मत्ती 12
12
ङाःल सोगेन ङीःमाइ ताःक्पु
(मर्कुस २:२३-२८; ३:१-६; लुका ६:१-११)
1ओः तेःकासु येशु यहुदीक्याइ ङाःल सोगेन ङीःमाला न्याः सीःङगीइ लाःम पेःदी डोदेरा एःके। तोःपा तोक्योक सोङ्गारा खुङगीइ योबाक्याइ न्याःइ नीमाल तुःदी साःगाला स्युःसी।#१२:१ सीःङलाःम्ले डोदेरा पेःगासुना मीःक्याला तोःपा तोसी लाःना खुङक्याइ सीःङला कोःङ्क्योक स्याःक्या साःजे ओःङ्गुके। ओःखोला कुक्योक मेःलाःप्के। 2दीखो थोङ्दी फारीसीक्याइ येशुला लाःसी, “तादो, ख्याइ योबाक्यादी ङाःल सोगेन ङीःमाला उःइ छ्येइ ठीमगीइ पेःमीःङे लाःक्योक लेःगारा पेःदेरा एः।”
3येशुइ खुङक्याला लेःन लोदी लाःसी, “दाऊद ओःले खुङगीइ रोःक्या तोःपा तोक्योक तीःजीला खुङगीइ ची पेःदी एःके? ची ख्याक्याइ छ्येइ पेज्या टोःदी म्याःपा? 4खुङगीइ नी कोन्ज्योइ चाङ्मा पाल नाःङ्ला स्युःदी कोन्ज्योला फुल्क्योक खुरा खुङगीइ रोःक्या ङीमु डीक्ती साःदी एःके। छ्येइ ठीमगीइ च्योःङ्रा एःना ओःखो खुरा पुजाहारीक्याइ बाहेक राःङ्सा सुइयाङ साःजे मेयोङ्जेके। 5ची ख्याक्याइ मोशाइ तेर्क्योक छ्येइ ठीमला टोःदी म्याःपा, कोन्ज्योइ मन्दीरला पुजाहारीक्याइ ङाःल सोगेन ङीःमाला तेन्दुरा लेःगा पेःउए। एःन्डुले खुङक्याइ ङाःल सोगेन ङीःमाइ ठीमला नोङ्गुए। इःनाङ खुङक्याला माःताक्पा मेःच्याःङए। 6ङाः ख्याक्याला लाःके, दीला मेःन्दा चीग एः, खुङ कोन्ज्योइ मन्दीर भन्दाङ छ्योम्बो इःङे। 7ओःले ‘ङाःला पशुक्याइ बली मेःको, इःनाङ ख्योक्याइ राःङ्साक्याला नीङ च्योःक्योक सेम थेकुए।’#होशे ६:६ लाःती कोन्ज्योइ छेला प्रुःक्योक ताम ख्याक्याइ सेक्योक एःना ख्याक्याइ ताःक्पा मीःक्याला माःताक्पा च्याःङ्जे म्याःके। 8चीलेलाःना ङाः मीःइ पुः नी ङाःल सोगेन ङीःमाइदीङ प्रभु इःङे।”
9ओःलाःम्ले येशु काःल्दी यहुदीक्याइ जोम्साखीमला काःल्सी। 10ओःला मेःराङ चीग लाःक्पा काम्क्योक मीः एःके। ओःले येशुला माःताक्पा च्याःङेन ठीवाइ फारीसीक्याइ टीःसी, “ची उःइ ठीमला ङाःल सोगेन ङीःमाला टाःच्युजे ओःङ्गुबा?” 11येशुइ लेःन लोदी लाःसी, “ख्याक्या नाःङ्ला सुइदीङ लुःक ङाःल सोगेन ङीःमाला होपला स्युःसी लाःना ओःखोला गेबु गेबु फीला मेतेङ्बा ले? 12लुःक भन्दा नी मीः ताःरुङ माःङ्बु रीःनगीइदी इःङे। ओः सोङ्गारा, उःइ छ्येइ ठीमगीइयाङ ङाःल सोगेन ङीःमाला याःबु लेःगा पेःजे याःबु इःङे लाःती एः।” 13ओः तीङ्ला येशुइ ओः लाःक्पा काम्क्योक मीःला लाःसी, “ख्याइ लाःक्पा स्याःङ्दो।” खुङगीइ लाःक्पा स्याःङ्सी, ओःले खुङगीइ लाःक्पा टाःदी राःङ्सा लाःक्पा च्योःङ्रारा याःबु काःल्सी। 14ओःले फारीसीक्या जोम्साखीम नाःङ्ले थेङ्दी काःल्सी ओःले येशुला काःन्डुले सेका लाःती तेःदाम पेःगाला स्युःसी।
कोन्ज्योइ दाम्क्योक लाबु
(मर्कुस ३:७-१२; लुका ६:१७-१९)
15राःङगीइ वीरुद्धला एःन्डुबा तेःदाम पेःक्योक छोर्ती येशु ओःलाःम्ले काःल्सी। माःङ्बुरा मीःक्या खुङगीइ तीङ्ला ओःङ्सी ओःले ओःला एःक्योक नेःपाक्याला थाम्जेरला खुङगीइ टाःच्युसी, 16इःनाङ येशुइ खुङगीइ बारेला सुलाङ माःलाःप लाःती आज्ञा तेर्सी। 17कोन्ज्योइ खुङगीइ लेःङ्गो तेर्केन यशैयालाःम्ले लाःक्योक ताम पुरा डोजेला एःन्डुबा काःल्योक इःङे,
18“ङाःइ दाम्क्योक ओःले च्याःम्बु पेःक्योक ङाःइ लाबुला तादो,
खुङ ङीमु ङाः माःङ्बुरा केःदाङ एः।
खुङला ङाः राःङगीइ ला तेर्के,
ओःले खुङगीइरा थाम्जेर मीःक्याला ठीमगीइ बारेला लेःङ्गो फेल्गेन एः।
19खुङगीइ ठुक्पा मेःक्याःप्केन एः ओःले केमेताङेन एः, लाःमक्याला खुङगीइ के सुइयाङ मेःकोगेन एः।
20ख्योक्पे मीमा खुङगीइ मेच्यागेन एः,
ओःले खुङगीइ सीजे चाल्क्योक छेमीङ मेसेकेन एः।
खुङगीइ ठीमला क्याःल्च्युगेन एः,
21ओःले थाम्जेर मीःक्याइ खुङखाला रेःवा ज्यागेन एः।”
येशुखाला फारीसीक्याइ पाःकेन पेःक्योक
(मर्कुस ३:२०-३०; लुका ११:१४-२३)
22चीङ मीःक्याइ हेन्डी क्याःप्क्योक मेःन्दा चीग मी मेथोङेन्दी ओःले लेम्बा मीःला येशुसाःला ख्योङ्सी। येशुइ ओःखोला टाःच्युसी, ओःले खुङ मी थोङेन्दी ओःले ताम लाःखुगेन्दी काःल्सी। 23दीखो थोङ्दी थाम्जेर मीःक्या याःमाछाक नेतेरा एःन्डुबा ताम लाःकाला स्युःसी, “ची दीखो दाऊदकीइ छार्क्युफुर्क्यु, थार्च्युगेन क्याःल्बु का इःम्बा की?” 24दीखो कोःदी फारीसीक्याइ लाःसी, “दीखोइ नी हेन्डीइ क्याःल्बु बालजीबुलगीइ#१२:२४ बालजीबुलगीइ दीखो शैतानगीइ राःङ्सा मीःन इःङे। ल्हेइ हेन्डीक्या तेङ्गुए।”
25इःनाङ येशुइ खुङक्याइ एःन्डुबा ठीवा साल्क्योक छोर्ती खुङक्याला लाःसी, “काःन्दीङ देश नाःङ्ला खुङक्या राःङ राःङरा ठुक्पा स्योर्लुङ चासी लाःना ओःखो राःङ्रा सीःङ्दाक चेती डोउए। राःङ नाङ्लारा ठुक्पा स्योर्केन खीमक्याङ ओःले क्याःसाक्याङ सीःङ्दाक डोउए। 26शैतानगीइ शैतानलारा तेङ्सी लाःना खुङक्या नाःङ्ला खाफ्याउए ओःले ओःखोइ क्याःल्खाप काःन्डुले तेःखुँरा? 27ख्याक्याइ ङाःला हेन्डीइ क्याःल्बु बालजीबुलगीइ ल्हेलाःम्ले ङाःइ हेन्डी तेङ्गुए लाःती लाःकुए। ओःन्डु एःना ख्याक्याइ योबाक्याइदी सुइ ल्हेलाःम्ले हेन्डीक्या तेङ्गुबा ले? ख्याक्याइ राःङगीइ योबाक्याइ पेःक्योक लेःगाइरा ख्याक्याइ डीक्पु पेःदी म्याः लाःती तेङ्गुए। 28इःनाङ कोन्ज्योइ लालाःम्ले ङाःइ हेन्डी तेङ्गुए लाःना कोन्ज्योइ क्याःल्खाप ख्याक्याइ कील्ला ओःङ्सीःङ्दी एः। 29फीर्च्या कोःदो, क्याःबा मीःइ खीमला स्युःदी खुङगीइ स्याःक्या खेर्चे तोःङ्ला खुङला ताकोःउए। ओःले चीग्रा खुङगीइ खीम कुजे खुउए।
30काःखो ङाः ङीमु म्याःपा, ओःखो ङाःइ वीरुद्धला एः, ओःले काःखोइ ङाः ङीमु रुःप मेःजोपा, ओःखोइ टाम्गुए। 31ओः सोङ्गारा, ङाः ख्याक्याला लाःके, मीःक्याइ पेःक्योक थाम्जेर लाःयो ओःले खुङक्याइ लाःक्योक माःताक्पा तामक्या क्षमा ओःङ्खुगेन एः, इःनाङ चाङ्मा लाइ वीरुद्धला लाःक्योक माःताक्पा तामक्यादी नाःमाङ क्षमा मेःयुङेन एः। 32सुइयाङ ङाः मीःइ पुःइ वीरुद्धला चीङ लाःसी लाःना ओःखोला क्षमा तेर्खुगेन एः, इःनाङ सुइयाङ चाङ्मा लाइ वीरुद्धला चीङ लाःसी लाःना ओःखोला दी तीःनामला ओःले ओःङेन तीःनामलाङ क्षमा मेःयुङेन एः।
तोःङ्बो ओःले ओःखोइ ब्रुम्दो
(लुका ६:४३-४५)
33याःक्योक ब्रुम्दो कोःङ्जेला तोःङ्बोङ याःक्योकरा ओःङ्कोःउए। तोःङ्बो याःदी म्याः लाःना ब्रुम्दोङ मेःयाःए। काःखोङ तोःङ्बोला ओःखोला कोःङेन ब्रुम्दोलाःम्लेरा ङोःसेउए। 34ए प्रुःलगीइ छार्क्युफुर्क्युक्या, ख्याक्या राःङरा माःताक्पा एः, ओःले याःबु ताम काःन्डुले लाःचे खुउबा? चीलेलाःना सेमला एःक्योक तामक्यारा खालाःम्ले थेङ्गुए। 35याःबु मीःइ राःङगीइ याःबु सेमलाःम्ले याःबुरा तामक्या लाःकुए। माःइबा मीःइ राःङगीइ माःइबा सेमलाःम्ले माःइबारा तामक्या लाःकुए। 36ङाः ख्याक्याला लाःके, मीःक्याइ ची काःजे लेःगा म्याःक्योक तामक्या लाःपा, ओः थाम्जेर तामक्याइ प्रुःदुक्पा खुङक्याइ ठीम पेःगेन ङीःमाला तेर्कोःन एः। 37ख्याक्याइ लाःक्योक तामक्याइरा ठीम पेःगेन ङीःमाला ताःक्पा की माःताक्पा च्याःङेन एः।”
योनाइ च्युःन्डुलगीइ बारेला
(मर्कुस ८:११-१२; लुका ११:२९-३२)
38चीङ छ्येइ ठीमगीइ लोबेनक्या ओःले चीङ फारीसीक्या डीक्ती येशुला लाःसी, “ए लोबेन, ख्याइ चुःन्डुल चीग तेङ्तेर्क्योक ताजे ङीःला सेम थेती एः।” 39येशुइ खुङक्याला लेःन लोदी लाःसी, “तीःङ्साङगीइ मीःक्या काःजे माःरीक्पा ओःले कोन्ज्योला सेमल्हुक मीलुगेन्दी एः! खुङक्याइ याःमाछाककीइ चुःन्डुल ताजे छोल्गुए, इःनाङ कोन्ज्योइ लेःङ्गो तेर्केन्दी योनाला तेर्क्योक चुःन्डुल बाहेक दी मीःक्याइ राःङ्सा काःखोङ चुःन्डुल ताजे मेःज्योर्केन एः। 40चीलेलाःना काःन्डुले योना छ्योम्बो ङ्याःइ टोःपा नाःङ्ला ङीःमा सुम रा कुःङ्मु सुम तेःती एःके, ओःन्डुलेरा ङाः मीःइ पुःङ सा नाःङ्ला ङीःमा सुम रा कोःङ्मु सुम तेःकेन एः। 41ठीम पेःगेन ङीःमाला नीनवे क्याःसाइ मीःक्याइ लाःङ्दी तीङ्साङगीइ मीःक्याला माःताक्पा च्याःङेन एः, चीलेलाःना योनाइ कोन्ज्योइ लेःङ्गो प्रचार पेःगासुना खुङक्याइ राःङ राःङगीइ स्याबा पेःदी लाःयो पोःर्ती एःके। ओःले ङाः ख्याक्याला लाःके, योना भन्दाङ छ्योम्बो मेःन्दा चीग दीला एः। 42ठीम पेःगेन ङीःमाला ल्होइ शेबा देशकीइ क्याःल्मु लाःङ्दी दाङ तीःरीङगीइ मीःक्याला माःताक्पा च्याःङेन एः, चीलेलाःना सोलोमन क्याःल्बुइ नावाइ ताम कोःजेला खुङ माःङ्बुरा थारीःङ्बुले ओःङ्दी एःके। ओःले ङाः ख्योक्याला लाःके, सोलोमन भन्दाङ छ्योम्बो मेःन्दा चीग दीला एः।
माःताक्पा ला फीर्च्या लोःदी ओःङ्गुए
(लुका ११:२४-२६)
43काःन्दीङ मीःलाम्ले माःरीक्पा ला तेङ्मीःजीक ओः ला ङाःल सोदी तेःचेला काम्बु साक्याले पेःदी याःबु सा छोल्देरा डोउए, ओःले काःलाङ मेःज्योर एः। 44ओःले ओःखोइ एःन्डु लाःकुए, ‘ङाः तोःङ्ला तेःक्योक मीः नाःङ्लारा लोःदी डोगे।’ ओःला लोःदी ओःङ्गासुना ओःखोइ ओः मीःला तोःङ्राङ, याःबुले फ्यादी ओःले छेदी ज्याक्योक खीम च्योःङ्रा फ्रेकुए। 45दीखो थोङ्दी ओः ला डोउए ओःले राःङ भन्दाङ माःङ्बु माःरीक्पा राःङ्सा तीःनथाल लाक्या केक्याःप्ती ख्योङ्गुए, ओःले ओः थाम्जेर लाक्या ओः मीः नाःङ्ला स्युःदी ओःला तेःकुए। ओःले ओः मीः तोःङ्ला भन्दा तीङ्ला ताःरुङ माःइबा ओःङ्गुए। दाङ तीःरीङगीइ माःताक्पा मीःक्यालाङ ओःन्डुबारा ओःङेन एः।”
येशुइ आमा रा नोःक्या
(मर्कुस ३:३१-३५; लुका ८:१९-२१)
46येशु मीःइ पोर्चोम ङीमु ताम लाःतेरा पेःगासुना, खुङगीइ आमा ओःले नोःक्या लेप्सी। खुङक्या येशु ङीमु ताम लाःचे छोल्क्योक सोङ्गारा फीला लाःङ्दी तेःती एःके। 47ओः सोङ्गारा, ओःलाइ मेःराङ चीग मीःइ येशुला लाःसी, “तादो, ख्याइ आमा रा नोःक्या ख्या ङीमु ताम लाःचे एः लाःती फीला कुःदी तेःती एः।” 48येशुइ ओः मीःला लाःसी, “ङाःइ आःमा रा नोःक्या सु इःङे?” 49ओःले राःङगीइ लाःक्पाइ योबाक्याला तेङ्देरा खुङगीइ लाःसी, “तादो, ङाःइ आःमा रा नोःक्या दीखोक्यारा इःङे। 50चीलेलाःना नाःम्खालीङला तेःकेन ङाःइ आबा कोन्ज्योइ लाःक्योक ङीःङेनक्यारा ङाःइ नोः, नोःमो ओःले आःमा इःङे।”
Àwon tá yàn lọ́wọ́lọ́wọ́ báyìí:
मत्ती 12: SYW
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2024 (Active), Wycliffe Bible Translators, Inc. All rights reserved.
