1Mos. 34
34
Dina samba Sikhem
1Ka sara gogoi ei si Dina, togat Jakob samba Lea sinanalep, masibalou piga pa' tainanalep tai Kanaan. 2Kateteret si Sikhem, togat Hemor sibailiu rimata ka kupkumen nenda masiitco si Dina, ambitnangan siokko nenda, lepa pajonaungannia. 3Bulat maala le bagania kai Dina, pat bara patuatnia katubu siokko nenda samba ibesiake bule siokko nenda iobania. 4Kuanangan si Sikhem ka ukkuinia, “Kutiddou besiake nuala siokko nenda ibailiu nia sinanalepku.”
5Arepnangan si Jakob, si Dina togania arapalolitnan pusiokkonia, tapoi tatogania aipeile sia masijago terimeunia ka su'su', si Jakob imengmengake le pagalaiat nenda teret ratoili tatogania.
6Lepa ei si Hemor ukkui Sikhem masiailiake si Jakob, patibo ka sia. 7Tapoi kateteret nenda tatogat Jakob toilidra ka su'su'. Masiarep sipuaili nenda, tugegerangan samba bulat magolu le sia. Aipoi pasigagalai sikataika togat Jakob nenda, si Sikhem aipaloloian sangamberi tai Israel. 8Kuanangan si Hemor kai Jakob, “Togakku si Sikhem ioba togam; kutiddou bule nuobaake togakku mutolimou ka sia. 9Kauan tagalai pukerekat baga, bangsam samba bangsamai mutalimou sipagagalu. 10Iageti momoi nukuddu kam kakai ka laggai nene; kaipa le nuoba kam, samba pukuddungan le kam sene.”
11Lepa geti kuanangan si Sikhem katubut ukkui Dina samba ka sakebbunia, “Arepikam panindogatku nene, lepa akekungan geti apa siobat bagamui. 12Kua kam panguruat apa besiakenenmui, samba teuake kam mas putalimougat. Kuake geti apa tiddougetmui, tapoi obaakekam kutalimouake siokko nenda.”
13Kalulut si Sikhem aipalolitnan pusiookkot bagidra si Dina, tatogat Jakob paboko kai Sikhem samba kai Hemor ukkuinia. 14Kuanangan katubut rua sirimanua nenda, “Maila kai kuobaake kai bagimai mutalimou pasamba sirimanua sita'pei atusunat. 15Kuoba kai masisilo panindogat nenda pasamba sara enungan galaiakenen, iate Kam buita ibailiu kele kai, katukolobatnia sangamberi taimanteu katalagamui buita tusunat. 16Lepa nenda silo'maian panindogatnu pagalaiat mutalimou simagalu nenda. Pukuddumaian geti katalagamui samba ibailiu sara bangsa pasamba ekeu. 17Tapoi ke' ta'nuoba masisilo' enunganmai, samba ta'nuoba tusunat, alamaian minca siokko nenda samba tuitui kai.”
18Iageti si Hemor samba si Sikhem masisilo panindogatdra. 19Samba si Sikhem matareknia masisilo enungan galaiakenen nenda kalulut ioba'poi si Dina. Katalagat muntogatnia, si Sikhem le bulat tusuru'.
20Lepa geti ei si Hemor samba si Sikhem ka kudduat paailiat ka matat baliu gugurukat laggai, samba patibo katubutda sipulalaggai, kise, 21“Tai Israel nenda saaleita. Oto edangannia rakuddu ka laggai nene pasamba sita samba kaipa raoba ei. Laggai nene malio addeat kasia. Momoi taputalimou ka taiokkora, samba sia leu momoi raputalimou ka taiokkota. 22Tapoi ka enunggan nene le raoba sirimanua nenda mukuddu pasamba sita samba ibailiu sara bangsa pasamba sita, iate sangamberi taimanteu katalagatta buita tusunat kele sia. 23Senengamata mungkuat tarimeura samba sangamberi pukayoatra ibailiu bakkatta. Oto kauan tasilo kam panindogatra bule rakuddu pasamba sita.” 24Sangamberi sirimanua siparururu' nenda masisilo panindogat Hemor samba Sikhem, iageti sangamberi sirimanua taimanteu simakebbukat ka laggai nenda tusunat.
25Pasat telungagogoi, kateteret ai sia mangongorik kalulut tusunat, oi rua sia tatogat Jakob, iate kebbut Dina sipuoni Simeon samba si Lewi, lepa alarangan tegledra guru sia kabagat laggai. Lepa geti mateiakerangan senen sirimanua taimanteu sedda, 26samba leu si Hemor samba si Sikhem. Lepa alarangan si Dina ka lalep Sikhem, iageti tuitui sia. 27Kele ailepa pamateiat nenda, tatogat Jakob sabagei masiparauragi laggai nenda sibailiu silit besit patuat kalulut pusiokkot bagidra arapalolitnan. 28Alarangan mungkuat kambing, biribiri samba jauinia, kalideinia samba sangamberi sibabara kabagat laggai samba ka su'su'. 29Alarangan sangamberi bibilet simakeppu saki, luplupakerangan tainanalep samba tatoga, samba rauraurangan sangamberi sibabara kabagat lalep ka laggai nenda.
30Kuanangan si Jakob katubut Simeon samba Lewi, “Anupubesikingan kam aku. Kineiget tai Kanaan samba tai Feris samba sangamberi sipulaggai ka laggai nene rapulagaki le aku baga geti. Kasita ta'maigi sita. Ke'bai sipulaggai nenda musara sangamberidra samba masisaggangi aku, sangamberi keluargatta masubu le.”
31Tapoi alegirangan, “Tamomoi kuobaake kai bagimai rakaunia sibailiu sipaelet.”
Àwon tá yàn lọ́wọ́lọ́wọ́ báyìí:
1Mos. 34: MWV
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
@LAI 2015