मत्ती 11
11
येशु ओःले बप्तीस्मा तेर्केन युहन्ना
(लुका ७:१८-३५)
1राःङगीइ मेःन्दा चीङ्ङी योबाक्याला दी ताम लाःमीःजीक येशु थामाइ युःलक्याला मीःक्याला लोप्चेला ओःले लेःङ्गो फेल्जेला काःल्सी।
2बप्तीस्मा तेर्केन युहन्ना चेङाङला एःकासुना खुङगीइ थार्च्युगेन ख्रीष्टकीइ पेःक्योक लेःगाक्याइ बारेला कोःसी। ओः सोङ्गारा, खुङगीइ राःङगीइ चीङ योबाक्याला खुङसाःला ताङ्सी। 3खुङक्या ओःङ्दी येशुला टीःसी, “ङीःइ रेःवा पेःदी तेःक्योक थार्च्युगेन क्याःल्बु ख्यारा इःङे की ङीःइ राःङ्साइदीरा लाःम ताकोःन इःम्बा?” 4येशुइ खुङक्याला लाःसी, “सुङ ओःले ख्योक्याइ कोःक्योक ओःले थोङ्क्योक तामक्या युहन्नाला लाःतेर– 5मी मेःथोङेनक्या थोङ्देरा एः, स्याःल्ठाकक्या डोदेरा एः, जे नाःजा थेङ्क्योकक्या चाङ्मा काःल्देरा एः, नाम्ज्यो मेःकोःगेनक्याइ कोःदेरा एः, सीक्योकक्या सोम्बो लोःदेरा एः, ओःले तुःक्सी-प्राङ्नाक्याइ कोन्ज्योइ याःबु लेःङ्गो कोःदेरा एः। 6ङाःइ बारेला पाःकेन मेःबेन मीःक्याइ तेःन्दामरा मोलाम ज्योर्ती एः।”
7युहन्नाइ योबाक्या लोःमीःजीक येशुइ युहन्नाइ बारेला मीःक्याला एःन्डु लाःसी, “ख्योक्या उजाड ठाउँला ची तागाला काःल्दी एःके? ची ल्हाबाइ योङ्देरा पेःक्योक मीमाला? 8ख्योक्या ची तागाला काःल्क्योक? ची याःबु याःबु केःला केःङ्क्योक मीःला? याःबु याःबु केःला केःङेन मीः नी क्याःल्खाङक्याला का तेःकुए। 9तेःन्दामरा ख्योक्या ची तागाला काःल्दी एःके? ची कोन्ज्योइ लेःङ्गो तेर्केन मीःला? इःङे, ङाः तेःन्दामरा लाःके, ख्योक्याइ कोन्ज्योइ लेःङ्गो तेर्केन्दीलेङ छ्योम्बो मेःराङ चीगला थोङ्दी एः। 10चीलेलाःना युहन्नाइ बारेला छ्येइ पेज्याला कोन्ज्योइ एःन्डुले लाःती एः–
‘तादो, ङाः ख्यो भन्दा तोःङ तोःङ्ला ङाःइ लेःङ्गो तेर्केन्दीला ताङ्देरा एः।
ओःले खुङगीइ ख्योइ लागी लाःम जोगेन एः।’#मलाकी ३:१
11तेःन्दामरा ङाः ख्योक्याला लाःके, दी जाम्बुलीङला केक्योकक्या नाःङ्ला बप्तीस्मा तेर्केन युहन्ना भन्दा छ्योम्बो मीः सुङ म्याः। इःनाङ नाःम्खालीङगीइ क्याःल्खापला काःखो थाम्जेर भन्दा छीमी एःपा, ओःखो खुङ भन्दा ताःरुङ छ्योम्बो इःङे। 12बप्तीस्मा तेर्केन युहन्नाइ लेःङ्गो फेल्मीःजीक ताःसेथुप नाःम्खालीङगीइ क्याःल्खापला मीःक्याइ क्याःप्तेरा एः, ओःले टालाङक्याइदी ओःखोखाला फ्रोगेन प्रयास पेःदेरा एः। 13चीलेलाःना युहन्नाइ तीःनामथुप थाम्जेर कोन्ज्योइ लेःङ्गो तेर्केनक्याइ ओःले मोशाइ तेर्क्योक छ्येइ ठीमगीइ नाःम्खालीङगीइ क्याःल्खापकीइ बारेला लेःङ्गो लाःसी। 14ख्योक्याइ ङाःइ लाःक्योकला सेमल्हुक लुउए लाःना, खुङक्याइ ओःङ्गुए लाःक्योक एलीयादी युहन्नारा इःङे। 15कोःगेन नाम्ज्यो एः लाःना कोःदो।
16तीःङ्साङ्गीइ मीःक्याला ङाः ची ङीमु कार्का? खुङक्या नी छोङ्साला तेःती राःङगीइ रोःक्याला केक्याःप्कुए ओःले एःन्डुले ताम लाःकेन पीःजाक्या च्योःङ्रा एः–
17‘ङीःइ ख्याक्याइ लागी लेमु फुतेर्सुना ख्याक्या माःछ्याम।
ङीःइ तुङालगीइ लु लेःङ्गासुना ख्याक्या माःङु।’
18चीलेलाःना राःङ्सा मीःक्याइ च्योःङ्रा याःबु साःप्च्या मेःसागेन्दी ओःले अङ्गुरकीइ नीःङ्गार मीःथुङेन्दी युहन्ना ओःङ्सी, ओःले खुङला खुङक्याइ हेन्डी जाक्योक मीः लाःसी। 19ओःले साःगेन्दी थुङेन्दी ङाः मीःइ पुः ओःङ्सी ओःले खुङक्याइ ङाःलादी, ‘दीखो टोःकेरे, छ्याङ्स्योरे ओःले च्याल्गो तुःगेन्दीक्या रा लाःयो पेःगेनक्याइ रोः इःङे’ लाःती माःताक्पा च्याःङ्सी। नावा याःबु एः लाःकेन ताम ओःखोइ लेःगालाःम्लेरा ङोःसेउए।”
सेमल्हुक मीलुगेन क्याःसाइ मीःक्याला चेताउनी
(लुका १०:१३-१५)
20काःखो काःखो क्याःसाला येशुइ माःङ्बुरा याःमाछाककीइ लेःगाक्या पेःदी एःके, ओः क्याःसाइ मीःक्याइ स्याबा पेःदी लाःयो पोःर्ती म्याःके। ओः सोङ्गारा, येशुइ ओः क्याःसाइ मीःक्याला एःन्डु लाःती केताङ्गाला स्युःसी, 21“खोराजीन ओःले बेथसेदाइ मीःक्या, ख्योक्याला काःन्डुबा जीबा लाःङ्जे च्योःङ्रा ओःङेन एः! चीलेलाःना ख्योक्याइ कील्ला पेःक्योक याःमाछाककीइ लेःगाक्या टुरोस ओःले सीदोन क्याःसाक्याला पेःक्योक इःना, ओःलाइ मीःक्याइ माःङ्बुरा तोःङ्ला स्याबा पेःजे एःके ओःले राःदालगीइ केःला केःङ्दी ओःले जुबुला थाला टुःल्दी खुङक्याइ लाःयो पोःर्चे एःके। 22ङाः ख्याक्यला लाःके, ठीम पेःगेन ङीःमु टुरोस ओःले सीदोनगीइ मीःक्याइ तुःक्पु भन्दा ख्योक्याइ तुःक्पु छ्योम्बो ओःङेन एः।
23ए कफर्नहुमगीइ मीःक्या, ची ख्योक्या नाःम्खालीङला लेप्के लाःती ठीवा साल्गुबा? ख्योक्या नी ङ्याल्वालारा लेप्केन एः, चीलेलाःना सदोमलाङ ख्योक्याला च्योःङ्रा याःमाछाककीइ लेःगाक्या तेःङ्क्योक एःना सदोम क्याःसा ताःसेथुपाङ तेःचे एःके। 24ङाः ख्योक्याला लाःके, ठीम पेःगेन ङीःमाला सदोमगीइ मीःक्याइ तुःक्पु भन्दा ख्योक्याइ तुःक्पु छ्योम्बो ओःङेन एः।”
थाङ छेक्योकक्याइ ङाःल सोक्योक
(लुका १०:२१-२२)
25ओः तेःकासु येशुइ लाःसी, “आबा कोन्ज्यो, नाःम्खालीङ ओःले साजाम्बुलीङगीइ ताःक्पु, ङाः ख्याला थुजीछे तेर्के चीलेलाःना नावा साल्बु ओःले च्याङ कार्पुक्यामीःजीक इप्ती ज्याक्योक ताम ख्याइ चीङ मासेक्योकक्याला सेगेन नावा लुतेर्ती एः। 26इःङे, आबा कोन्ज्यो, एःन्डु पेःजे ख्याला सेम थेसी।
27ङाःइ आबा कोन्ज्योइ ङाःला थाम्जेर ताम तेर्ती एः। आबाइ बाहेक पुःला सुइयाङ ङोःमेसेए, ओःले पुःइ बाहेक आबाला सुइयाङ ङोःमेसेए, ओःले पुःइ दाम्क्योकक्याइयाङ आबा कोन्ज्योला ङोःसेउए।
28ए खुर्पु चेन्दी खुर्ती थाङ छेक्योक्या थाम्जेर ङाःसाःला स्यो, ङाः ख्योक्याला ङाःल सोजे तेर्के। 29ङाःइ नेसीङ खुर्तो ओःले ङाःलाःम्ले लोप्तो चीलेलाःना ङाःइ सेम नेमु ओःले याङ्छाबु एः, ओःले ख्योक्याइ राःङगीइ मीःलीइ ङाःल सोजे ज्योर्केन एः। 30चीलेलाःना ङाःइ नेसीङ तेःमु एः, ओःले ङाःइ खुर्पु याःङ्दी एः।”
Àwon tá yàn lọ́wọ́lọ́wọ́ báyìí:
मत्ती 11: SYW
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2024 (Active), Wycliffe Bible Translators, Inc. All rights reserved.
