাঃচা নল গো মুখ্যুও মুহুক।
অর তেকে তেকে তক হিকচা লেংপগো মেসেক মুহুক।
21য়াংসুউ আথাকমা যিহুদী মুহুক লুঃউরোচা তেংম্হেকেফু।
আস্যাং যীশুনা মকং নেঃমাং
(মার্ক ৩:২০-৩০; লূক ১১:১৪-২৩)
22নক্কা লুঃউরোচা মকং নেঃ কৈংরো হিকচা লুঃউ তয়ককো যীশুবাদুঃ য়ুউলাঃগেতি। যীশুচা য়াংসুউগো আকং প্যাংলিইরি। 23কংরিখা য়াং লুঃউচা চাঃগা প্রনৈংরি অর ম্রাংলিইরি। য়াংখা হিকচা লুঃউচা এংঅরো প্রগেলিইরি, “দিঃ লুঃউচা দায়ুদ আচৈং?”
24ফরীশীরো দিঃ চাঃগাগো ক্রালো প্রগেলিইরি, “য়াংসুউগা মকং নেঃরোমারা মাং বেলসবূলগা নিংলো মকং নেঃ অলুককো লুকতি।”
25ফরীশীরো চিইমা চেংজাচাগো ম্রাংলো যীশু য়াংসুউরোগো প্রলিইরি, “যা নেংঙেংদচা কুঃরো আতুওয়ংমা আঃফু ফুগেতি য়াং নেংঙেংদচা প্যাক লাঃরি। অর যা ম্রুনা ইংথংচা কুঃ আতুওয়ংমা ভাগ ফ্রইলাগি য়াং ম্রুনা ইংথংচা মিম্রিব্যা। 26মেইং নেঃচা নেইং নেঃকো ঙাং থুউতিছুগি য়াংখাগা কুঃ আতুওয়ংমা ভাগ ফ্রইলারিব্যা। য়াংখা যাপুয়েং প্যাংলো য়াংসুউ নেংঙেংদচা খেংফুলিঃ?” 27ঙারা বেসবূলগা নিংখুরো মকং নেঃকো ঙাং থুুউতিছুগি কুবাং লুঃউরোচা যাচাগো নিংখুলো ঙাং থুউতিলিঃ? কুবাংরো আমেইং চাঃগা প্রলঃ-মপ্রলঃ, য়াংচাগো কুবাংরো লুঃউরোরা তাঃরা চৈমি। 28ছুগি ঙারা থাওরা ফোরা ওয়িইঞেংগা নিংলো মকং নেঃরোগো ঙাং থুউতিছুগি-য়াংখা ম্হেরাফুচাগা থাওরা ফোরা নেংঙেংদচা কুবাংরো নেইংমা রকব্যা।
29“যাসুউ কেইংথামা আঃ হিকরি, য়াংসুউগো হ্রিইগা মুখ্যুয়েংব্রি তয়ক মুসুউ য়াংসুউ ইংদুঃ ওয়ংলো ওয়েংছেংগো য়ুউনৈং লঃ? খ্যুয়েংব্রিই মারা য়াংসুউ য়ুউনৈংফু।”
30“খ্যাংসুউমুছু ঙা ব্রাক্কা মুহুকরাছুগি-য়াংসুউচা ঙাগো তরৈতিব্যা। যাসুউ ঙানা মুলুংলি-য়াংসুউচা ক্রিরি। 31য়াং অাতুওয়ক ঙা প্রচাগা, লুঃউরোমা হিকচা আপ্রই অর থাওরা ফোরাগো ছেংগ্যাংফাক চাঃগারোগো খুওয়ং পিইফু, য়িগিলি সেংস্যাংস ওয়িইঞেংগো য়ুউলো ছেংগ্যাংফাক লুককি-য়াংচাগো খুওয়ং মিপিই। 32মনুসুওয়া সাঃগো ছেংগ্যাংফা লুকলো চাঃগারোগো খুওয়ং পিইফু, ছুগি সেংস্যাংস ওয়িইঞেংগো য়ুউলো ছেংগ্যাংফাক চাঃগা প্রগি, য়াংসুউগো খুওয়ং মিপিই- দিঃ কাবামালি মাঃরা, নং কাবামালি মাঃরা।
আপাং আক্রং আসিই ফ্রইতি
(লূক ৬:৪৩-৪৫)
33“দিঃ চাঃগাগো লাকখেং য়ুউগে, আপাং অাকং মিগি আসিইলি আকং ফ্রইতি অর আপাং মকংছুগি আসিইলি মকং ফ্রইতি; আক্রংগা আপাং আক্রং আসিই ফ্রইতি। 34ম্রিং অাচৈংরো! কুঃদৈং মকং প্যাংলো যাপুয়েং কুবাংরো আকং চাঃগা প্রনৈংগেতিলিঃ? 35আকং লুঃউচা কুঃ চিইদানামা আকং চেংজাখ্রাংগা আকং চাঃগা থুওয়কতি অর মকং লুঃউচা কুঃ চিইদানামা মকং চেংজাখ্রাংগা মকং চাঃগা থুওয়কতি। 36ছুগি ঙা নাংরোগো প্রফুচাগা, লুঃউরো যা মকং চাঃগা প্রগেতি-সিই লাঃখা য়াংসুউমা চাঃগা তুখুওয়েং মুক্যুয়েং চাঃগাগো প্রপ্রারাফু। 37কুবাং চাঃগা অালৈই কুবাংগো আপ্রই মিহিক ফ্রইফু অর কুবাং চাঃগা আলৈই কুবাংগো আপ্রইস্যাং খ্যাফু।”
ফরীশীরোরা লাকম্হে হ্রাচা
(মার্ক ৮:১১-১২; লূক ১১:২৯-৩২)
38য়াংনক লৈগায়ক কেইং ছারানা ফরীশীরোচা যীশুগো মিংগেলিইরি, “ছারা, ঙুরো কুবাংগা তুখু লাকম্হে ম্রাংখ্যাংরি।”
39যীশু য়াংসুউরোগো প্রলিইরি, “দিঃ খঃমা আপ্যাক লুঃউনা মুরুসিই লুঃউরোচা লাকম্হেগো হ্রাগেতি ছুগি রিসিই যোনা লাকম্হে আপি অর তুখু লাকম্হেলি য়াংসুউরোগো মাপ্রাব্যা। 40যোনা যাপুয়েং য়াং ঙ্রা ওয়েংথিমা সুংঞি সুংরাক হিকলিইরি, মনুসুওয়াচা য়াংপুয়েং সুংঞি সুংরাক তুওয়ং সাংখ্যুয়েংমা হিকফু। 41আছুং রাকমা নীনবী ম্রু লুঃরোচা হ্রাং থাঃলো দিঃ খঃমা লুঃউরো আপ্রইকো প্রাপিইফু। আক্রংগা নীনবী ম্রুসারোচা যোনা তাঃরাগো ক্রালো আপ্রইকা চিই প্রেংগেলিইরি। অর ক্রিগে, দিঃমা যোনা থাক অর তয়ক অাগ্রিইকি লুঃউ হিকরি। 42আছুং রাকমা ম্রকপ্রিমা মাংমাচা হ্রাংলো দিঃ খঃমা লুঃউরোমা আপ্রইকো প্রাপিইফু আক্রংগা শলোমন মাং পৈঞ্যা চাঃগাগো নাথংফু আতুওয়ক মাংমাচা কাবাং আছুং আঃরাগা লাঃলিইরি। অর ক্রিগে, দিঃমা শলোমন থাক আগ্রিইকি তয়ক হিকরি।
43“যাখা মকং নেঃ তগংচা লুঃউগা থুওয়ক লাঃরিছুগি, য়াংখা য়াং নেঃচা নাঃফু আঃরা হ্রালো আসুয়িই আঃরামা লাঃলো লিনিংরি। 44ছুগি য়াং নেঃচা য়াংচাগো মাঃরাব্রিই, ‘যাখা থুওয়ক লাঃখারি-ঙা ইংদুঃ ঙা প্রেং লাঃফু।’ য়াংসুউ প্রেং লাঃখা য়াং ইংচা লুঃউ মিহিক, সেসেং অর ছাংলো ম্রাংফু। 45নক্কা য়াং মকং নেঃচা লাঃলো কুঃথাক মকং অরলি খনৈকংগো য়ুউ লাঃফু অর য়াংদেমা ওয়ংলো নিংগেফু। য়াংখা য়াং লুঃউচা পাথামা ফিই থাকপাং আছুং ফিইচা কংগং মকং ফ্রইফু। দিঃ খঃমা মকং লুঃউরো ফিইচালি য়াংপুয়েং ফ্রইফু।”
আস্যাং যীশু মিখাংনা ঞিংচা যাসুউলিঃ?
(মার্ক ৩:৩১-৩৫; লূক ৮:১৯-২১)
46যীশু যাখা লুঃউরোচা চাঃগা প্রনিংরি য়াংখা যীশু মিখাংনা ঞিংরোচা যীশুনা চাঃগা প্রফু আতুওয়ক প্রাংগা রেঃ হিকগেলিইরি। 47তয়কচা যীশুগো প্রলিইরি, “ক্রি, কুবাং মিখাংনা ঞিংরোচা কুবাংনা চাঃগা প্রফু আতুওয়ক প্রাংগা রেঃ হিকগেতি।”
48য়াংখা যীশু য়াংসুউগো প্রলিইরি, “যাসুউলি ঙামা মিখাং অর ঙা ঞিংরো?” 49নক্কা যীশুচা কুঃ তিবিরোগো লুঃউরোগো প্রালো প্রলিইরি, “দিঃ ক্রি, ঙামা মিখাংনা ঞিংরোচা; 50আক্রংগা যাসুউরো ঙামা গংখাংফুংমা ফাখাং ছেংদাগো রুসিইগেতি-য়াংসুউরোরা ঙামা ঞিং, ঞিংমা অর মিখাং।”
Àwon tá yàn lọ́wọ́lọ́wọ́ báyìí:
মথি 12: BBSRMZ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
