मत्ती 10
10
मेःन्दा चीङ्ङी प्रेरीतक्याइ लेःगा
(मर्कुस ३:१३-१९; ६:७-१३; लुका ६:१२-१६; ९:१-६)
1येशुइ राःङगीइ चीङ्ङीरा योबाक्याला केक्याःप्ती रुःप चीःसी ओःले खुङक्याला हेन्डी तेङेन्दी ओःले थाम्जेर खालगीइ नाःजाक्या टाःच्युगेन आङ्ज्या तेर्सी। 2दी चीङ्ङी प्रेरीतक्या दीक्यारा इःङे– तोःङगीइदी पत्रुस लाःकेन सीमोन ओःले खुङगीइ नोः अन्द्रीयास, जब्दीयाइ पुः याकुब रा खुङगीइ नोः युहन्ना, 3फीलीप रा बारथोलोमाइ, थोमा रा च्याल्गो तुःगेन मत्ती, अल्फयसकीइ पुः याकुब, थेदीयस, 4देशभक्ती सीमोन ओःले येशुला तुःक तेर्केन यहुदा इस्करीयोत।
5येशुइ दी मेःन्दा चीङ्ङी प्रेरीतक्याला एःन्डु लाःती ताङ्सी, “ख्याक्या राःङ्सा क्युःपाइ मीःक्यासाःला ओःले सामरीक्याइ क्याःसाला माःन्डो। 6इःनाङ इस्राएल क्युःपाइ मीःक्यासाःला चीग्रा सुङ चीलेलाःना खुङक्या तोर्क्योक लुःकक्याइ छोबा च्योःङ्रा एः। 7मीःक्याला ‘नाःम्खालीङगीइ क्याःल्खाप थामालारा ओःङ्सीःङ्दी एः’ लाःतेरा लोःप। 8नेःपाक्याला टाःच्युदो, सीक्योकक्याला सोम्बो लोदो, जे नाःजा क्याःप्क्योकक्याला टाःच्युदो ओःले हेन्डीक्याला तेङ्दो। ख्योक्याइ एःन्दाराङ ज्योर्सी, ओःले एःन्दाराङरा तेर। 9ख्योक्या राःङगीइ केपाला सेर, ङुल ओःले साःङगीइ टाङ्गा डेबा माःखुर, 10लाःमगीइ लागी काःल्दा, केःला, लेखाम ओःले चुजेला पेःर्का माःखुर, चीलेलाःना लेःमीक्याइ साःजे ज्योर्कोःउए।
11ख्योक्या युःल ओःले क्याःसाला डोगासुना, ख्योक्याला तोःङ्ज्याङ पेःजे छोल्गेन मीःला छोल्दो ओःले ओः ठाउँ माःपोःरथुप खुङ ङीमुरा तेः। 12ख्योक्या खीमला स्युःगासुना ‘ख्याला खाम्साङ्बु काःल्ज्युक।’ लाःती लोःप। 13ओः खीमगीइ फेबेक्याइ ख्योक्याला तोःङ्ज्याङ पेःसी लाःना ओः खाम्साङ्बु ओः खीमला ज्योर्च्युक। इःनाङ खुङक्याइ ख्योक्याला तोःङ्ज्याङ माःबे लाःना ओः खाम्साङ्बु ख्योक्यासाःलारा लोःदी ओःङ्ज्युक। 14काःन्दीङ खीमला ओःले क्याःसाला मीःक्याइ ख्योक्याला तोःङ्ज्याङ माःबे लाःना ओःले ख्योक्याइ लाःक्योक माःकोः लाःना ओः ठाउँ पोःर्ती सुङ। ओः मीःक्याला कोन्ज्योइ पेःगेन ठीमगीइ चेताउनी तेर्चेला ख्योक्याइ राःङगीइ स्याःप्टाइ तुःल प्रुदी सुङ। 15तेःन्दामरा ङाः ख्योक्याला लाःके, ठीम पेःगेन ङीःमाला ओः क्याःसाइ मीःक्याइ तुःक्पु भन्दा नी सदोम ओःले गमोराइ#१०:१५ सदोम ओःले गमोराइ कोन्ज्योइ दी ङीथाल युःल ओःले ओःलाइ मीःक्याला खुङक्याइ माःङ्बुरा लाःयोक्याइ पेःगासुना सीःङ्दाक थादी एःके। मीःक्याइ तुःक्पु माःङ्बु नाजे खुगेन्दी ओःङेन एः।
तुःक्पुइ बारेला चेतवानी
(मर्कुस १३:९-१३; लुका २१:१२-१७)
16कोःदो, फाराक्याइ कील्ला लुःकक्याला ताङ्क्योक च्योःङ्रारा ङाः ख्योक्याला मीःक्याइ कील्ला ताङ्देरा एः। ओः सोङ्गारा, ख्योक्या प्रुःलक्या च्योःङ्रा च्याङ्बु ओःले तुःकुःरकुरक्या च्योःङ्रा थेका ओःङ्कोःउए। 17इःनाङ मीःक्यालाःम्ले च्यागाताःक्पु पेःदी तेः, चीलेलाःना खुङक्याइ ख्योक्याला जुम्दी अदालातला खेर्केन एः ओःले जोम्साखीमक्याला खेर्ती कोर्रा क्याःप्केन एः। 18ङाःइ पेःगासुना खुङक्याइ ख्योक्याला छ्योम्बो हाकीम ओःले क्याःल्बुक्याइ तोःङ्ला खेर्केन एः। ओः तेःकासु ख्योक्याइ लागी खुङक्याला ओःले राःङ्सा क्युःपाइ मीःक्याला ङाःइ बारेला लाःकेन मौका ओःङेन एः। 19ख्योक्याला जुम्दी खेर्केन तीःजीला ची लाःकोन्दी ओःले काःन्डुले लाःकेन्दी लाःती तुःङाल माःबे, चीलेलाःना ख्योक्याइ लाःकोन ताम ओः तेःकासुःरा ख्योक्याला तेर्केन एः। 20चीलेलाःना ओः तेःकासु ख्योक्या राःङगीइ सेमलाःम्ले मीःङे, इःनाङ आबा कोन्ज्योइ लाइ ख्योक्यालाःम्ले ताम लाःकेन एः।
21मीःक्याइ राःङगीइ आतानोःक्याला सेचेला तेर्केन एः। आबाक्याइ पुःपोःमोक्याला ओःले पुःपोःमोक्याइ आबा आमाक्याला वीरोध पेःदी सेच्युगेन एः। 22ङाःइ पेःगासुना ख्योक्याला थाम्जेरकीइ ङ्याप्च्युक पेःगेन एः। इःनाङ तीङथुप ङाःला सेमल्हुक लुदी तेःकेनक्यालादी सेन्च्युगेन एः। 23मीःक्याइ ख्योक्याला युःल चीगला तुःक्पु तेर्सी लाःना राःङ्सा युःलला छ्योङ्दी सुङ। तेःन्दामरा ङाः ख्योक्याला लाःके, ङाः मीःइ पुः ओःङ्जे तोःङ्ला ख्योक्याइ राःङगीइ थाम्जेर लेःगा इस्राएलगीइ थाम्जेर युःल रा क्याःसाला पेःमीःसीःङेन एः।
24काःन्दीङ योबा राःङगीइ लोबेन भन्दा छ्योम्बो मीःङे, ओःले काःन्दीङ लाबु राःङगीइ ताःक्पु भन्दा छ्योम्बो मीःङे। 25योबा राःङगीइ लोबेन च्योःङ्रा ओःले लाबु राःङगीइ ताःक्पु च्योःङ्रा ओःङ्गासुना राःङगीइ सेम सन्तोक पेःज्युक। खीमगीइ गोछेस्योलारा बालजीबुल#१०:२५ बालजीबुल बालजीबुलदी शैतानगीइ राःङ्सा मीःन इःङे। लाःती केक्याःप्कुए लाःना, खीमगीइ राःङ्सा फेबेक्याला ताःरुङ काःन्डुबा माःइबा लाःटो?
सु थोङ्दी जीको?
(लुका १२:२-७)
26ओः सोङ्गारा, मीःक्या ङीमु माःजी। चीलेलाःना उप्क्योक ताम ची काःजे एःपा, ओःखो थाम्जेर फ्यागेन एः, ओःले इप्क्योक ची काःजे ताम एःपा, ओःखो थाम्जेरकीइ छोर्केन एः। 27ङाःइ ख्योक्याला नाक्जुकला लाःक्योक ताम ख्योक्याइ साङ्बुला थाम्जेरला लाःकेन एः, ओःले ङाःइ ख्योक्याइ नाम्ज्योला खाजुम्माले लाःक्योक ताम ख्योक्याइ छ्योम्बो के तेङ्दी थाम्जेरकीइ कोःगेन पेःदी लाःकेन एः। 28जुबुला चीग्रा सेचे खुगेन मीःक्या ङीमु माःजी, चीलेलाःना खुङक्याइ ख्योक्याइ लाला सेमीःखुए। बरु ला ओःले जुबु ङीक्कारला ङ्याल्वाला सीःङ्दाक थाखुगेन कोन्ज्यो ङीमु जीबा पेःदो। 29ची टाङ्गा चीग डेबाइ ङीथाल भङ्गेराक्या ङ्योःजे मेःज्योर्पा ले? एःनाङ ख्योक्याइ आबा कोन्ज्योइ सेम माःबेथुप ओः भङ्गेराक्या नाःङ्ला चीगकाङ मीसीगेन एः। 30ओःले ख्योक्याइ लागी नी ख्योक्याइ गोइ टाथुपाङ टाःङ्दी एः। 31ओः सोङ्गारा, माःजी, ख्योक्या नी माःङ्बुरा भङ्गेराक्या भन्दाङ माःङ्बुरा रीःनगीइदी एः।
32ओः सोङ्गारा, काःखोइ ङाःला मीःक्याइ तोःङ्ला राःङगीइ प्रभु लाःती स्वीकार पेःबा, ओःखोला ङाःङ नाःम्खालीङला तेःकेन ङाःइ आबा कोन्ज्योइ तोःङ्ला राःङगीइदी इःङे लाःती स्वीकार पेःगे। 33इःनाङ काःखोइ ङाःला मीःक्याइ तोःङ्ला ङोःमेसेए लाःती लाःपा, ओःखोला ङाःङ नाःम्खालीङला तेःकेन ङाःइ आबा कोन्ज्योइ तोःङ्ला ङोःमेसेए लाःकेन एः।
येशुला ब्य्राङेनक्याइ खुर्कोःन तुःक्पु
(लुका १२:५१-५३; १४:२६-२७)
34ङाः साजाम्बुलीङला मीःक्याला डीक्च्युजेला ओःङ्क्योक इःङे लाःती ठीवा माचे। मीःक्याला डीक्च्युजेला मीःङे, इःनाङ ङाः नी तुःक्पु ख्योङ्जेला ओःङ्क्योक इःङे। 35ङाः नी पुःक्याला राःङगीइ आबाक्याइ वीरुद्धला, पोःमोक्याला राःङगीइ आमाक्याइ वीरुद्धला ओःले नामाक्याला राःङगीइ क्युःमुक्याइ वीरुद्धला लाःङ्जेला ओःङ्क्योक इःङे। 36ख्योक्याइ छ्योम्बो टाःलाङदी राःङगीइ खीमगीइ मीःरा ओःङेन एः।
37काःखोइ ङाःला भन्दा माःङ्बु राःङगीइ आबा आमाला च्याःम्बु पेःउबा, ओःखो ङाःइ योबा ओःङ्मीःखुए। ओःन्डुलेरा काःखोइ ङाःला भन्दा माःङ्बु राःङगीइ पुःपोःमोला च्याःम्बु पेःगेन्दीङ, ङाःइ योबा ओःङ्मीःखुए। 38काःखोइ राःङगीइ क्रुस खुर्ती#१०:३८ राःङगीइ क्रुस खुर्ती क्रुस खुर्चे लाःक्योकदी काःखोङ मीःला तुःक्पु ओःङ्नाङ ओःले येशुइ लागी सीकोःनाङ सीजे तयार ओःङ्जे इःङे। ङाःइ तीङ्ला माःयुङ्बा, ओःखो ङाःइ योबा ओःङ्मीःखुए। 39काःखोइ राःङगीइ मीःजी थार्च्युजे छोल्बा, ओःखोइ सीच्युगेन एः, ओःले राःङगीइ मीःजी ङाःइ लागी सीच्युगेन्दीइ, ओःखो सेच्युगेन एः।
योबाइ ज्योर्केन इनाम
(मर्कुस ९:४१; लुका १०:१६)
40ख्योक्याला तोःङ्ज्याङ पेःगेन्दीइ ङाःला तोःङ्ज्याङ पेःउए, ओःले ङाःला तोःङ्ज्याङ पेःगेन्दीइ ङाला ताङेन्दीला तोःङ्ज्याङ पेःउए। 41काःखोइ कोन्ज्योइ लेःङ्गो तेर्केन्दीला कोन्ज्योइ लेःङ्गो तेर्केन्दीरा लाःती तोःङ्ज्याङ पेःबा, ओःखोइ कोन्ज्योइ लेःङ्गो तेर्केन्दीइ इनामरा ज्योर्केन एः। ओःन्डुलेरा काःखोइ ताःक्पा मीःला ताःक्पारा लाःती तोःङ्ज्याङ पेःबा, ओःखोइ ताःक्पा मीःइ इनामरा ज्योर्केन एः। 42तेःन्दामरा ङाः लाःके, सुइयाङ दी ङाःइ योबाक्या नाःङ्ला थाम्जेर भन्दा छीमीला ङाःइ योबा इःङे लाःती मेःन्ज्या काःङ टाःङ्मु छ्यु चीग्रा थुङ्जे तेर्सी लाःनाङ, खुङगीइ तेःन्दामरा इनाम ज्योर्केन एः।”
Àwon tá yàn lọ́wọ́lọ́wọ́ báyìí:
मत्ती 10: SYW
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2024 (Active), Wycliffe Bible Translators, Inc. All rights reserved.
